ຟິລິບປິນ ອະນຸມັດງົບ ສ້າງສະໜາມບິນມະນີລາ ແຫ່ງທີ 2

189

ລັດຖະບານຟີລິບປິນໄດ້ອະນຸມັດແຜນການກໍ່ສ້າງສະໜາມບິນສາກົນແຫ່ງໃໝ່ ໃນເຂດຊານເມືອງມະນິລາ ເມື່ອວັນພຸດ ເພື່ອຫຼຸດຜ່ອນຄວາມແອອັດຂອງສະໜາມບິນໃຫຍ່ ໃນປັດຈຸບັນ.

ສໍານັກຂ່າວເອເອັຟພີ ລາຍງາຍຈາກນະຄອນຫຼວງມະນິລາ ປະເທດຟີລິບປິນ ເມືອວັນພຸດ ທີ 31 ກໍລະກົດ ວ່າ ບໍລິສັດຊານ ມິເກລ ຂອງປະເທດຟິລິບປິນ ຈະເປັນຜູ້ຮັບເໝົາກໍ່ສ້າງສະໜາມບິນແຫ່ງໃໝ່ ໃນເມືອງບູລາກັນ ປະມານ 35 ກິໂລແມັດ ທາງທິດເໜືອຂອງນະຄອນຫຼວງມະນິລາ ໂດຍຈະມີຣັນເວຮອງຮັບທາງແລ່ນຂຶ້ນ-ແລ່ນລົງ 4 ຣັນເວ ຂະໜານກັນ ແລະ ສາມາດຮອງຮັບຜູ້ໂດຍສານໄດ້ປະມານ 100 – 200 ລ້ານຄົນຕໍ່ປີ.

ຖະແຫຼງການຂອງທ່ານອາເທີ ທູກາເດ້ ລັດຖະມົນຕີກະຊວງຄົມມະນາຄົມຂອງຟີລິບປິນ ເມື່ອວັນພຸດ ກ່າວວ່າ ສະໜາມບິນສາກົນແຫ່ງໃໝ່ ຈະຊ່ວຍຫຼຸດຜ່ອນຄວາມແອອັດຂອງສະໜາມບິນນານາຊາດນິນອຍ ອາຄີໂນ ໃນນະຄອນຫຼວງມະນິລາ.

ຊານ ມິເກລ ເປັນບໍລິສັດດຽວ ທີ່ຍື່ນການປະມູນໂຄງການ ຈະເລິ່ມການກໍ່ສ້າງໂຄງການມູນຄ່າ 14 ຕື້ໂດລາ (ປະມານ 122.700 ຕື້ກີບ) ກ່ອນໝົດປີນີ້ ແລະ ກຳນົດແລ້ວສຳເລັດບໍ່ໃຫ້ກາຍປີ 2025.

ການບໍລິຫານຂອງຊານ ມິເກລ ໄດ້ເປີດເຜີຍກ່ອນໜ້ານີ້ ວ່າ ບໍລິສັດມີແຜນບໍລິຫານຈັດການສະໜາມ ບິນແຫ່ງໃໝ່ ເຊິ່ງຈະເປັນໂຄງການສາທາລະນູປະໂພກຂະໜາດໃຫຍ່ທີ່ສຸດ ພາຍໃຕ້ລັດຖະບານຂອງປະທານາທິບໍດີໂຣດຣິໂກ ດູເຕເຕ ຜູ້ນຳປະເທດຟິລິບປິນ ຄົນປັດຈຸບັນ ພາຍຫຼັງທີ່ໄດ້ຮັບການສຳ ປະທານຈາກລັດຖະບານແລ້ວ.

ສະໜາມບິນຫຼັກຂອງນະຄອນຫຼວງມະນິລາໃນປັດຈຸບັນ ເຊິ່ງມີເສັ້ນທາງແລ່ນ 2 ຣັນເວ ຮອງຮັບຍົນໂດຍສານໄດ້ເກືອບ 260.000 ຖ້ຽວ ແລະ ຜູ້ໂດຍສານປີລະ 45 ລ້ານຄົນ ເມື່ອປີຜ່ານມາ.

ການປະກາດອະນຸມັດຂອງລັດຖະບານ ມີຂຶ້ນຫຼັງໄລຍະການຊື້-ຂາຍ ໃນຕະຫຼາດຫຼັກຊັບນະຄອນຫຼວງມະນິລາ ເຊິ່ງຫຸ້ນຂອງບໍລິສັດຊານ ມິເກລ ເພິ່ມສູງຂື້ນ 1,19% ມາປິດທີ່ 178,00 ເປໂຊ (ປະມານ 30.000 ກີບ).