ອຸທິຍານສັດເລືອຄານ ອົສຕຣາລີ ກວດສຸຂະພາບ ‘ງູໃຫຍ່’ ສະເຫຼີມສະຫຼອງວັນງູໂລກ

232

ເມື່ອວັນອັງຄານ ທີ 16 ກໍລະກົດ ທີ່ຜ່ານມາ ອຸທິຍານສັດເລືອຄານອົສຕຣາລີ (Australian Reptile Park) ຈັດງານສະແດງການຊັ່ງນ້ໍາໜັກ ແລະ ວັດແທກຄວາມຍາວ “ງູ” ຂະໜາດໃຫຍ່ທີ່ສຸດຂອງອຸທິຍານ ຈໍານວນ 3 ໂຕ ເພື່ອສະເຫຼີມສະຫຼອງ ເນື່ອງໃນວັນງູໂລກ (World Snake Day).

ງູໂຕທໍາອິດຊື່ ນິກກີ້ ມິນາດ (Nikki Minaj) ເປັນງູອະນາຄອນດ້າ ນ້ໍາໜັກ 35 ກິໂລກຣາມ ຄວາມຍາວ 3,9 ແມັດ, ໂຕທີ 2 ຄື ຟຼຸພຟີ (Fluffy) ງູຫຼາມພະມ້າ ນ້ໍາໜັກ 49 ກິໂລກຣາມ ຄວາມຍາວ 4,99 ແມັດ ແລະ ມອນສ໌ເຕີ (Monster) ງູເຫຼືອມໃຫຍ່ ນ້ໍາໜັກ 61 ກິໂລກຣາມ ຄວາມຍາວ 5,53 ແມັດ.

ແດນຽວ ຣໍາຊີ ຫົວໜ້າໜ່ວຍງານດູແລສັດເລືອຄານ ປະຈໍາອຸທິຍານດັ່ງກ່າວ ເຊິ່ງຕັ້ງຢູ່ຫ່າງຈາກນະຄອນຊິດນີ ໄປທາງທິດເໜືອ ປະມານ 70 ກິໂລແມັດ ກ່າວວ່າ ການກວດສຸຂະພາບງູຂະໜາດໃຫຍ່ພິເສດເຫຼົ່ານີ້ ຈໍາເປັນຕ້ອງໃຊ້ເຈົ້າໜ້າທີ່ ທີ່ມີປະສົບການຫຼາຍຄົນເພື່ອຄວາມປອດໄພ ໂດຍສະເພາະ  ມອນສ໌ເຕີ ທີ່ເຄີຍກັດຄົນເບິ່ງແຍງມາແລ້ວ.

“ພວກເຮົາພໍໃຈກັບຜົນກວດສຸຂະພາບຂອງງູ ແຕ່ລະໂຕເປັນຢ່າງຍິ່ງ” ທ່ານຣໍາຊີ ກ່າວ.

“ພວກມັນເຕີບໃຫຍ່ຂຶ້ນຫຼາຍ ທັງນ້ໍາໜັກ ແລະ ຂະໜາດ ແຖມເປັນງູທີ່ສຸຂະພາບແຂງແຮງຫຼາຍ. ນອກຈາກນີ້, ຂ້ອຍກໍ່ບໍ່ເຄີຍຮູ້ສຶກເບື່ອເລີຍ ເວລາເຫັນກຸ່ມຄົນທີ່ປະຫຼາດໃຈກັບລໍາຕົວຂະໜາດໃຫຍ່ຍັກຂອງພວກມັນ ເຊັ່ນມອນສ໌ເຕີ ທີ່ກ່ອນໜ້ານີ້ ມີນ້ໍາໜັກ 57 ກິໂລກຣາມ ຕອນນີ້ນ້ໍາໜັກຂອງມັນເພິ່ມຂຶ້ນມາອີກ 4 ກິໂລກຣາມ ແລ້ວ”.

ສິ່ງສໍາຄັນນອກເໜືອຈາກຄວາມມ່ວນຊື່ນຕື່ນເຕັ້ນຂອງນັກທ່ອງທ່ຽວຄືການເຝົ້າສັງເກດວ່າ ງູພວກນີ້ເຕີບໂຕຂຶ້ນໄດ້ໄວເທົ່າໃດ.

“ສັດເລືອຄານນັ້ນແຕກຕ່າງຈາກສັດລ້ຽງລູກດ້ວຍນົມ ພວກມັນສະແດງສັນຍານຂອງອາການເຈັບປ່ວຍອອກມາໜ້ອຍຫຼາຍ ດັ່ງນັ້ນການສັງເກດຄວາມຍາວ ແລະ ນ້ໍາໜັກຂອງພວກມັນຢ່າງໃກ້ຊິດ ຈຶ່ງເປັນສິ່ງສໍາຄັນ”.

“ພວກເຮົາ ມ່ວນຫຼາຍທີ່ໄດ້ພາງູພວກນີ້ ອອກມາໃຫ້ທຸກຄົນໄດ້ເຫັນ ພວກມັນຄືກັບເປັນການແຂ່ງຂັນຂອງບັນດາງູຍັກຢ່າງແທ້ຈິງ”.