ຫຼາຍປະເທດໃນເອີຣົບຮ້ອນສຸດ ຂະນະທີ່ ໂປຕຸເກດ ຜະເຊີນໄຟປ່າ ຄັ້ງຮຸນແຮງ

194

ສະພາບອາກາດໃນຫຼາຍປະເທດເຂດເອີຮົບ ຕອນນີ້ຮ້ອນຫຼາຍຈົນທໍາລາຍສະຖິຕິ ໂດຍອຸນຫະພູມສ່ວນໃຫຍ່ ສູງລະດັບ 40 ອົງສາ ຂະນະທີ່ປະເທດສະເປນ ແລະ ໂປຕຸເກດ ຜະເຊີນໄຟປ່າ ຄັ້ງໃຫຍ່.

ສໍານັກຂ່າວຕ່າງປະເທດລາຍງານຈາກນະຄອນຫຼວງປາຣີສ ປະເທດຝຣັ່ງ  ເມື່ອວັນພະຫັດ ທີ 25 ກໍລະກົດ ວ່າ ສໍານັກງານອຸຕຸນິຍົມວິທະຍາຂອງຝຣັ່ງ (ເມເຕໂອຟຣັອງຊ໌: Meteo France) ພະຍາກອນສະພາບອາກາດໃນນະຄອນຫຼວງປາຣີສຈະຮ້ອນຫຼາຍຈົນທໍາລາຍສະຖິຕິ ໃນຮອບ 70 ປີ ໃນວັນພະຫັດ ທີ 25 ກໍລະກົດ ນີ້ ໂດຍຄາດການອຸນຫະພູມຈະສູງເຖິງ 40,4 ອົງສາ ກ່ອນມີແນວໂນ້ມຫຼຸດລົງ ເນື່ອງຈາກເມເຕໂອຟຣັອງ ພະຍາກອນວ່າຈະມີຝົນຕົກໃນໄລຍະທ້າຍອາທິດນີ້ ເຊິ່ງການທີ່ອຸນຫະພູມວົນກັບມາສູງຂຶ້ນອີກຄັ້ງ ຫຼັງຫຼຸດລົງເມື່ອ 1 ເຖິງ 2 ອາທິດ ຜ່ານມາ ສ້າງຄວາມວິຕົກກັງວົນຢ່າງໜັກໃຫ້ແກ່ຊາວກະສິກອນຜູ້ປູກໝາກລະແຊ້ງ ສາຍພັນສໍາລັບຜະລິດວາຍ ແລະ ອຸດສາຫະກໍາຜະລິດວາຍ ໃນຝຣັ່ງ ວ່າ ຜົນຜະລິດໃນປີນີ້ ອາດຫຼຸດໜ້ອຍ ແລະ ຄຸນນະພາບບໍ່ດີເທົ່າທີ່ຜ່ານມາ.

ຂະນະທີ່ສໍານັກງານອຸຕຸນິຍົມວິທະຍາແຫ່ງຊາດຂອງເບລຢຽມ ລາຍງານການວັດແທກອຸນຫະພູມສູງສຸດເປັນປະຫວັດການ ນັບຕັ້ງແຕ່ເດືອນມິຖຸນາ 1950 ເມື່ອວັນພຸດ ໂດຍວັດແທກໄດ້ 38,9 ອົງສາ ທີ່ຖານທະນີໄຄລເນີ – ໂບຣເກລ ທາງພາກຕາເວັນອອກສຽງເໜືອຂອງປະເທດ ດ້ານທາງການປະເທດເນເທີແລນ ວັດແທກອຸນຫະພູມສູງສຸດ ໃນປະປະເທດໄດ້ທີ່ເມືອງກິນເຊ – ຣີເຈນ ທາງພາກໃຕ້ຂອງປະເທດ 38,8 ອົງສາ ທໍາລາຍສະຖິຕິ ໃນຮອບ 75 ປີ.

ນອກຈາກນີ້ ສໍານັກງານອຸຕຸນິຍົມວິທະຍາຂອງສະຫະຣາຊະອານາຈັກ (ເດິ ເມັດ: The Met) ພະຍາກອນວ່າ ອຸນຫະພູມຂອງປະເທດໃນວັນພະຫັດ ນີ້ ມີແນວໂນ້ມສູງ ວ່າ ຈະທໍາລາຍສະຖິຕິ 38,5 ອົງສາ ເຊິ່ງວັດແທກໄດ້ທີ່ເມືອງຟາເວີແຊມ ໃນມົນທົນເຄນຕ໌ ທາງພາກຕາເວັນອອກສຽງໃຕ້ ຂອງເກາະອັງກິດ ເມື່ອເດືອນສິງຫາ 2004 ດ້ວຍ ສ່ວນລັດຖະບານອິຕາລີອອກປະກາດເຕືອນໄພປະຊາຊົນ ແລະ ນັກທ່ອງທ່ຽວເທິງເກາະຊາກດິເນຍ ທີ່ຢູ່ນອກຝັ່ງ ທາງພາກຕາເວັນອອກຂອງປະເທດໃຫ້ກຽມຮັບມືກັບສະພາບອາກາດທີ່ຈະຮ້ອນສູງ ກວ່າ 40 ອົງສາ.

ໃນອີກດ້ານໜຶ່ງ ປະເທດສະເປນ ແລະ ໂປຕຸເກດ ຕ່າງກໍ່ເລັ່ງດັບໄຟປ່າຄັ້ງໃຫຍ່ ເຊິ່ງຮຸນແຮງກວ່າຫຼາຍປີ ຜ່ານມາ ໂດຍສະພາະປະເທດໂປຕຸເກດ ເຊິ່ງຫຼາຍຝ່າຍກັງວົນ ວ່າ ອາດຮຸນແຮງກວ່າໄຟປ່າ ເມື່ອປີ 2017 ທີ່ປະຊາຊົນເສຍຊີວິດ ຫຼາຍກວ່າ 100 ຄົນ.