ບັນເທີງຈີນ ບໍ່ເຂົ້າຮ່ວມງານປະກວດລາງວັນ ມ້າທອງຄໍາ ທີ່ໄຕ້ຫວັນ ໃນປີນີ້

188

ລັດຖະບານຈີນ ປະກາດວ່າ ປີນີ້ຈະບໍ່ສົ່ງຮູບເງົາ ແລະ ນັກສະແດງ ເຂົ້າຮ່ວມງານ “ມ້າທອງຄຳ” ທີ່ປຽບເໝືອນງານ “ອອສກ້າຂອງຮູບເງົາພາສາຈີນ” ເຊິ່ງຈັດຂຶ້ນຢູ່ໄຕ້ຫວັນ ມາເປັນເວລາດົນກວ່າເຄິ່ງສະຕະວັດ ຈາກບັນຫາຄວາມສຳພັນຂ້າມຊ່ອງແຄບທີ່ເຄັ່ງຕຶງ.

ສຳນັກຂ່າວຕ່າງປະເທດລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນພຸດ ທີ 7 ສິງຫາ ວ່າ ບໍລິສັດຜູ້ຜະລິດ ແລະ ຜູ້ປະກອບການຮູບເງົາຂອງຈີນ ໄດ້ອອກຖະແຫຼງການ ເມື່ອວັນພຸດ ສັ້ນໆວ່າ “ງານປະກາດ ແລະ ການມອບລາງວັນມ້າທອງຄຳ ໃນປີນີ້ ຈະບໍ່ມີຮູບເງົາຈາກປະເທດຈີນເຂົ້າປະກວດ ແລະ ນັກສະແດງຈາກແຜ່ນດິນໃຫຍ່ເຂົ້າຮ່ວມງານ”.

ທັງນີ້ ລາງວັນມ້າທອງຄຳ ຫຼື “ໂກເດັນ ຮອສ ອະວອດສ໌ (Golden Horse Awards)” ເຊິ່ງເປັນລາງວັນທີ່ມີຄຸນຄ່າປຽບເໝືອນ “ອອສກ້າຂອງຮູບເງົາຈີນ” ຈັດໂດຍຄະນະກຳມະການບໍລິຫານເທສະການຮູບເງົາມ້າທອງຄໍາໄທເປ ທີ່ມອບໃຫ້ແກ່ຜົນງານຮູບເງົາຈາກຈີນແຜ່ນດິນໃຫຍ່, ໄຕ້ຫວັນ, ຮ່ົງກົງ ແລະ ມາເກົ໊າ ໂດຍງານຈະຈັດຂື້ນໄລຍະເດືອນພະຈິກຂອງທຸກປີ ທີ່ອານຸສອນສະຖານຊຸນຢັດເຊັນ ໃນໄທເປ ແລະ ງານປີນີ້ຈະເປັນຄັ້ງທີ 56.

ເຖິງວ່າຜົນງານຈາກແຜ່ນດິນໃຫຍ່ສາມາດຄວ້າລາງວັນສໍາຄັນຂອງງານມາຢ່າງຕໍ່ເນື່ອງ ເມື່ອປີຜ່ານມາ ຈາງ ອີ້ໂໝ ໄດ້ຮັບລາງວັນຜູ້ກຳກັບດີເດັ່ນ ແລະ ລາງວັນຮູບເງົາດີເດັ່ນເປັນຜົນງານຈາກປະເທດຈີນເຊັ່ນກັນ ຄືຮູບເງົາ ” An Elephant Sitting Still”. ນອກຈາກນີ້, ນັກສະແດງ ສະວີ່ ເຈິ້ງ ນັກສະແດງໜຸ່ມຊາວຈີນ ຍັງສາມາດຄວ້າລາງວັນນັກສະແດງນໍາຊາຍດີເດັ່ນຈາກຜົນງານຮູບເງົາ ” Dying to Survive ” ອີກດ້ວຍ.

ຢ່າງໃດກໍ່ຕາມ ການທີ່ຜູ້ຮັບລາງວັນຫຼາຍຄົນໃນອີກຫຼາຍສາຂາທີ່ເປັນຊາວໄຕ້ຫວັນ ກ່າວເຖິງ “ປະເດັນທາງການເມືອງຂ້າມຊ່ອງແຄບ” ສ້າງສຽງວິພາກວິຈານຢ່າງໜັກ ແລະ ກາຍເປັນຂໍ້ໂຕ້ຖຽງກັນລະຫວ່າງນັກສະແດງ ແລະ ບຸກຄົນໃນວົງການບັນເທີງຈາກແຜ່ນດິນໃຫຍ່ຫຼາຍຄົນທີ່ໄປຮ່ວງານ ກັບ ນັກສະແດງ ແລະ ບຸກຄົນໃນວົງການບັນເທີງໄຕ້ຫວັນ.

ອີກປະການໜຶ່ງ “ຄວາມສໍາພັນຂ້າມຊ່ອງແຄບ ທີ່ໝາຍເຖິງການພົວພັນລະຫວ່າງຈີນ – ໄຕ້ຫວັນ ເປັນຄວາມລະອຽດອ່ອນຫຼາຍ ສຳລັບທັງສອງຝ່າຍ ແລະ ລັດຖະບານປັກກິ່ງໄດ້ປະກາດ ເມື່ອຕົ້ນເດືອນນີ້ ໂດຍການລະງັບການອອກໃບອະນຸຍາດໃຫ້ປະຊາຊົນ ໃນ 47 ເມືອງໃຫຍ່ ທີ່ຈະເດີນທາງໄປໄຕ້ຫວັນດ້ວຍຕົນເອງ ແມ່ນຕ້ອງເດີນທາງເປັນກຸ່ມກັບບໍລິສັດທ່ອງທ່ຽວເທົ່ານັ້ນ.