ອາກາດຮ້ອນຜົນຜະລິດເສຍຫາຍ ຝຣັ່ງຮຽກຮ້ອງເອີຣົບຊ່ວຍຈ່າຍເງິນຊົດເຊີຍ

187

ທ່ານດີດີເຢ ກີລເຢເມ (Didier Guillaume) ລັດຖະມົນຕີກະຊວງກະເສດຂອງຝຣັ່ງ ກ່າວເມື່ອວັນສຸກ ທີ22 ກໍລະກົດ ຜ່ານມາ ວ່າ ຝຣັ່ງຈະຮ້ອງຂໍໃຫ້ຄະນະກໍາມາທິການເອີຣົບຈ່າຍເງິນອຸດໜຸນເພິ່ມຕື່ມ ເພື່ອຊ່ວຍເຫຼືອຊາວກະສິກອນ ໃນການຮັບມືກັບຄື້ນຄວາມຮ້ອນທີ່ປົກຄຸມຮຸນແຮງເຊິ່ງກໍ່ໃຫ້ເກີດຄວາມແຫ້ງແລ້ງ ແລະ ຄວາມເສຍຫາຍມະຫາສານແກ່ພືດຜົນ.

ທ່ານກິລເຢເມ ໃຫ້ສໍາພາດກັບສະຖານີວິດທະຍຸຟຣັອງແຊງໂຟ (Franceinfo) ວ່າ ລັດຖະບານຝຣັ່ງ “ຈະຮ້ອງຂໍໃຫ້ສະຫະພາບເອີຣົບເພິ່ມເງິນສະໜັບສະໜຸນໃນເດືອນຕຸລາ ເປັນມູນຄ່າ 1 ພັນລ້ານເອີໂຣ (ປະມານ 9.760 ຕື້ກີບ).

“ສະຖານະການກໍາລັງວິກິດ” ລັດຖະມົນຕີ ກິລເຢເມ ກ່າວວ່າ “ຕອນນີ້ ສັດລ້ຽງໃນຟາມກໍາລັງກິນສິ່ງທີ່ມີຢູ່ໃນສາງ ເຊິ່ງຖືກເກັບໄວ້ສໍາລັບລະດູໜາວປີນີ້ ຫຼັງເກີດໄພແລ້ງຈາກຄື້ນຄວາມຮ້ອນຕໍ່ເນື່ອງຊາວກະສິກອນຕ້ອງການຄວາມຊ່ວຍເຫຼືອ ເພື່ອໃຫ້ສາມາດຊື້ຫຍ້າແຫ້ງມາລ້ຽງສັດພາຍໃນເດືອນຕຸລາ”.
ຕະຫຼອດປີມານີ້ ຝຣັ່ງ ຜະເຊີນກັບອາກາດຮ້ອນ ແລະ ພາວະຂາດແຄນຝົນ ຈົນລະດັບນ້ໍາບາດານຫຼຸດລົງຕ່ໍາສຸດໃນຮອບ 6 ປີ ແມ່ນ້ໍາຫຼາຍສາຍກໍາລັງແຫ້ງ ເຮັດໃຫ້ໜ່ວຍງານຕ່າງໆກວ່າ 73 ແຫ່ງ ຕ້ອງຈໍາກັດການໃຊ້ນ້ໍາ.

ແຫຼ່ງຂ່າວຍັງຄາດວ່າຈະມີຄື້ນຄວາມຮ້ອນຮອບໃໝ່ເຄື່ອນໄຫວມາປົກຄຸມຫຼາຍເມືອງຂອງຝຣັ່ງອີກ ໃນອາທິດນີ້ ເຊິ່ງຈະເປັນການຂະຫຍາຍເວລາລະດູແລ້ງ ສົ່ງຜົນຕໍ່ການຜະລິດວາຍຂຶ້ນໄປອີກ ໂດຍຄາດວ່າວັນພະຫັດ ທີ 25 ກໍລະກົດ ອຸນຫະພູມຂອງນະຄອນຫຼວງປາຣີສ ຈະສູງເຖິງ 41 ອົງສາ.

ຂໍ້ມູນຂອງກະຊວງ ເຜີຍວ່າ ຝຣັ່ງ ເຊິ່ງເປັນໜຶ່ງໃນຜູ້ຜະລິດ ແລະ ສົ່ງອອກວາຍລາຍໃຫຍ່ຂອງໂລກ ຈະມີສະຖິຕິຜະລິດວາຍຫຼຸດລົງ 6-13% ໃນປີນີ້ ເມື່ອທຽບກັບປີ 2018.

ອາກາດຮ້ອນທີ່ພັດເຂົ້າມາປົກຄຸມຈາກມະຫາສະໝຸດໄອບີເຣຍ ທາງພາກຕາເວັນຕົກສຽງໃຕ້ຂອງເອີຣົບ ເຮັດໃຫ້ພື້ນທີ່ 22 ແຂວງ ທາງພາກຕາເວັນຕົກສຽງໃຕ້ ແລະ ຕາເວັນອອກສຽງໃຕ້ຂອງຝຣັ່ງ ອອກປະກາດເຕືອນໄພສີສົ້ມ ເຊິ່ງເປັນອັນດັບສູງສຸດ ເຈົ້າໜ້າທີ່ລັດໄດ້ເປີດ “ຫ້ອງເຢັນ” ໃນອາຄານເທສະບານຕ່າງໆ ຂະຫຍາຍເວລາໃຫ້ບໍລິການສະລອຍນ້ໍາ ແລະ ສວນສາທາລະນະຫຼາຍແຫ່ງຈົນເຖິງຕອນຄ່ໍາ ເພື່ອຊ່ວຍໃຫ້ປະຊາຊົນມີແຫຼ່ງພັກຜ່ອນຄາຍຄວາມຮ້ອນ.

ເມື່ອທ້າຍເດືອນມິຖຸນາ ທີ່ຜ່ານມາ ພູມສາດປະເທດສ່ວນໃຫຍ່ໃນຝຣັ່ງ ຖືກບັນທຶກວ່າ ມີສະພາບອາກາດຮ້ອນຮຸນແຮງ ໂດຍເມືອງກັລລາເກິ ເລີ ມອງຕູ (Gallargues-le-Montreux) ທາງພາກໃຕ້ຂອງຝຣັ່ງ ມີອຸນຫະພູມ 46 ອົງສາ ສູງເປັນປະຫວັດການ ໂດຍສະຖິຕິເກົ່າ 44,1 ອົງສາ ໃນເດືອນສິງຫາ ປີ 2003.