ທຣໍາ ສັ່ງຂຶ້ນພາສີສິນຄ້າຈາກຈີນ 10% ເລິ່ມ 1 ກັນຍາ ເປັນຕົ້ນໄປ

178

ປະທານາທິບໍດີໂດນັລ ທຣຳ ປະກາດ ກຽມຂຶ້ນພາສີ 10% ຕໍ່ຜະລິດຕະພັນຂອງຈີນ ມູນຄ່າເກືອບ 2,6 ລ້ານຕື້ກີບ ຕັ້ງແຕ່ວັນທີ 1 ກັນຍາ ຫຼັງຈາກການເຈລະຈາຢູ່ຊຽງໄຮ້ “ບໍ່ຄືບໜ້າ” ແລະ ຜູ້ນຳສະຫະລັດ ໄດ້ກ່າວຫາລັດຖະບານປັກກິ່ງ ເປັນຝ່າຍ “ຜິດສັນຍາ” ກ່ຽວກັບການຊື້ສິນຄ້າກະສິກຳ.

ສຳນັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ສະຫະລັດ ອາເມຣິກາ ເມື່ອວັນທີ 1 ສິງຫາ ວ່າ ປະທານາທິບໍດີໂດນັລ ທຣຳ ໄດ້ຂຽນຂໍ້ຄວາມລົງໃນທະວິດເຕີ ສື່ສັງຄົມອອນໄລນ໌ ເມື່ອວັນພະຫັດ ວ່າ ນັບຕັ້ງແຕ່ວັນທີ 1 ກັນຍາ ເປັນຕົ້ນໄປ ສິນຄ້າທີ່ນຳເຂົ້າຈາກປະເທດຈີນ ມູນຄ່າ 300.000 ລ້ານໂດລາ (ປະມານ 2.599.000 ຕື້ກີບ) ຕ້ອງໄດ້ເສຍອາກອນເພິ່ມຕື່ມ 10% ໂດຍກຳແພງພາສີດັ່ງກ່າວເປັນຄົນລະສ່ວນຈາກອັດຕາ 25% ທີ່ ບັງຄັບໃຊ້ກັບສິນຄ້ານຳເຂົ້າຈາກປະເທດຈີນ ມູນຄ່າ 250.000 ລ້ານໂດລາ (ປະມານ 2.166.000 ລ້ານຕື້ກີບ) ເຊິ່ງ ທຣໍາ ໃຫ້ເຫດຜົນໃນການກຽມຂຶ້ນພາສີສິນຄ້າຂອງຈີນອີກ ວ່າ  ເປັນຍ້ອນການເຈລະຈາຄັ້ງຫຼ້າສຸດ ທີ່ນະຄອນຊຽງໄຮ້ ໃນອາທິດນີ້ “ເກືອບບໍ່ມີຄວາມຄືບໜ້າ” ແລະ ຈີນ “ເປັນຝ່າຍຜິດສັນຍາ” ໃນການເພິ່ມປະລິມານນໍາເຂົ້າສິນຄ້າກະສິກຳຈາກສະຫະລັດ.

ຂະນະທີ່ ບັນດານັກລົງທືນໄດ້ສະແດງປະຕິກິລິຍາທາງລົບຢ່າງຊັດເຈນ ຕໍ່ການປະກາດຂອງທຣໍາ ທີ່ໄດ້ກ່າວດ້ວຍວ່າ “ສະຫະລັດຄວນເຮັດແນວນີ້ ກັບຈີນມາຕັ້ງແຕ່ດົນແລ້ວ” ເນື່ອງຈາກເຊື່ອວ່າລັດຖະບານປັກກິ່ງຈະຕ້ອງຕອບໂຕ້ “ໃນລະດັບດຽວກັນ” ແລະ ທຣໍາ ກັບ ປະທານປະເທດສິ ຈິ້ນຜິງ ຫາກໍ່ຕົກລົງ “ສະຫງົບສົງຄາມການຄ້າ” ຮອບໃໝ່ ເມື່ອທ້າຍເດືອນມິຖຸນາ ຜ່ານມາ. ໂດຍດັດຊະນີອຸດສາຫະກຳ ດາວໂຈນສ໌ ປິດຕະຫຼາດຊື້-ຂາຍຫຼຸດລົງ 1% ສ່ວນດັດຊະນີ S&P 500 ປິດຕະຫຼາດຫຼຸດລົງເກືອບ 1% ສ່ວນສັນຍາຊື້-ຂາຍນໍ້າມັນດິບເບຣນ (Brent Crude) ທະເລເໜືອລອນດອນ ລາຄາຕົກໄລຍະໜຶ່ງຂອງການຊື້-ຂາຍ ຫຼາຍເຖິງ 7% ຕໍ່າທີ່ສຸດ ນັບຕັ້ງແຕ່ເດືອນກຸມພາ ປີ 2016.

ດ້ານສະພາການຄ້າຂອງສະຫະລັດ ອາເມຣິກາ ເຊິ່ງມີສະມາຊິກເປັນຜູ້ປະກອບການ ຕັ້ງແຕ່ທະລຸກິດຂະໜາດໃຫຍ່ ໄປຈົນເຖິງຂະໜາດຍ່ອຍ ຫຼາຍກວ່າ 3 ລ້ານແຫ່ງໃນປະເທດ ອອກຖະແຫຼງການຄັດຄ້ານທຣໍາ ທີ່ປະກາດກຽມຂຶ້ນພາສີສິນຄ້າຈາກຈີນ ວ່າ ຜູ້ຜະລິດຈາກທຸກພາກສ່ວນ ໂດຍສະເພາະ ພາກກະສິກໍາ ແລະ ຜູ້ບໍລິໂພກ ໃນສະຫະລັດກໍ່ຈະໄດ້ຮັບຜົນກະທົບເຊັ່ນກັນ ພ້ອມທັງຈະສົ່ງຜົນກະທົບຕໍ່ການເຕີບໂຕຂອງເສດຖະກິດຂອງສະຫະລັດ ຫຼັງຈາກທະນາຄານກາງສະຫະລັດ (Fed: Federal Reserve (System)) ໄດ້ປັບຫຼຸດອັດຕາດອກເບ້ຍນະໂຍບາຍເປັນຄັ້ງທຳອິດ ໃນຮອບເກືອບ 11 ປີ ເມື່ອວັນພຸດ ຫຼຸດລົງ 0.25% ເຫຼືອຢູ່ລະຫວ່າງ 2.0% – 2.25% ແລະ ໃຫ້ເຫດຜົນດ້ວຍ ວ່າ ຄວາມຂັດແຍ່ງທາງການຄ້າ ລະຫວ່າງ ສະຫະລັດ ກັບ ຈີນ ຖືເປັນໜຶ່ງໃນປັດໄຈສຳຄັນ.