ສິງກະໂປ ຢຶດ ງາຊ້າງ – ເກັດລິ່ນ ຄັ້ງໃຫຍ່ທີ່ສຸດເທົ່າທີ່ເຄີຍມີ

213

ເຈົ້າໜ້າທີ່ສິງກະໂປ ຖະແຫຼງຜົນການຈັບກຸມຢຶດງາຊ້າງລວມນ້ໍາໜັກເກືອບ 9 ໂຕ້ນ ແລະ ເກັດລິ່ນ 13,1 ໂຕ້ນ ໃນເຮືອບັນທຸກສິນຄ້າຂົນໄມ້ຊຸງຈາກອາຟຣິກາ ໂດຍມີປາຍທາງໄປປະເທດຫວຽດນາມ.

ສໍານັກຂ່າວຣອຍເຕີ, ເອເອັຟພີ ແລະ ເອພີ ລາຍງານຈາກປະເທດສິງກະໂປ ເມື່ອວັນອັງຄານ ທີ 23 ກໍລະກົດ ວ່າ ຖະແຫຼງການຮ່ວມຂອງສໍານັກງານຄະນະກໍາມະການອຸທິຍານແຫ່ງຊາດ ແລະ ສໍານັກງານພາສີ ແລະ ຕໍາຫຼວດກວດຄົນເຂົ້າເມືອງສິງກະໂປ ເມື່ອວັນອັງຄານ ລະບຸວ່າ ເຈົ້າໜ້າທີ່ຕໍາຫຼວດພົບສິ່ງຜິດກົດໝາຍ ໃນຕູ້ຄອນເທັນເນີຂົນສົ່ງສິນຄ້າທາງເຮືອ ເມື່ອວັນອາທິດ ໃນເຮືອບັນທຸກສິນຄ້າຈາກສາທາລະນະລັດ ປະຊາທິປະໄຕຄອງໂກ ໂດຍມີປາຍທາງໄປປະເທດຫວຽດນາມ.

ສິ່ງຜິດກົດໝາຍທີ່ກວດພົບຊຸກເຊື່ອງຢູ່ໃນທ່ອນໄມ້ຊຸງ ປະກອບດ້ວຍງາຊ້າງ ລວມນ້ໍາໜັກ 8,8 ໂຕ້ນລາຄາຕາມປະມານ 12,9 ລ້ານໂດລາ (ປະມານ 113 ຕື້ກີບ) ມາຈາກຊ້າງໃນອາຟຣິກາ ເກືອບ 300 ໂຕ ຖືເປັນການຈັບກຸມງາຊ້າງຜິດກົດໝາຍຄັ້ງໃຫຍ່ທີ່ສຸດ ເທົ່າທີ່ເຄີຍມີມາຂອງປະເທດສິງກະໂປ ນອກຈາກນັ້ນ, ຍັງພົບເກັດລິ່ນ ລວມນ້ໍາໜັກ 13,1 ໂຕ້ນ ລາຄາປະມານ 35,7 ລ້ານໂດລາ (ປະມານ 312 ຕື້ກີບ) ຫຼາຍເປັນອັນດັບ 3 ເທົ່າທີ່ເຄີຍຈັບກຸມໃນສິງກະໂປ.

ການຄ້າງາຊ້າງທົ່ວໂລກກາຍເປັນສິ່ງຜິດກົດໝາຍ ຕັ້ງແຕ່ປີ 1989 ຫຼັງຈາກປະຊາກອນຊ້າງປ່າໃນທະວີບອາຟຣິກາ ຫຼຸດລົງຈາກຫຼາຍລ້ານໂຕໃນໄລຍະກາງ ສະຕະວັດທີ 20 ເຫຼືອປະມານ 600.000 ໂຕ ເມື່ອທ້າຍທົດສະວັດ 1980.