ນາກວ່າ 30 ເຮັກຕ້າ ແຂວງຊຽງຂວາງຖືກນໍ້າຖ້ວມ

204

ຫຼັງຈາກກົມອຸຕຸນິຍົມ ແລະ ອຸທົກກະສາດ ໄດ້ແຈ້ງເຕືອນກ່ຽວກັບພາຍຸເຂດຮ້ອນ ວິພາ ເຊິ່ງເປັນພາຍຸຫົວທີ 7 ປະຈຳປີ 2019 ທີ່ຈະເຄື່ອນທີ່ພັດຜ່ານພາກເໜືອ-ພາກກາງຂອງປະເທດລາວ ໃນໄລຍະວັນທີ 4-5 ສິງຫາ 2019 ເຮັດໃຫ້ມີຝົນຕົກ ໃນລະດັບຄ່ອຍຫາປານກາງເປັນບໍລິເວນກວ້າງ ແລະ ຕົກໜັກຢູ່ບາງທ້ອງຖິ່ນແຂວງພາກເໜືອລົງຫາ ພາກກາງ ແລະ ພາກໃຕ້.

ຫຼ້າສຸດ, ເມືອວັນທີ 4 ສິງຫາ ຜ່ານມາ ບັນດາແຂວງພາກເໜືອຂອງປະເທດລາວ ຫຼາຍແຂວງກຳລັງປະສົບກັບໄພນໍ້າຖ້ວມ, ດິນເຈື່ອນຖົມຖະໜົນເຮັດໃຫ້ການສັນຈອນຕິດຂັດ, ຂະນະທີ່ແຂວງຊຽງຂວາງ ກໍ່ໄດ້ຮັບຜົນກະທົບຈາກໄພພິບັດນີ້ເຊັ່ນດຽວກັນ.

ອີງຕາມການລາຍງານຂອງນັກຂ່າວທ້ອງຖິ່ນໃຫ້ຮູ້ວ່າ: ນ້ຳໄດ້ຂຶ້ນຖ້ວມບ້ານເຮືອນ, ໄຮ່ນາ ແລະ ສວນ ຂອງປະຊາຊົນເຂດລາດບວກ ເມືອງແປກ ແຂວງຊຽງຂວາງ ຢ່າງໜັກໜ່ວງ. ເຊິ່ງສາເຫດຂອງນ້ຳຂຶ້ນຖ້ວມຍ້ອນຝົນຕົກໜັກໃນຄ່ຳຄືນຂອງວັນທີ 3-4 ສິງຫາ 2019 ເຊິ່ງເຮັດໃຫ້ນ້ຳໄດ້ໄຫຼມາໂຮມໃສ່ນ້ຳງື່ມ ແລະ ນ້ຳປຽງ ເຂດລາດບວກ ເມືອງແປກ ແຂວງຊຽງຂວາງ ເຮັດໃຫ້ນ້ຳຍື່ງຂຶ້ນຢ່າງໄວວາໄຫຼເຂົ້າຖ້ວມບ້ານເຮືອນ, ໄຮ່ນາ-ຮົ້ວສວນ ກວມເອົາ 2 ບ້ານຄື: ບ້ານເປີບ, ບ້ານລາດບວກ ທີ່ຂຶ້ນນກັບເຂດລາດບວກ ເມືອງແປກ, ແຂວງຊຽງຂວາງເສຍຫາຍໜັກ.

ໃນນີ້, ມີເນື້ອທີ່ນາຖືກນ້ຳຖ້ວມແລ້ວເບື້ອງຕົ້ນ 30 ກ່ວາເຮັກຕາ, ສຳລັບຜົນເສຍຫາຍທັງໝົດແມ່ນຍັງຢູ່ໃນຂັ້ນຕອນການເກັບກຳຂໍ້ມູນຂອງພາກສ່ວນທີ່ກ່ຽວຂ້ອງຂອງແຂວງ, ເມືອງ. ເຊິ່ງພວກເຮົາຈະໄດ້ລາຍງານໃຫ້ທ່ານຊາບຕາມພາຍຫຼັງ