ແມນເຊັສເຕີ ຢູໄນເຕັດ ປິດບັນຊີ ດຶງ ແມັກໄກວ ເສີມທີມ 85 ລ້ານປອນ

176

ແມນເຊັສເຕີ ຢູໄນເຕັດ ແລະ ເລສເຕີ ຊິຕີ້ ສອງສະໂມສອນຈາກພຣີເມຍ ລີກ ຂອງອັງກິດ ສາມາດຕົກລົງຄ່າຕົວຂອງ ແຮຣີ່ ແມັກໄກວ ກອງຫຼັງທີມຊາດອັງກິດ ໄດ້ແລ້ວ ຄາດ 85 ລ້ານປອນ ກາຍເປັນກອງຫຼັງທີ່ມີຄ່າຕົວແພງທີ່ສຸດໃນໂລກ.

ການເຈລະຈາ ລະຫວ່າງ ແມນຢູ ກັບ ເລສເຕີ ນັ້ນ ຍືດເຍື້ອມາດົນຫຼາຍເດືອນ ໂດຍສະເພາະບັນຫາຄ່າຕົວຂອງກອງຫຼັງທີມຊາດອັງກິດ ທີ່ແມນຢູ ຍື່ນໄປໃຫ້ ເລສເຕີ ຫຼາຍຄັ້ງ ແຕ່ກໍ່ບໍ່ກົງກັບຄວາມຕ້ອງການຂອງທີມທີ່ມີເຈົ້າຂອງເປັນມະຫາເສດຖີຈາກປະເທດໄທ.

ຈົນຫຼ້າສຸດ ເມື່ອຄໍ່າວັນສຸກ ລາຍງານຂ່າວຈາກຫຼາຍສໍານັກ ລະບຸວ່າ ທັງສອງສະໂມສອນ ກໍ່ສາມາດຕົກລົງຄ່າຕົວຂອງ ແມັກໄກວ ໄດ້ແລ້ວ ຄາດວ່າຈະປະມານ 85 ລ້ານປອນ (ປະມານ 890 ຕື້ກີບ).

ນອກຈາກຂ່າວທີ່ລາຍງານແລ້ວ ຄວາມເຊື່ອຖືຍິງເພິ່ມຂຶ້ນມາອີກ ເມື່ອ ເຄວກ ນໍວູດ ຊ່າງພາບປະຈຳສະໂມສອນແມນເຊັສເຕີ ຢູໄນເຕັດ ກໍ່ອອກມາຢືນຢັນອີກວ່າ “ທັງສອງທີມສາມາດຕົກລົງຄ່າຕົວກັນໄດ້ແລ້ວ ໂດຍຕົວນັກເຕະຈະເຂົ້າສູ້ຂັ້ນຕອນການກວດສະພາບຮ່າງກາຍ ໃນວັນເສົາ ທີ 3 ສິງຫານີ້ ທັນທີ”.

ຖ້າບັນລຸຂັ້ນຕອນທຸກຢ່າງລວມເຖິງສັນຍາສ່ວນໂຕລະຫວ່າງນັກເຕະ ກັບ ແມນຢູ ຈະເຮັດໃຫ້ ແມັກໄກວ ກາຍເປັນກອງຫຼັງທີ່ມີຄ່າຕົວແພງທີ່ສຸດໃນໂລກ ແຊງໜ້າ ເວີຈິລ ຟານໄດ ທີ່ຍ້າຍຈາກເຊົາແຮັມຕັນ ໄປ ລີເວີພູລ ຄ່າຕົວ 75 ລ້ານປອນ.