ນ້ໍາຖ້ວມໜັກ ປະເທດບັງກລາເທດ 4 ລ້ານຄົນ ສ່ຽງຂາດອາຫານ – ປ່ວຍໄຂ້

227

ອົງການກາແດງສາກົນ (IFRC) ລາຍງານວ່າ ຝົນທີ່ຕົກໜັກຫຼາຍວັນມານີ້ ສົ່ງຜົນໃຫ້ປະຊາຊົນກວ່າ 4 ລ້ານຄົນ ໃນພາກເໜືອ ແລະ ພາກຕາເວັນອອກສຽງໃຕ້ຂອງປະເທດບັງກລາເທດ ຜະເຊີນກັບຄວາມສ່ຽງຕໍ່ການຂາດແຄນອາຫານ ແລະ ການແຜ່ລະບາດຂອງພະຍາດຕ່າງໆ.

ຖະແຫຼງການຂອງອົງການກາແດງສາກົນ ເມື່ອວັນສຸກ ທີ 19 ກໍລະກົດ ຜ່ານມາ ລະບຸວ່າ ເຫດໄພພິບັດນ້ໍາຖ້ວມ ແລະ ດິນເຈື່ອນໄດ້ສ້າງຄວາມເສຍຫາຍໃຫ້ກັບຖະຫນົນ ແລະ ໂຄງສ້າງພື້ນຖານທີ່ສໍາຄັນຫຼາຍແຫ່ງ.

ບ້ານເຮືອນກວ່າ 66 ພັນຫຼັງຖືກທໍາລາຍທັງຍັງມີລາຍງານພົບປະຊາຊົນທີ່ຂາດແຄນອາຫານ ແລະ ນ້ໍາສະອາດລວມເຖິງປ່ວຍເປັນພະຍາດຕິດຕໍ່ທາງນ້ໍາຈໍານວນຫຼາຍ.

ທ່ານອາຊມັດ ອຸລລາ (Azmat Ulla) ຫົວໜ້າອົງການກາແດງສາກົນປະຈໍາບັງກລາເທດ ກ່າວວ່າ “ຊຸມຊົນເຫຼົ່ານີ້ກໍາລັງຕົກຢູ່ພາຍໃຕ້ຝົນມໍລະສຸມອັນໜັກໜ່ວງ ເຊິ່ງສົ່ງຜົນໃຫ້ເກີດນ້ໍາຖ້ວມ ແລະ ດິນເຈື່ອນຕາມມາ ເຖິງວ່າປະລິມານຝົນຈະຫຼຸດໜ້ອຍລົງ ແຕ່ແຫຼ່ງນ້ໍາບໍລິເວນຕົ້ນທາງຂອງນ້ໍາທີ່ໄຫຼລົ້ນລົງມາກໍ່ຈະເກີດນ້ໍາຖ້ວມຕາມມາຢູ່ດີ”.

ຖະແຫຼງການຍັງລະບຸເຖິງຄວາມກັງວົນວ່າ ຄວາມເສຍຫາຍຂອງພືດທີ່ປູກອາດນໍາໄປສູ່ບັນຫາການຂາດແຄນອາຫານ ພ້ອມເສີມວ່າ ກຸ່ມຜູ້ທີ່ສຸ່ມສ່ຽງແມ່ນແມ່ ແລະ ເດັກທີ່ຍັງຕ້ອງອາໄສນົມແມ່, ແມ່ຖືພາ ແລະ ຜູ້ສູງອາຍຸ.

ທາງອົງການກາແດງສາກົນຂອງບັງກລາເທດໄດ້ລະດົມອາສາສະໝັກ 675 ຄົນ ເຮັດໜ້າທີ່ຊ່ວຍເຫຼືອຊຸມຊົນໃນເຂດທີ່ໄດ້ຮັບຜົນກະທົບຈາກນ້ໍາຖ້ວມ ເຊິ່ງບໍ່ພຽງປະເມີນສະຖານະການໄດ້ຢ່າງວ່ອງໄວເທົ່ານັ້ນ ແຕ່ອາສາສະໝັກກຸ່ມນີ້ ຍັງຊ່ວຍແຈກຈ່າຍອາຫານ, ນ້ໍາສະອາດ, ຊຸດອຸປະກອນເບິ່ງແຍງ, ສຸຂະອະນາໄມ ແລະ ຖົງກັນນ້ໍາ ໃຫ້ແກ່ຄອບຄົວທີ່ບ້ານເຮືອນທີ່ໄດ້ຮັບຜົນກະທົບ ແລະ ເສຍຫາຍຈາກເຫດດິນເຈື່ອນດ້ວຍ.

ທ່ານ ເຟຣອຊ ຊາລາ ອຸດດິນ (Feroz Salah Uddin) ເລຂາທິການອົງການກາແດງສາກົນຂອງບັງກລາເທດ ກ່າວວ່າ “ບ້ານເຮືອນຫຼາຍສິບພັນຫຼັງຖືກທໍາລາຍ ເຮັດໃຫ້ປະຊາຊົນຄົນຕົກຢູ່ໃນສະຖານະການຮ້າຍແຮງຂຶ້ນອີກ ເຊິ່ງພວກເຮົາວິຕົກກັນວົງຫຼາຍ ກ່ຽວກັບການເຂົ້າເຖິງ ເພື່ອຕອບສະໜອງຄວາມຊ່ວຍເຫຼືອຕໍ່ເຫດການນ້ໍາຖ້ວມຮ້າຍແຮງຄັ້ງນີ້ ທາງອົງການໄດ້ອະນຸມັດເງິນ 452.439 ຟຣັງສະວິດ (ປະມານ 4 ຕື້ກີບ) ຈາກກອງທຶນສຸກເສີນ ເພື່ອບັນເທົາໄພພິບັດໃຫ້ສໍານັກງານໃນບັງກາເທດສາມາດຈັດສັນຫາອາຫານ, ສິ່ງຂອງບັນເທົາທຸກ ແລະ ເງິນສົດ ໃຫ້ແກ່ຄອບຄົວທີ່ໄດ້ຮັບຜົນກະທົບ ກວ່າ 10.000 ຄົວເຮືອນ ໃນຫຼາຍພື້ນທີ່ ທີ່ໄດ້ຮັບຜົນກະທົບຮ້າຍແຮງທີ່ສຸດ.