ລາວ ຈະມີສູນບໍລິການໃຫ້ຄໍາປຶກສາດ້ານຄວາມປອດໄພຂອງລະບົບເຕັກໂນໂລຊີຂໍ້ມູນ – ຂ່າວສານ

178

ກົມເຕັກໂນໂລຊີ ດິຈິຕອລ ກະຊວງວິທະຍາສາດ ແລະ ເຕັກໂນໂລຊີ ( ກວຕ ) ຮ່ວມກັບ ບໍລິສັດ ເຈແອລເອັສ ໄອທີໂຊລູເຊິນ ຈໍາກັດ ເຊັນສັນຍາວ່າດ້ວຍການຮ່ວມມືສ້າງສູນບໍລິການໃຫ້ຄຳປຶກສາດ້ານຄວາມປອດໄພຂອງລະບົບເຕັກໂນໂລຊີຂໍ້ມູນ – ຂ່າວສານ ເພື່ອສົ່ງເສີມເຮັດໃຫ້ການນໍາໃຊ້ລະບົບໄອທີ – ດິຈິຕອລ ຢັ້ງຢືນຄວາມປອດໄພດ້ານໄອທີຕາມມາດຕະຖານສາກົນ.

ທ່ານ ສຸລິຍາ ແສງດາລາວົງ ຮອງຫົວໜ້າກົມເຕັກໂນໂລຊີດິຈິຕອລ ກະຊວງ ກວຕ ກ່າວວ່າ: ການເຊັນສັນຍາໃນຄັ້ງນີ້ເປັນການຜັນຂະຫຍາຍບົດບັນທຶກຄວາມເຂົ້າໃຈ ວ່າດ້ວຍການສຶກສາຄວາມເປັນໄປໄດ້ໃນການສ້າງ ແລະ ພັດທະນາຄວາມປອດໄພຂອງລະບົບເຕັກໂນໂລຊີຂໍ້ມູນ – ຂ່າວສານທີ່ໄດ້ລົງນາມນັບແຕ່ປີ 2017 ເປັນຕົ້ນມາ.

ຜ່ານການສຶກສາຂໍ້ມູນເບື້ອງຕົ້ນເຫັນວ່າ: ບໍລິສັດ/ຜູ້ປະກອບການທີ່ໃຫ້ບໍລິການດ້ານລະບົບໄອທີ, ອິນເຕີເນັດ, ໂທລະຄົມ ຫຼື ສະຖາບັນການເງິນໃນລາວ ຍັງບໍ່ທັນໃຫ້ຄວາມສໍາຄັນດ້ານລະບົບຄວາມປອດໄພເທົ່າທີ່ຄວນ ແລະ ຍັງບໍ່ທັນໄດ້ຮັບການຢັ້ງຢືນມາດຕະຖານຄວາມປອດໄພຂອງລະບົບໄອທີ ( ISO:27001 ) ແລະ ISO ອື່ນໆກ່ຽວຂ້ອງ ເຊິ່ງເປັນຊ່ອງວ່າງໃຫ້ກຸ່ມຄົນບໍ່ດີສາມາດເຈາະລະບົບເພື່ອໂຈນລະກໍາຂໍ້ມູນສໍາຄັນຂອງອົງກອນ, ລະບົບຄອມພິວເຕີຂອງທະນາຄານ – ສະຖາບັນການເງິນອື່ນໆທີ່ຈະສ້າງຄວາມເສຍຫາຍຕໍ່ຊັບສິນອົງກອນລັດ, ເອກະຊົນ ກໍຄືສັງຄົມຈໍານວນບໍ່ໜ້ອຍ.

ທ່ານຮອງຫົວໜ້າກົມເຕັກໂນໂລຊີດິຈິຕອລ ຍັງອະທິບາຍໃຫ້ຮູ້ຕື່ມອີກ ວ່າ: ການຮ່ວມມືກັບ ບໍລິສັດ ເຈແອລເອັສ ເພື່ອສ້າງສູນບໍລິການໃຫ້ຄຳປຶກສາດ້ານຄວາມປອດໄພຂອງລະບົບເຕັກໂນໂລຊີຂໍ້ມູນ – ຂ່າວສານ ຈະເຮັດໃຫ້ສັງຄົມໄດ້ນໍາໃຊ້ລະບົບໄອທີ – ດິຈິຕອລທີ່ມີຄວາມປອດໄພສູງຂຶ້ນ ເຊິ່ງສູນດັ່ງກ່າວຈະເຮັດໜ້າທີ່ຕົ້ນຕໍ ຄື: 1). ຄົ້ນຄວ້າ ແລະ ພັດທະນາລະບົບຄວາມປອດໄພທາງດ້ານໄອທີ ເຊິ່ງປະກອບມີ: ນິຕິກໍາ, ລະບຽບການກ່ຽວຂ້ອງ, ນະໂຍບາຍສົ່ງເສີມ ແລະ ລະບົບເຕັກນິກ; 2). ໃຫ້ຄໍາປຶກສາ ແລະ ຝຶກອົບຮົມກ່ຽວກັບຄວາມປອດໄພທາງດ້ານໄອທີໃຫ້ໄດ້ຕາມມາດຕະຖານສາກົນ ( ISO:27001 ) ແລະ ISO ອື່ນໆກ່ຽວຂ້ອງ; 3). ທົດສອບຄວາມປອດໄພລະບົບໄອທີ ( Pen – Test); 4). ນໍາສະເໜີຂໍການຢັ້ງຢືນຄວາມປອດໄພດ້ານໄອທີຕາມມາດຕະຖານສາກົນ ຈາກໜ່ວຍງານທີ່ກ່ຽວຂ້ອງພາຍໃນ ແລະ ຕ່າງປະເທດ.

ໂອກາດນີ້, ທ່ານ ວົງພູທອນ ສີຈັນທະລາດ ປະທານ ບໍລິສັດ ເຈແອລເອັສ ໄອທີໂຊລູເຊິນ ຈໍາກັດ ກ່າວຕື່ມອີກວ່າ: ວຽກງານດັ່ງກ່າວທາງບໍລິສັດພວກເຮົາໄດ້ມີການສຶກສາຄວາມເປັນໄປໄດ້ໃນການສ້າງ ແລະ ພັດທະນາ ຄວາມປອດໄພຂອງລະບົບເຕັກໂນໂລຊີຂໍ້ມູນ – ຂ່າວສານ ນັບແຕ່ປີ 2017 ເປັນຕົ້ນມາ; ມາຮອດປັດຈຸບັນພວກເຮົາມີຄວາມພ້ອມໃນທຸກດ້ານ ແລະ ເຊື່ອໝັ້ນວ່າໂຄງການຮ່ວມມືໃນຄັ້ງນີ້ຈະສໍາເລັດຕາມຄາດໝາຍທີ່ວາງໄວ້ ເນື່ອງຈາກບໍລິສັດຈະໃຫ້ຄວາມສໍາຄັນທາງດ້ານ Cyber Security ເປັນສິ່ງສໍາຄັນທີ່ສຸດ. ພ້ອມກັນນັ້ນ, ພວກເຮົາກໍມີບົດຮຽນຜ່ານການສຶກສາຄົ້ນຄວ້າ ແລະ ຮ່ວມມືກັບຫຼາຍບໍລິສັດໄອທີ ຜູ້ທີ່ມີຊື່ສຽງທັງພາຍໃນ ແລະ ຕ່າງປະເທດ.

ພິທີເຊັນສັນຍາດັ່ງກ່າວ, ຈັດຂຶ້ນໃນວັນທີ 25 ກໍລະກົດ 2019 ຜ່ານມາ ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ເປັນການລົງນາມຮ່ວມກັນຂອງ ທ່ານ ແກ້ວລະຄອນ ໄຊສຸລຽນ ຫົວໜ້າກົມເຕັກໂນໂລຊີ ດິຈິຕອລ ກັບ ທ່ານ ວົງພູທອນ ສີຈັນທະລາດ ປະທານ ບໍລິສັດ ເຈແອລເອັສ ໄອທີໂຊລູເຊິນ ຈໍາກັດ ໂດຍໃຫ້ກຽດເຂົ້າຮ່ວມຂອງ ທ່ານ  ບໍ່ວຽງຄໍາ ວົງດາລາ ລັດຖະມົນຕີກະຊວງ ກວຕ, ມີບັນດາຮອງລັດຖະມົນຕີ, ກົມກອງອ້ອມຂ້າງ ແລະ ແຂກຖືກເຊີນເຂົ້າຮ່ວມ.

Credit: Laoedaily