ສຣີລັງກາ ສົ່ງຂີ້ເຫຍື້ອພິດຄືນສະຫະຣາຊະອານາຈັກ

190

ລັດຖະບານສຣີລັງກາ ສົ່ງຕູ້ຄອນເທນເນີ ບັນຈຸ “ຂີ້ເຫຍື້ອພິດ” 111 ຕູ້ ກັບຄືນຕົ້ນທາງປະເທດສະຫະຣາຊະອານາຈັກ ຖືເປັນປະເທດຫຼ້າສຸດໃນອາຊີທີ່ເພິ່ມຄວາມຈິງຈັງໃນການຕໍ່ຕ້ານການໃຫ້ທະວີບແຫ່ງນີ້ເປັນ “ບ່ອນຖິ້ມຂີ້ເຫຍື້ອໂລກ”.

ສໍານັກຂ່າວຕ່າງປະເທດລາຍງານຈາກນະຄອນຫຼວງໂຄລໍາໂບ ປະເທດສຣີລັງກາ ເມື່ອວັນສຸກ ທີ 26 ກໍລະກົດ ວ່າ ສໍານັກງານພາສີສຣີລັງກາອອກຖະແຫຼງການເມື່ອວັນສຸກ ເລື່ອງການທະຍອຍສົ່ງຕູ້ຄອນເທນເນີບັນຈຸ “ຂີ້ເຫຍື້ອ” ເຊິ່ງລວມເຖິງອະໄວຍະວະຂອງຄົນ ແລະ ຂີ້ເຫຍື້ອພລາສຕິກຣີໄຊເຄິລບໍ່ໄດ້ ຈໍານວນ 111 ຕູ້ ກັບຄືນຕົ້ນທາງຄືປະເທດສະຫະຮາຊະອານາຈັກ ເຖິງວ່າຕູ້ຄອນເທນເນີທັງໝົດນີ້ ເປັນສ່ວນໜຶ່ງຂອງຕູ້ຄອນເທນເນີທັງໝົດ 230 ຕູ້ ທີ່ທະຍອຍເດີນທາງມາປະເທດສຣີລັງກາ ເມື່ອປີ 2017 ຕາມຂໍ້ຕົກລົງການຄ້າລະດັບທະວີພາຄີ ແຕ່ມີພຽງ 130 ຕູ້ເທົ່ານັ້ນ ທີ່ບັນຈຸຂີ້ເຫຍື້ອເຊິ່ງເປັນໄປຕາມຂໍ້ຕົກລົງ ທີ່ໃຫ້ສຣີລັງກາເປັນຜູ້ຈັດການຮີໄຊເຄິລ ແລະ ຜະລິດເປັນສິນຄ້າສົ່ງອອກ.

ຂະນະທີ່ ກະຊວງສິ່ງແວດລ້ອມຂອງສະຫະຣາຊະອານາຈັກ ອອກຖະແຫຼງການຍອມຮັບວ່າມີ “ຂີ້ເຫຍື້ອທາງການແພດ” ລວມຢູ່ໃນຕູ້ຄອນເທນເນີທີ່ສົ່ງໄປປະເທດສຣີລັງກາດ້ວຍ ແຕ່ຍັງບໍ່ໄດ້ຮັບການປະສານງານຢ່າງເປັນທາງການຈາກລັດຖະບານໂຄລໍາໂບ. ທັງນີ້ ສຣີລັງກາຖືເປັນປະເທດຫຼ້າສຸດໃນອາຊີທີ່ເພິ່ມຄວາມຈິງຈັງ ແລະ ຄວາມເຂັ້ມງວດໃນການກວດສອບການລັກລອບຂົນສົ່ງຂີ້ເຫຍື້ອພິດເຂົ້າສູ່ປະເທດເຊິ່ງອາຊີຕາເວັນອອກສຽງໃຕ້ ແລະ ອາຊີໃຕ້ ກາຍເປັນເປົ້າໝາຍຂອງກຸ່ມປະເທດຕາເວັນຕົກໃນເລື່ອງດັ່ງກ່າວຫຼາຍຂຶ້ນ ນັບຕັ້ງແຕ່ຈີນປະກາດຍຸຕິການຮັບຊື້ ຫຼື ນໍາເຂົ້າ “ຂີ້ເຫຍື້ອທຸກປະເພດ” ເມື່ອປີຜ່ານມາ ທັງນີ້ ໃນສ່ວນຂອງກຸ່ມປະເທດໃນອາຊີຕາເວັນອອກສຽງໃຕ້ນັ້ນ ຟິລິບປິນ, ຫວຽດນາມ, ມາເລເຊຍກໍາປູເຈຍ ແລະ ໄທ ມີນະໂຍບາຍກວດສອບທີ່ເຂັ້ມງວດຫຼາຍຂຶ້ນຢ່າງຊັດເຈນ ນັບຕັ້ງແຕ່ການປະຊຸມຜູ້ນໍາ 10 ປະເທດ ສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ) ລົງນາມຮ່ວມກັນໃນສົນທິສັນຍາກຣຸງເທບ ວ່າ ດ້ວຍການຕໍ່ຕ້ານຂີ້ເຫຍື້ອທະເລໃນພາກພື້ນ ລະຫວ່າງ ການປະຊຸມທີ່ກຣຸງເທບ ມະຫານະຄອນ ເມື່ອທ້າຍເດືອນມິຖຸນາ ຜ່ານມາດ້ວຍ.