ນັກບິນທັງ 3 ເດີນທາງເຖິງສະຖານີອະວະກາດນານາຊາດ ປອດໄພ

201

ຍານແຄັບຊູນໂຊຢຸຊ ນໍາລູກເຮືອຊາວອາເມຣິກັນ, ຣັສເຊຍ ແລະ ອິຕາລີ ເດີນທາງເຖິງສະຖານີອະວະກາດນານາຊາດ ຢ່າງປອດໄພ ພາຍໃນເວລາພຽງ 6 ຊົ່ວໂມງ 20 ນາທີ ແລະ ການເດີນທາງກົງກັບວາລະຄົບຮອບ 50 ປີ ພາລະກິດອະພອລໂລ 11 ພໍດີ.

ສໍານັກຂ່າວຕ່າງປະເທດລາຍງານຈາກເມືອງໄບໂຄນູ ປະເທດຄາຊັກສະຖານ ເມື່ອວັນອາທິດ ທີ 21 ກໍລະກົດ ວ່າ ຈະຫຼວດໂຊຢຸຊ – ເອັຟຈີ ຂອງອົງການອະວະກາດຣັສເຊຍ (Roscosmos) ອອກເດີນທາງຈາກຖານປ່ອຍຈະຫຼວດພາຍໃນສູນອະວະກາດໄບໂຄນູ ຄອສໂມໂດຣມ ບໍລິເວນພາກກາງ ຂອງປະເທດຄາຊັກສະຖານ ເມື່ອເວລາ 16:28 ໂມງ ຕາມເວລາມາດຕະຖານສາກົນຂອງວັນເສົາ (23:28 ໂມງ ຕາມເວລາໃນປະເທດລາວ) ເພື່ອສົ່ງຍານແຄັບຊູນໂຊຢຸຊ ເອັມເອັສ-13 ( Soyuz MS-13 space ship) ນໍານັກບິນຊຸດໃໝ່ 3 ຄົນ ເດີນທາງສູ່ສະຖານີອະວະກາດນານາຊາດ (ISS: International Space Station) ໄດ້ແກ່ ທ່ານອາເລັກຊານເດີ ສະຄວັອດຊັອຟ ຊາວຣັສເຊຍ ສັງກັດຣອສຄອສມອສ (Roscosmos), ທ່ານແອນດຣູ ມໍແກນ ຊາວອາເມຣິກັນ ສັງກັດອົງການບໍລິຫານການບິນ ແລະ ອະວະກາດແຫ່ງຊາດຂອງສະຫະລັດ (NASA: National Aeronautics and Space Administration) ແລະ ທ່ານລູກາ ປາມິຕາໂນ ຊາວອິຕາລຽນ ສັງກັດອົງການອະວະກາດເອີຣົບ (ESA: European Space Agency).

3 ນັກບິນອະວະກາດ: ທ່ານແອນດຣູ ມໍແກນ ( Andrew Morgan ), ທ່ານອາເລັກຊານເດີ ສະຄວັອດຊັອຟ ( Alexander Skvortsov ) ແລະ ທ່ານລູກາ ປາມິຕາໂນ ( Luca Parmitano ).

ທັງນີ້ ແຄັບຊູນໂຊຢຸຊ ເອັມເອັສ-13 ເດີນທາງເຖິງທີ່ໝາຍ ເມື່ອ 22:48 ໂມງ ຕາມເວລາມາດຕະຖານສາກົນຂອງວັນເສົາ (05:48 ໂມງ ວັນອາທິດ ຕາມເວລາໃນລາວ) ລວມເວລາໃນການເດີນທາງຄັ້ງນີ້ 6 ຊົ່ວໂມງ 20 ນາທີ ໂດຍມືຂອງເຄື່ອງຈັກຂອງໄອເອັສເອັສໄດ້ຍື້ໄປດຶງເອົາຍານແຄັບຊູນເຂົ້າທຽບທ່າປະຕູທາງເຂົ້າສະຖານີອະວະກາດໄດ້ຢ່າງປອດໄພ. ອີກປະການໜຶ່ງ ການເດີນທາງຂອງລູກເຮືອໄອເອັສເອັສຊຸດນີ້ ເກີດຂຶ້ນພໍດີກັບວັນທີ່ວົງການອະວະກາດໂລກສະເຫຼີມສະຫຼອງຄົບຮອບ 50 ປີ ໂຄງການອະພອລໂລ 11 ຂອງນາຊາ ເຊິ່ງເປັນໂຄງການອະວະກາດແຫ່ງທໍາອິດຂອງໂລກ ທີ່ປະສົບຄວາມສໍາເລັດ ໃນການສົ່ງຍານລົງຈອດເທິງດວງຈັນ ແລະ ມະນຸດຄົນທໍາອິດທີ່ສ້າງປະຫວັດສາດລົງຢຽບດວງຈັນຄົນທໍາອິດ ຄື ທ່ານນິລ ອາຣ໌ມສະຕຣອງ ເມື່ອວັນທີ 20 ກໍລະກົດ  1969.