ພາກເໜືອ-ກາງ ກຽມຮັບມືພາຍຸ ວັນທີ 4-5 ສິງຫາ

211

ກົມອຸຕຸນິຍົມ ແລະ ອຸທົກກະສາດ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ອອກແຈ້ງເຕືອນ ໄພພາຍຸໝູນເຂດຮ້ອນ ສະບັບ2 ລົງວັນທີ 2 ສິງຫາ 2019 ວ່າ:

ພາຍຸໝູນເຂດຮ້ອນ ວິພາ ຫົວທີ 7 ປະຈຳປີ 2019 ໃນເວລາ 9:00 ໂມງເຊົ້າຂອງວັນທີ 2 ສິງຫາ 2019 ມີຈຸດສູນກາງຢູ່ເສັ້ນຂະໜານເລກທີ 21.2 ອົງສາເໜືອ ແລະ ເສັ້ນແວງທີ 108.8 ອົງສາຕາເວັນອອກ ໄດ້ເຄື່ອນທີ່ເຂົ້າຝັ່ງທາງພາກເໜືອຂອງປະເທດຫວຽດນາມ ຢ່າງຊາໆ ແລະ ພາຍຸຫົວນີ້ຈະເຄື່ອນທີ່ເຂົ້າຜ່ານພາກເໜືອ ຫາ ພາກກາງຂອງປະເທດລາວ ໃນໄລຍະວັນທີ 4-5 ສິງຫາ 2019 ເຊິ່ງຈະເຮັດໃຫ້ມີຝົນຕົກ, ຟ້າຮ້ອງ, ຟ້າເຫຼື້ອມໃນລະດັບຄ່ອຍຫາປານກາງ ເປັນບໍລິເວນກວ້າງ ແລະ ຕົກໜັກຢູ່ບາງທ້ອງຖິ່ນແຂວງພາກເໜືອລົງຫາ ພາກກາງ ແລະ ພາກໃຕ້.

ດັ່ງນັນ, ຈຶ່ງແຈ້ງເຕືອນເຖິງອຳນາດການປົກຄອງທຸກພາກສ່ວນ ແລະ ປະຊາຊົນບັນດາເຜົ່າທີ່ອາໄສຢູ່ບັນດາແຂວງ ຜົ້ງສາລີ, ຫົວພັນ, ຊຽງຂວາງ, ຫຼວງນໍເາທາ, ອຸດົມໄຊ, ບໍ່ແກ້ວ, ຫຼວງພະບາງ, ໄຊຍະບູລີ, ໄຊສົມບູນ, ວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ ນັບທັງນະຄອນຫຼວງວຽງຈັນ, ສາລະວັນ, ຈຳປາສັກ, ເຊກອງ ແລະ ອັດຕະປື ໃຫ້ມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ, ນໍ້າຖ້ວມຊຸ, ນໍ້າຖ້ວມອັ່ງ . ສຳລັບຜູ້ທີ່ຈະເດີນທາງໄປພາກເໜືອໃຫ່ມີສະຕິລະມັດລະວັງຕໍ່ສະພາບດິນເຈື່ອນ ແລະ ຂໍໃຫ້ຕິດຕາມຂ່າວພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະສາດ ໃນໄລຍະ 1 ຫາ 3 ວັນຕໍ່ໜ້ານີ້.

ຂໍ້ມູນຈາກ: ກົມອຸຕຸນິຍົມ