ເກີດເຫດຊຸກເດັກນ້ອຍ ໃຫ້ລົດໄຟຢຽບ ຢູ່ສະຖານີແຟຣງເຟີດ

166

ເດັກຊາຍອາຍຸ 8 ປີ ເສຍຊີວິດ ເມື່ອວັນຈັນ ຫຼັງຈາກມີຊາຍຜູ້ກໍ່ເຫດຄົນໜຶ່ງໄດ້ຊຸກເດັກນ້ອຍ ແລະ ແມ່ ຕົກລົງໄປໃນລາງລົດໄຟ ຂະນະທີ່ລົດໄຟກໍາລັງແລ່ນເຂົ້າມາຈອດຢູ່ສະຖານີລົດໄຟແຟຣັງເຟີດ ປະເທດເຢຍລະມັນ ເຮັດໃຫ້ເດັກຄົນດັ່ງກ່າວຖືກຢຽບ ສ່ວນຜູ້ກໍ່ເຫດຖືກຈັບຕົວໄວ້ໄດ້.

ສຳນັກຂ່າວເອເອັຟພີ ລາຍງານຈາກເມືອງແຟຣັງເຟີດ ປະເທດເຢຍລະມັນ ເມືອວັນອັັງຄານ ທີ 30 ກໍລະກົດ ວ່າ ໂຄສົກ ຕຳຫຼວດເຢຍລະມັນກ່າວວ່າ ຜູ້ຕ້ອງສົງໄສແມ່ນຊາຍໜຸ່ມ ອາຍຸ 40 ປີ ເຊື້ອສາຍອາຟຣິກັນ ເຊິ່ງບໍ່ມີສ່ວນກ່ຽວຂ້ອງກັບຜູ້ເຄາະຮ້າຍສອງແມ່ລູກ ໄດ້ແລ່ນໜີ ຫຼັງຈາກກໍ່ເຫດຊຸກເດັກຊາຍ ອາຍຸ 8 ປີ ແລະ ແມ່ ອາຍຸ 40 ປີ ຕົກລົງໄປໃນລາງລົດໄຟເພື່ອໃຫ້ລົດຢຽບ ຂະນະທີ່ລົດໄຟຄວາມໄວສູງໄອຊີອີ ກຳລັງແລ່ນເຂົ້າມາຈອດໃນສະຖານີລົດໄຟແຟຣັງເຟີດ ເມື່ອວັນຈັນ ຜ່ານມາ ແຕ່ພົນລະເມືອງດີໄດ້ຊ່ວຍຈັບກຸມຜູ້ກໍ່ເຫດແລ້ວສົ່ງໃຫ້ເຈົ້າໜ້າທີ່ຕຳຫຼວດ.

ໂຄສົກຕຳຫຼວດໄດ້ກ່າວຕໍ່ໄປວ່າ ເດັກຊາຍອາຍຸ 8 ປີ ໄດ້ເສຍຊີວິດ ແລະ ແມ່ຂອງເດັກລອດຊີວິດໄດ້ຫວຸດຫວິດບໍ່ຖືກລົດໄຟຢຽບ ແຕ່ໄດ້ຮັບບາດເຈັບຖືກນໍາສົ່ງໄປໂຮງໝໍ ສ່ວນຕຳຫຼວດໄດ້ສືບສວນຄະດີດັ່ງກ່າວວ່າ ເປັນຄະດີອາຍາ ເພື່ອຕັ້ງຂໍ້ຫາຄາດຕະກໍາກັບຊາຍຜູ້ຕ້ອງສົງໄສກໍ່ເຫດ ແລະ ຍັງສອບສວນຜູ້ ເພື່ອຫາແຮງຈູງໃຈ.