ອິນໂດ ເສຍຫາຍໜັກ ແຜ່ນດິນໄຫວໃກ້ກັບເກາະຊະວາ

167

ມີຜູ້ເສຍຊີວິດ 1 ຄົນ ແລະ ບ້ານເຮືອນກວ່າ 100 ຫຼັງ ໄດ້ຮັບຄວາມເສຍຫາຍ ຫຼັງເກີດແຜ່ນດິນໄຫວຮຸນແຮງ 6,8 ແມັກນິຈູດ ນອກຝັ່ງທາງທິດໃຕ້ຂອງເກາະຊະວາ ປະເທດອິນໂດເນເຊຍ.

ສຳນັກຂ່າວຕ່າງປະເທດລາຍງານຈາກນະຄອນຫຼວງຈາກາຕ້າ ປະເທດອິນໂດເນເຊຍ ເມື່ອວັນເສົາ ທີ 3 ສິງຫາ ກ່ຽວກັບຄວາມຄືບໜ້າ ຫຼັງຈາກສໍານັກງານສຳຫຼວດທໍລະນີວິທະຍາຈາກສະຫະລັດ ອາເມຣິກາ (USGS: U.S. Geological Survey) ໄດ້ລາຍງານວ່າ ເກີດເຫດແຜ່ນດິນໄຫວຮຸນແຮງ 6,8 ແມັກນິຈູດ ລະດັບຄວາມເລິກເກືອບ 53 ກິໂລແມັດ ນອກຝັ່ງແຂວງບັນເຕິນ ເທິງເກາະຊະວາ ທາງພາກຕາເວັນຕົກສຽງໃຕ້ຂອງອິນໂດເນເຊຍ  ເມື່ອກາງຄືນວັນສຸກ ຜ່ານມາ ຕາມເວລາທ້ອງຖິ່ນ ເຖິງວ່າສູນເຕືອນໄພຄື້ນສຶນາມິໃນມະຫາສະໝຸດປາຊີຟິກ (PTWC: Pacific Tsunami Warning Center) ບໍ່ໄດ້ປະກາດແຈ້ງເຝົ້າລະວັງ ແລະ ເຕືອນໄພຄື້ນສຶນາມິ ແຕ່ລາຍງານຂອງອົງການຈັດການໄພພິບັດແຫ່ງຊາດອິນໂດເນເຊຍ (NDMA: National Disaster Management Authority) ລະບຸ ຄວາມຮຸນແຮງຂອງແຜ່ນດິນໄຫວຄັ້ງນີ້ ສູງກ່ວາ 7,4 ແມັກນິຈູດ ຈຶ່ງໄດ້ແຈ້ງການເຝົ້າລະວັງ ແລະ ເຕືອນໄພຄື້ນສຶນາມິ  ພ້ອມທັງຂໍໃຫ້ປະຊາຊົນບາງສ່ວນອົບພະຍົບ ໂດຍຄໍາສັ່ງດັ່ງກ່າວໃຊ້ເວລາ 2 ຊົ່ວໂມງ ກ່ອນຈະຍົກເລີກ.

ຫຼັງຈາກນັ້ນ, ເຈົ້າໜ້າທີ່ໄດ້ລົງພື້ນທີ່ກວດກາຄວາມເສຍຫາຍ ພົບເຫັນເຮືອນ ແລະ ຕຶກອາຄານສິ່ງປຸກສ້າງຕ່າງໆ ຢ່າງໜ້ອຍ 113 ຫຼັງ ທັງໃນແຂວງບາເຕິນ ແລະ ແຂວງຊະວາຕາເວັນຕົກ ເຊິ່ງຢູ່ໃກ້ຄຽງ. ແຮງສັ່ນສະເທືອນຍັງສາມາດຮັບຮູ້ໄດ້ໄກເຖິງນະຄອນຫຼວງຈາກາຕ້າ ທີ່ຕັ້ງຢູ່ເກາະດຽວກັນ. ຂະນະທີ່ມີຜູ້ເສຍຊີວິດຢ່າງໜ່ອຍ 1 ຄົນ ຈາກໂຣກຫົວໃຈວາຍກະທັນຫັນ ແລະ ປະຊາຊົນຫຼາຍກວ່າ 1,000 ຄົນ ຕ້ອງອົບພະຍົບອອກໄປຢູ່ສູນພັກເຊົາຊົ່ວຄາວຂອງໜ່ວຍງານລັດຖະບານ ແລະ ໜ່ວຍງານທີ່ກ່ຽວຂ້ອງຈະດຳເນີນການຊ່ວຍເຫຼືອໃນຂັ້ນຕອນຕໍ່ໄປ.