ລົດເມໂດຍສານອັຟການິສຖານ ຢຽບກັບລະເບີດ ເສຍຊີວິດ 34 ຄົນ

184

ລົດເມໂດຍສານສາຍລະຫວ່າງແຂວງໃນອັຟການິສຖານ ແລ່ນຢຽບກັບລະເບີດທີ່ຄົນຮ້າຍໄດ້ຝັງໄວ້ຢູ່ເສັ້ນທາງຫຼວງ ທາງພາກຕາເວັນຕົກ ເມື່ອໄລຍະເຊົ້າວັນພຸດ ເຮັດໃຫ້ມີຜູ້ເສຍຊີວິດຢ່າງໜ້ອຍ 34 ຄົນ ບາດເຈັບ 17 ຄົນ ສ່ວນຫຼາຍເປັນແມ່ຍິງ ແລະ ເດັກນ້ອຍ.

ສຳນັກຂ່າວຣອຍເຕີ ແລະ ເອເອັຟພີ ລາຍງານຈາກນະຄອນຫຼວງຄາບູລ ປະເທດອັຟການິສຖານ ເມື່ອວັນພຸດ ທີ 31 ກໍລະກົດ ວ່າ ຄວາມໝັ້ນຄົງກໍາລັງເຊື່ອມໂຊມລົງທົ່ວປະເທດອັຟການິສຖານ ນັກຮົບກຸ່ມຕາລີບັນ ແລະ ກຸ່ມໄອເອັສ ກໍ່ຄວາມບໍ່ສະຫງົບໂຈມຕີເຈົ້າໜ້າທີ່ ແລະ ປະຊາຊົນເກືອບທຸກມື້.

ກັບດັກລະເບີດໂຈມຕີໃສ່ລົດເມໂດຍສານ ທີ່ຖະໜົນທາງຫຼວງ ລະຫວ່າງ ແຂວງເຮຣາດ ກັບ ແຂວງກັນດະຮາ ໃນເຂດແຂວງຟາຣາ ເມື່ອເວລາປະມານ 6:00 ໂມງເຊົ້າວັນພຸດ ຕາມເວລາທ້ອງຖິ່ນ ທ່ານ ມູຮິບຸລເລາະ ມູຮິບ ໂຄສົກສຳນັກງານຕຳຫຼວດແຂວງຟາຣາ ເປີດເຜີຍວ່າ ມີຜູ້ເສຍຊີວິດ 34 ຄົນ ບາດເຈັບ 17 ຄົນ ທັງໝົດເປັນປະຊາຊົນ ເຊິ່ງສ່ວນຫຼາຍແມ່ນເດັກນ້ອຍ ແລະ ແມ່ຍິງ.

ເບື້ອງຕົ້ນ ຍັງບໍ່ມີກຸ່ມໃດອອກມາປະກາດຄວາມຮັບຜິດຊອບ ຂະນະທີ່ ທ່ານນາສຣັດ ຣໍຮິມ ໂຄສົກກະຊວງພາຍໃນຂອງອັຟການິສຖານ ກ່າວປະນາມ “ຄວາມໂຫດຮ້າຍປ່າເຖື່ອນຂອງພວກກໍ່ການຮ້າຍ” ສ່ວນທ່ານເຊດິກ ເຊດິກກີ ໂຄສົກປະຈໍາທໍານຽບປະທານາທິບໍດີ ກ່າວວ່າ ເຫດການເສົ້າສະຫຼົດໃນຄັ້ງນີ້ແມ່ນກຸ່ມຕາລີບັນເປັນຜູ້ກໍ່ເຫດ.

ເຫດລະເບີດ ເມື່ອວັນພຸດ ໄດ້ເກີດຂຶ້ນ ກ່ອນການເລືອກຕັ້ງ ປະທານາທິບໍດີອັຟການິສຖານ ໃນເດືອນໜ້າ ຂະນະທີ່ຕົວແທນຂອງລັດຖະບານສະຫະລັດ ແລະ ກຸ່ມຕາລີບັນ ກຳລັງສືບຕໍ່ການເຈລະຈາສັນຕິພາບ ທີ່ນະຄອນຫຼວງໂດຮາ ປະເທດກາຕ້າ ໃນຕາເວັນອອກກາງ ເຊິ່ງມີປະເດັນຫຼັກຄືການກຳນົດກອບເວລາ ຖອນກໍາລັງທະຫານອາເມລິກາອອກຈາກປະເທດອັຟການິສຖານ.