ແພັດ ເພັດດາວອນ ໄດ້ຮັບລາງວັນເງົາສຽງລຸລາ ໃນລາຍການກິ໊ກດູ ດວນເພງເງິນລ້ານ

235

ຈາກທີ່ກ່ອນໜ້ານີ້ ສາວ ແພັດ ເພັດດາວອນ ກຸນລາວົງ ເຄີຍໂຄເວີເພງຂອງ ສາວ ລຸລາ ນັກຮ້ອງໄທ ເພງເລື່ອງທີ່ຂໍ ແລະ ໄດ້ຖືກໂພສລົງເພຈ໌ໜຶ່ງຂອງໄທ ເຊິ່ງກໍ່ເປັນທີ່ສົນໃຈຈາກຜູ້ຊົມ ແລະ ມີການກົດໄລຄ໌ກົດແຊຣ໌ກັນຢ່າງຫຼວງຫຼາຍ ໂດຍບາງຄອມເມັ້ນກໍ່ບອກວ່າ ສຽງຂອງ ແພັດ ມ່ວນຄືກັບ ລຸລາ ຫຼ້າສຸດ ສາວແພັດ ໄດ້ໄປຮ່ວມໃນລາຍການ ກິ໊ກດູດວນເພງເງິນລ້ານ ຊ່ອງ 7 ຂອງປະເທດໄທ ທີ່ອອກອາກາດທຸກ ວັນຄານ ເວລາ 20.15 ໂມງ ເຊິ່ງ ແພັດ ໄດ້ຮ້ອງແຂ່ງຂັນໃນເງົາສຽງຂອງ ລຸລາ ແລະ ໄດ້ຮັບລາງວັນເງົາສຽງລຸລາ.

ແພັດ ເພັດດາວອນ ກຸນລາວົງ ເປັນສາວໃຕ້ ເມືອງປາກເຊ ແຂວງຈໍາປາສັກ ຮ້ອງເພງປະຈໍາຢູ່ທີ່ຮ້ານຕໍາມົ້ວ ແລະ ມີຊື່ສຽງໃນການປະກວດໃນລາຍການເສິກວັນດວນເພງຂອງປະເທດໄທ ເມື່ອປີ 2018 ສາມາດຄວ້າແຊັມມາໄດ້ 21 ສະໄໝ ເປັນຄົນລາວຄົນທໍາອິດ ນັບແຕ່ນັ້ນມາກໍ່ໄດ້ໄປປະກວດໃນລາຍການເສິກວັນດວນເພງຊີງແຊັມ, ເສິກວັນດວນເພງສົງຄາມແຊັມ ແລະ ອື່ນໆ ເຮັດໃຫ້ເປັນທີ່ຮູ້ຈັກຫຼາຍຂຶ້ນທັງໃນລາວ ແລະ ໄທ ທີ່ຕິດຕາມຜົນງານການເຄື່ອນໄຫວຂອງ ແພັດ ມາໂດຍຕະຫຼອດ.