ຜູ້ຊ່ຽວຊານດ້ານເສດຖະສາດຊີ້ ‘ຈີນພັດທະນາຈີນ’ ເທົ່າກັບ ‘ຈີນພັດທະນາໂລກ

188

ເມື່ອວັນອາທິດ ທີ 21 ກໍລະກົດ ຜ່ານມາ ຜູ້ຊ່ຽວຊານຊາວຟິຈິ ກ່າວກັບສໍານັກຂ່າວຊິນຫົວຂອງຈີນ ວ່າ “ຈີນເປັນປະເທດທີ່ມີຄວາມສໍາຄັນຢ່າງຫຼວງຫຼາຍ ເນື່ອງຈາກບໍ່ໄດ້ພັດທະນາສະເພາະຕົວເອງ ແຕ່ຍັງຊ່ວຍພັດທະນາປະເທດອື່ນໆ ເທິງໂລກອີກດ້ວຍ”.

ທ່ານເຄຊເມຍ ມາຄຸນ ອາຈານປະຈໍາຄະນະເສດຖະສາດ ມະຫາວິທະຍາໄລເຊົາປາຊີຟິກ (USP: University of the South Pacific) ໃນນະຄອນຫຼວງຊູວາ ປະເທດຟິຈິ ກ່າວວ່າ ໂລກໄດ້ຮັບຮູ້ເຖິງການອຸດທິດທຸ່ມເທຂອງຈີນເປັນຢ່າງດີ ໂດຍສະເພາະກຸ່ມປະເທດທີ່ກໍາລັງພັດທະນາທັງຫຼາຍ ໃນພາກພື້ນປາຊີຟິກໃຕ້.

“ວຽກການວິໄຈດ້ານວິຊາການບົ່ງຊີ້ວ່າ ການສົ່ງອອກຂອງຈີນຊ່ວຍໃຫ້ຜູ້ບໍລິໂພກ ໃນໂລກຕາເວັນຕົກສາມາດຍົກລະດັບກໍາລັງການຊື້ທີ່ແທ້ຈິງ ເປັນມູນຄ່າຫຼາຍຮ້ອຍ ແລະ ຫຼາຍພັນໂດລາຕໍ່ປີ ໃນບາງກໍລະນີ” ທ່ານມາຄຸນ ກ່າວ “ນອກຈາກນັ້ນ ຈີນຍັງເປັນຜູ້ນໍາເຂົ້າລາຍໃຫຍ່ອີກດ້ວຍ”.

ທ່ານໄດ້ກ່າວເຖິງບົດບາດຂອງຈີນ ໃນການປົກປ້ອງຮັກສາສັນຕິພາບ ແລະ ສະຖຽນລະພາບ ຄວາມໝັ້ນຄົງຂອງໂລກ ລະບຸວ່າ ຈີນໄດ້ເພິ່ມການມີສ່ວນຮ່ວມທາງການເງິນ ແລະ ບຸຄະລາກອນໃນແຜນລິເລິ່ມການຮັກສາສັນຕິພາບແຫ່ງສະຫະປະຊາຊາດ (UN: United Nations ) ໃນໄລຍະ 5 ປີ ຜ່ານມາ ຢ່າງມີປະສິດທິພາບ.

“ປັດຈຸບັນ ຈີນມີສ່ວນຮ່ວມສະໜັບສະໜຸນງົບປະມານການຮັກສາສັນຕິພາບແຫ່ງສະຫະປະຊາຊາດສູງເຖິງ 10,25% ຕົນຄິດວ່າຈີນ ເປັນອີກໜຶ່ງຄວາມຈິງໃນການປະຕິບັດການຮັກສາສັນຕິພາບຂອງໂລກ”.

ຜູ້ຊ່ຽວຊານຊາວຟິຈິ ເຊື່ອວ່າ ແຜນລິເລິ່ມໜຶ່ງແລວໜຶ່ງເສັ້ນທາງ (BRI: Belt and Road Initiative) ເປັນຫົວຂໍ້ໂຄງການອັນຍິ່ງໃຫຍ່ທີ່ຈີນໄດ້ເຮັດເພື່ອໂລກ ຊີ້ວ່າ ແຜນການລິເລີ່ມດັ່ງກ່າວ ໄດ້ຮັບການຕ້ອນຮັບຈາກຫຼາຍປະເທດໃຫ້ເປັນພື້ນທີ່ ແລະ ພະລັງຂັບເຄື່ອນເພື່ອສະແຫວງຫາຄວາມຮ່ວມມືແບບສົມປະໂຫຍດຂອງທຸກປະເທດທີ່ເຂົ້າຮ່ວມ.

“ຕົນຄິດວ່າ ຄວາມຊ່ວຍເຫຼືອຈາກຈີນ ໄປສູ່ພາກພື້ນປາຊິຟິກ ຜ່ານແຜນລິເລິ່ມດັ່ງກ່າວ ກໍາລັງຊ່ວຍອັດສີດແຮງກະຕຸ້ນ ຜ່ານການຄ້າ ແລະ ການລົງທຶນ ເຊິ່ງນໍາໄປສູ່ຄວາມຮ່ວມມືອື່ນໆ ເພິ່ມຂຶ້ນຢ່າງເປັນຮູບປະທໍາ ແລະ ສອດຄ່ອງລົງໂຕຕໍ່ກັນ.

ທ່ານມາຄຸນ ກ່າວອີກວ່າ ກຸ່ມປະເທດເກາະປາຊິຟິກ ຂາດແຄນໂຄງສ້າງພື້ນຖານ ແລະ ລະບົບໂລຈິສຕິກ ເພື່ອເພິ່ມການສົ່ງອອກ, ການລົງທຶນໃນໂຄງສ້າງພື້ນຖານດ້ານການສື່ສານ, ທ່າເຮືອ ແລະ ສະໜາມບິນ ຈຶ່ງຈໍາເປັນຕໍ່ການຂະຫຍາຍບັນຍາກາດໃນການຄ້າ ແລະ ການຫຼຸດຕົ້ນທຶນທາງທຸລະກິດ. “ມີຕົວຢ່າງທີ່ຈີນຮ່ວມມືກັບລັດຖະບານທ້ອງຖິ່ນ ເພື່ອດໍາເນີນໂຄງການພັດທະນາອັນຫຼາກຫຼາຍຮູບແບບໃນພາກພື້ນປາຊິຟິກ ແລະ ຕົວຢ່າງອັນໂດດເດັ່ນຄື ຂົວ ແລະ ຖະໜົນໃນຟິຈິ” ທ່ານມາຄຸນ ກ່າວ.