ມຽນມາ ສົ່ງດາວທຽມດວງທີ 2 ເພິ່ມປະສິທິພາບດ້ານການສື່ສານ

158

ລັດຖະບານມຽນມາ ນຳໃຊ້ບໍລິການຈະຫຼວດຂອງບໍລິສັດຄູ່ຮ່ວມສັນຍາກັບອົງການອະວະກາດເອີຣົບ ສົ່ງດາວທຽມສື່ສານ ດວງທີ 2 ເພື່ອຂະຫຍາຍຄວາມສາມາດໃນການພັດທະນາເຄືອຂ່າຍໂທລະຄົມມະນາຄົມ ແລະ ອິນເຕີເນັດໃຫ້ມີຄວາມສາມາດໃນການຄວບຄຸມຍິ່ງຂື້ນກວ່າເກົ່າ.

ສຳນັກຂ່າວຕ່າງປະເທດລາຍງານຈາກນະຄອນຫຼວງກາແຢນ ດິນແດນເຟຣັນເກຍນາ ເມື່ອວັນສຸກ ທີ 9 ສິງຫາ ວ່າ ຈະຫຼວດ “Ariane 5 launch” ຂອງບໍລິສັດເອຣຽນສະເປຊ (Arianespace) ຈາກປະເທດຝຣັ່ງ ທີ່ຜະລິດໂດຍບໍລິສັດແອຮ໌ບັສ ເຊິ່ງເປັນຄູ່ສັນຍາຂອງອົງການອະວະກາດເອີຣົບ (ESA: European Space Agency) ອອກເດີນທາງຈາກຖານສົ່ງຈະຫຼວດ ໃນເມືອງກູຣູ ຂອງເຟຣັນເກຍນາ ເພື່ອປ່ອຍດາວທຽມສໍາຫຼວດໂລກຫຼາຍດວງ ທີ່ລວມເຖິງດາວທຽມ “ແຊັດເທິລໄລ-ທູ (satellites-2)” ຂອງສໍານັກງານເທັກໂນໂລຢີສື່ສານ ແລະ ຄວາມປອດໄພທາງໄຊເບີ ພາຍໃຕ້ການຄວບຄຸມຂອງກະຊວງສື່ສານ ແລະ ໂທລະຄົມມະນາຄົມຂອງມຽນມາ ເມື່ອວັນພຸດ ຜ່ານມາ ຕາມເວລາທ້ອງຖິ່ນ.

ທັງນີ້ ທ່ານອູ ວິນ ອ່ອງ ຫົວໜ້າຝ່າຍວິສະວະກຳຂອງໂຄງການດາວທຽມແຊັດເທິລໄລ-ທູ ກ່າວວ່າ ດາວທຽມດັ່ງກ່າວຈະຊ່ວຍເພິ່ມປະສິດທິພາບບໍ່ພຽງແຕ່ຄວາມໄວຂອງລະບົບອິນເຕີເນັດເທົ່ານັ້ນ ແຕ່ຍັງກວມເອົາເຄືອຂ່າຍການສື່ສານອື່ນໆໃຫ້ທົ່ວປະເທດ ໂດຍເບື້ອງຕົ້ນລັດຖະບານມຽນມາ ຄາດການວ່າ 95% ຂອງປະຊາກອນໃນປະເທດ ຈະໄດ້ມີໂອກາດ ນຳໃຊ້ລະບົບອິນເຕີເນັດທີ່ໄວຂຶ້ນ ແລະ ການສື່ສານລະບົບໄຮ້ສາຍທີ່ມີສັນຍານຊັດເຈນຂຶ້ນກວ່າເກົ່າ ຈາກຜົນການເຮັດວຽກຂອງດາວທຽມແຊັດເທິລໄລ-ທູ ທີ່ຈະມີການທົດລອງປະສິດທິພາບກ່ອນ ໃນເດືອນຕຸລາ ນີ້.

ສຳລັບດາວທຽມແຊັດເທິລໄລ-ທູ ຖືກອອກແບບ ແລະ ກໍ່ສ້າງໂດຍບໍລິສັດອິນເທລແຊັດຂອງອາເມຣິກາ ຕາມຂໍ້ຕົກລົງ ເມື່ອປີ 2018 ໂດຍບໍລິສັດອິນເທລແຊັດເປັນຜູ້ອອກແບບ ແລະ ພັດທະນາ “ແຊັດເທິລໄລ-ວັນ” ທີ່ໂຄຈອນສໍາຫຼວດໂລກ ຕັ້ງແຕ່ປີ 2016 ແລະ ໄດ້ຄາດການປະສິດທິພາບໃນການປະຕິບັດງານຂອງດາວທຽມແຊັດເທິລໄລ-ທູ ຈະດີກວ່າປະມານ 8 -10 ເທົ່າ.