ນິສສັນ ກຽມປົດພະນັກງານ ຫຼາຍກວ່າ 10 ພັນຄົນທົ່ວໂລກ

196

ບໍລິສັດ “ນິສສັນ ມໍເຕີ” ໜຶ່ງໃນຜູ້ຜະລິດລົດລາຍໃຫຍ່ຂອງຍີ່ປຸ່ນ ກຽມເຊົາຈ້າງພະນັກງານຫຼາຍກວ່າ 10 ພັນຕໍາແໜ່ງທົ່ວໂລກ ຈາກຜົນກໍາໄລທີ່ຫຼຸດລົງຫຼາຍ ແລະ ຄະດີຄວາມຂອງອະດີດປະທານບໍລິຫານ.

ສໍານັກຂ່າວຕ່າງປະເທດລາຍງານຈາກນະຄອນຫຼວງໂຕກຽວ ປະເທດຍີ່ປຸ່ນ ເມື່ອວັນພຸດ ທີ 24 ກໍລະກົດ ໂດຍອ້າງຂໍ້ມູນຈາກແຫຼ່ງຂ່າວພາຍໃນບໍລິສັດນິສສັນ ມໍເຕີ ໜຶ່ງໃນຜູ້ຜະລິດລົດລາຍໃຫຍ່ລະດັບໂລກຂອງຍີ່ປຸ່ນ ວ່າ ບໍລິສັດກຽມຫຼຸດການຈ້າງພະນັກງານຫຼາຍກວ່າ 10 ພັນຄົນທົ່ວໂລກ ຈາກປັດຈຸບັນ ທີ່ມີຢູ່ປະມານ 193.000 ຄົນ ໂດຍຈໍານວນດັ່ງກ່າວ ມີຜູ້ຕ້ອງອອກຈາກວຽກໄປແລ້ວ 4.800 ຄົນ ເມື່ອເດືອນພຶດສະພາ ຜ່ານມາ ເຊິ່ງເປັນໄລຍະທີ່ ນິສສັນ ລາຍງານຜົນກໍາໄລຈາກການປະກອບການປະຈໍາປີງົບປະມານຫຼ້າສຸດ ເຊິ່ງສິ້ນສຸດ ເມື່ອເດືອນມີນາ ຜ່ານມາ ປະມານ 319.000 ລ້ານເຢນ (ປະມານ 25.830 ຕື້ກີບ) ຕ່ໍາທີ່ສຸດ ນັບຕັ້ງແຕ່ປີງົບປະມານ 2009/2010 ເຊິ່ງເປັນໄລຍະທີ່ໂລກຫາກໍ່ຟື້ນຈາກວິກິດການເງິນ ນອກຈາກສະຖານະການດັ່ງກ່າວ ຍັງຫຼຸດລົງຫຼາຍເຖິງ 57% ເມື່ອທຽບກັບປີງົບປະມານກ່ອນໜ້ານັ້ນດ້ວຍ.

ນອກຈາກນີ້ ນິສສັນ ແລະ ພັນທະມິດ 3 ປະສານ ຄື ມິດຊູບິຊິ ເຊິ່ງເປັນຜູ້ຜະລິດລົດໃຫຍ່ຂອງຍີ່ປຸ່ນເຊັ່ນກັນ ແລະ ບໍລິສັດເຣໂນລ ຂອງຝຣັ່ງ ຍັງຢູ່ໃນໄລຍະຂອງການຟື້ນຟູພາບລັກຂອງອົງກອນ ເພື່ອຮຽກຄືນຄວາມເຊື່ອໝັ້ນຄັ້ງໃຫຍ່ຈາກທຸກຝ່າຍ ຫຼັງເກີດກໍລະນີ ການທຸຈະລິດຂອງ ຄາຣ໌ລອສ ກອນ ອະດີດປະທານບໍລິຫານຂອງນິສສັນ ມໍເຕີ ເຊິ່ງສັ່ນສະເທືອນໄປທົ່ວວົງການຍານຍົນໂລກຢ່າງໜັກ ນັບຕັ້ງແຕ່ສໍານັກງານໄອຍາການນະຄອນຫຼວງໂຕກຽວຈັບຕົວ ແລະ ດໍາເນີນຄະດີກັບ ກອນ ໃນຫຼາຍຂໍ້ຫາ ເມື່ອເດືອນພະຈິກ ປີຜ່ານມາ.