ພົບຜູ້ຕິດເຊື້ອອີໂບລາ ໃນເມືອງໃຫຍ່ຂອງປະເທດດີອາຄອງໂກ

204

ສາທາລະນະລັດ ປະຊາທິປະໄຕຄອງໂກ ພົບຜູ້ຕິດເຊື້ອໄວຣັສອີໂບລາຄົນທໍາອິດ ໃນເມືອງໂກມາ ເຊິ່ງເປັນໜຶ່ງໃນເມືອງໃຫຍ່ຂອງປະເທດ ຍິ່ງເພິ່ມຄວາມກັງວົນໃຫ້ກັບທຸກຝ່າຍທີ່ກ່ຽວຂ້ອງ ຈາກສະຖານະການ ການແຜ່ລະບາດທີ່ຍືດເຍື້ອມາຕັ້ງແຕ່ກາງປີຜ່ານມາ ແລະ ພາກຊີວິດປະຊາຊົນຫຼາຍກວ່າ 1.600 ຄົນ.

ສໍານັກຂ່າວຕ່າງປະເທດລາຍງານຈາກນະຄອນຫຼວງກິນຊາຊາ ສາທາລະນະລັດ ປະຊາທິປະໄຕຄອງໂກ  (DR Congo) ເມື່ອວັນຈັນ ທີ່ໍ 15 ກໍລະກົດ ວ່າ ກະຊວງສາທາລະນະສຸກຂອງດີອາຄອງໂກ ອອກຖະແຫຼງການ ເມື່ອວັນອາທິດ ພົບຜູ້ຕິດເຊື້ອໄວຣັສອີໂບລາຄົນທໍາອິດ ໃນເມືອງໂກມາ ເຊິ່ງເປັນໜຶ່ງໃນເມືອງໃຫຍ່ທີ່ສຸດຂອງປະເທດ ມີປະຊາກອນອາໄສຢູ່ຫຼາຍເຖິງ 1 ລ້ານຄົນ ຈາກຈໍານວນປະຊາກອນຂອງປະເທດ ປະມານ 81 ລ້ານຄົນ ຕັ້ງຢູ່ທາງພາກຕາເວັນອອກໃກ້ກັບເມືອງກິເຊນຢີ ປະເທດຣະວັນດາ  ໂດຍມີພຽງທະເລສາບຄິວູເປັນຊາຍແດນທໍາມະຊາດເທົ່ານັ້ນ. ທັງນີ້ ຜູ້ຕິດເຊື້ອຄົນດັ່ງກ່າວເປັນບາດຫຼວງ ເຊິ່ງອາດມີການສໍາຜັດມືກັບປະຊາຊົນ ເຊິ່ງອາດລວມເຖິງຜູ້ປ່ວຍແຕ່ຍັງບໍ່ຮູ້ວ່າຕົວເອງປ່ວຍ.

ການພົບຜູ້ປ່ວຍຈາກເຊື້ອໄວຣັສອີໂບລາ ໃນເມືອງໃຫຍ່ທີ່ສຸດ ຍິ່ງເພິ່ມຄວາມກັງວົນໃຫ້ກັບທາງການດີອາຄອງໂກ ໂດຍເຈົ້າໜ້າທີ່ສາມາດຕິດຕາມຕົວຜູ້ທີ່ຢູ່ໃກ້ຊິດກັບບາດຫຼວງໃນໄລຍະນີ້ ໄດ້ແລ້ວ 18 ຄົນ ເພື່ອເຂົ້າຮັບການກັກບໍລິເວນ ແລະ ສັກຢາຕ້ານເຊື້ອສໍາລັບສະຖານະການການແຜ່ລະບາດຂອງເຊື້ອໄວຣັສອີໂບລາ ໃນດີອາຄອງໂກ ຄັ້ງນີ້ ເປັນການແຜ່ລະບາດ ຄັ້ງທີ 2 ຕໍ່ຈາກການແຜ່ລະບາດ ລະຫວ່າງ ເດືອນພຶດສະພາ ເຖິງເດືອນກໍລະກົດ ປີຜ່ານມາ ແຕ່ມີຄວາມຮຸນແຮງກວ່າຫຼາຍ ໂດຍຍືດເຍື້ອຕັ້ງແຕ່ເດືອນສິງຫາໃນປີດຽວກັນ ສົ່ງຜົນໃຫ້ມີຜູ້ເສຍຊີວິດແລ້ວຢ່າງໜ້ອຍ 1.655 ຄົນ ແລະ ມີຜູ້ປ່ວຍສະສົມອີກຫຼາຍພັນຄົນ ສ່ວນຈໍານວນປະຊາຊົນທີ່ໄດ້ເຂົ້າຮັບການສັກຢາຕ້ານເຊື້ອແລ້ວຢ່າງໜ້ອຍ 160.239 ຄົນ ຕາມສະຖິຕິຂອງລັດຖະບານດີອາຄອງໂກບັກທຶກ.

ຢ່າງໃດກໍ່ຕາມ ອົງການອະນາໄມໂລກ (WHO: World Health Organization) ພັດມີມະຕິເມື່ອກາງເດືອນມິຖຸນາ ຜ່ານມາ ຄືການຍັງບໍ່ປະກາດໃຫ້ສະຖານະການການແຜ່ລະບາດຂອງເຊື້ອໄວຣັສອີໂບລາ ໃນດີອາຄອງໂກ ເຊິ່ງຂ້າມຊາຍແດນໄປປະເທດຢູການດາ ຈົນມີຜູ້ເສຍຊີວິດແລ້ວ 3 ຄົນ ໃຫ້ເປັນ “ພາວະສຸກເສີນດ້ານສາທາລະນະສຸກລະຫວ່າງປະເທດ” ໂດຍຢືນຢັນວ່າ ດັບເບິລຢູເອັດຈ໌ໂອ “ຍັງສາມາດຄວບຄຸມສະຖານະການໄດ້”.