ປະຊາຊົນເມືອງນານ ທີ່ໄດ້ຮັບຜົນກະທົບນໍ້າຖ້ວມກະທັນຫັນ ຍັງຂາດແຄນສິ່ງຂອງຈຳເປັນ

167

ພາຍຫຼັງນໍ້ານານໄດ້ໄຫຼເຂົ້າຖ້ວມບ້ານເຮືອນ ແລະ ພື້ນທີ່ທຳການຜະລິດຂອງປະຊາຊົນ ຕາມລ້ອງແມ່ນ້ຳນານ ໃນຕອນເຊົ້າຂອງວັນທີ 30 ກໍລະກົດ ເວລາປະມານ 7 ໂມງ ຜ່ານມາສົ່ງຜົນກະທົບ 8 ບ້ານ 372 ຄອບຄົວ ເຊັ່ນ: ບ້ານນາຝາຍ 4 ຄອບຄົວ, ບ້ານປ່າໄຜ່ 35 ຄອບຄົວ, ບ້ານສີມຸງຄຸນ 35 ຄອບຄົວ, ບ້ານສີບຸນເຮືອງ 130 ຄອບຄົວ, ບ້ານນາເລົາ 120 ຄອບຄົວ, ບ້ານໂພນຫີນ 10 ຄອບຄົວ, ບ້ານນາເຄີນ 37 ຄອບຄົວ ແລະບ້ານທາດ 1 ຄອບຄົວ, ທີ່ຖືກຜົນກະທົບໜັກ ປະຊາຊົນບາງຄອບຄົວໄດ້ພຽງເຄື່ອງນຸ່ງຄາຄີງ ແລະມີບາງຄົນຍັງຕິດຢູ່ໃນເຮືອນ.

ເຫດການຄັ້ງນີ້ ໄດ້ສ້າງຄວາມເສຍຫາຍຫຼາຍກວ່າປີຜ່ານມາ ໂຊກດີບໍ່ມີຄົນເສຍຊີວິດ ມີພຽງຜູ້ໄດ້ຮັບບາດເຈັບເທົ່ານັ້ນ ສ່ວນຂໍ້ມູນຄວາມເສຍຫາຍຍັງຢູ່ໃນຂັ້ນຕອນການເກັບກຳຂໍ້ມູນ, ເບື້ອງຕົ້ນອົງການປົກຄອງເມືືອງ ໄດ້ສົ່ງກຳລັງເຈົ້າໜ້າທີ່ທະຫານ-ຕໍາຫຼວດ ຂອງກອງບັນຊາການເມືອງ ເຂົ້າຊ່ວຍເຫຼືອປະຊາຊົນທີ່ຕິດຄ້າງຢູ່ໃນເຮືອນ, ພ້ອມທັງຊ່ວຍປ້ອງກັນຜົນກະທົບໃຫ້ບາງຄອບຄົວ ແລະ ຈັດຕັ້ງການປ້ອງກັນເວນຍາມ ເຝົ້າລະວັງຕະຫຼອດ 24 ຊົ່ວໂມງ ເນື່ອງຈາກຝົນຍັງສືບຕໍ່ຕົກ.

ສ່ວນລະດັບນ້ຳໄດ້ຫຼຸດລົງເກືອບເຂົ້າສູ່ພາວະປົກກະຕິ, ປະຊາຊົນບາງຄອບຄົວໄດ້ຮັບການເບິ່ງແຍງຢ່າງໃກ້ສິດຈາກອົງການປົກຄອງເມືອງ. ປັດຈຸບັນປະຊາຊົນຜູ້ມີເງື່ອນໄຂ ໄດ້ເຂົ້າອະນາໄມເຮືອນຂອງຕົນ ໂດຍສົມທົບກັບເຈົ້າໜ້າທີ່ຕໍາຫຼວດ, ທະຫານເມືອງ ແລະ ທະຫານຈາກກອງພັນ 414 ກອງບັນຊາການທະຫານແຂວງເຂົ້າຊ່ວຍ. ແຕ່ສິ່ງທີ່ປະຊາຊົນຕ້ອງການທີ່ຮີບດ່ວນ ແມ່ນເຄື່ອງນຸ່ງຫົ່ມ, ສະບຽງອາຫານ ແລະ ນ້ຳດື່ມ ເພື່ອບັນເທົາໄພເບື້ອງຕົ້ນ.

ເມືອງຕອນແລງ ວັນອັງຄານ ທີ 30 ກໍລະກົດ ຜ່ານມາ ໄດ້ຮັບການຊ່ວຍເຫຼືອເບື້ອງຕົ້ນຈາກອົງການປົກຄອງແຂວງໄຊຍະບູລີ ເປັນເງິນສົດ 5 ລ້ານກີບ ແລະ ອົງການປົກຄອງເມືອງໄຊຍະບູລີ ມອບນ້ຳດື່ມ ແລະ ໝີ່ສຳເລັດຮູບ ມູນຄ່າ 2,4 ລ້ານກີບ. ປັດຈຸບັນ ອົງການປົກຄອງແຂວງຫຼວງພະບາງ ໄດ້ຕັ້ງ ຈຸດຮັບເຄື່ອງບໍລິຈາກ ຢູ່ຫ້ອງວ່າການປົກຄອງແຂວງ ພ້ອມນີ້ ຫຼາຍພາກສ່ວນໃນສັງຄົມ ກໍ່ໄດ້ຈັດຕັ້ງກຸ່ມລະດົມການບໍລິຈາກ ເພື່ອນຳເຄື່ອງໄປມອບບັນເທົາໄພ ໃຫ້ປະຊາຊົນໃນໄວໆນີ້.