ດິນເຈື່ອນໃນຈີນສອງຈຸດ ປະຊາຊົນເສຍຊີວິດ 14 ຄົນ

188

ພົບຜູ້ເສຍຊີວິດແລ້ວຢ່າງໜ້ອຍ 14 ຄົນ ຈາກເຫດດິນເຈື່ອນສອງຈຸດ ທາງພາກຕາເວັນຕົກສຽງໃຕ້ ຂອງຈີນ ເຈົ້າໜ້າທີ່ກູ້ໄພເລັ່ງຄົ້ນຫາຜູ້ສູນຫາຍ 42 ຄົນ.

ສໍານັກຂ່າວເອພີລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນພຸດ ທີ 24 ກໍລະກົດ ວ່າ ໂທລະທັດຊີຊີທີວີ ລາຍງານເຫດດິນເຈື່ອນ ເມື່ອກາງຄືນວັນອັງຄານ ທີ 23 ກໍລະກົດ ທີ່ຜ່ານມາ ເຊິ່ງໄຫຼລົງມາທັບຖົມບ້ານເຮືອນປະຊາຊົນ 21 ຫຼັງ ແລະ ເຮັດໃຫ້ມີຜູ້ເສຍຊີວິດຢ່າງໜ້ອຍ 13 ຄົນ ໃນເຂດສຸ່ຍເຈິ້ງ ມົນທົນກຸ້ຍໂຈ ທາງພາກຕາເວັນຕົກສຽງໃຕ້ຂອງຈີນ ເຊື່ອວ່າ ສາເຫດມາຈາກຝົນຕົກໜັກ ແຕ່ເຈົ້າໜ້າທີ່ກໍ່ຍັງຄົ້ນຫາຜູ້ສູນຫາຍອີກຢ່າງໜ້ອຍ 42 ຄົນ ເຖິງວ່າຈະຊ່ວຍເຫຼືອຂຶ້ນມາໄດ້ແລ້ວ 11 ຄົນ.

ກໍາລັງເຈົ້າໜ້າທີ່ກູ້ໄພ ກວ່າ 800 ຄົນ ເລັ່ງຄົ້ນຫາໃນພື້ນທີ່ເກີດເຫດ ແຕ່ກໍ່ຍັງມີອຸປະສັກຈາກສະພາບອາກາດທີ່ຍັງມີຝົນຕົກຕໍ່ເນື່ອງ ແລະ ສະພາບພູມສາດປະເທດເປັນພູສູງຊັນ.

ແຕ່ກ່ອນໜ້ານີ້ ມີລາຍງານດິນເຈື່ອນໃນໝູ່ບ້ານແຫ່ງໜຶ່ງ ໃນເຂດເຫີຈາງ ມົນທົນກຸ້ຍໂຈ ເມື່ອໄລຍະບ່າຍວັນອັງຄານ ທີ່ຜ່ານມາ ເຮັດໃຫ້ມີຜູ້ເສຍຊີວິດ 1 ຄົນ ແລະ ສູນຫາຍ 6 ຄົນ ດິນທີ່ເຈື່ອນຍັງໄຫຼລົງມາທັບຖົມເຕັ້ນບ່ອນພັກກໍ່ສ້າງທາງຫຼວງ ຕາມລາຍງານຂອງສໍານັກຂ່າວຊິນຫົວ.