ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ຮ່ວມປ່ອຍປາທີ່ແຂວງໄຊຍະບູລີ

232

ໃນຕອນເຊົ້າຂອງວັນທີ 12 ກໍລະກົດ 2019 ທີ່ບ້ານປົ່ງ ເມືອງໄຊຍະບູລີ ແຂວງໄຊຍະບູລີ ໄດ້ຈັດພິທີປ່ອຍປາລົງສາຍນໍ້າຮຸ່ງ ເນື່ອງໃນໂອກາດວັນປ່ອຍປາ ແລະ ອະນຸລັກສັດນໍ້າ-ສັດປ່າ ແຫ່ງຊາດ 13 ກໍລະກົດ ຄົບຮອບ 14 ປີ, ໂດຍການໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ມີ ທ່ານ ພົງສະຫວັນ ສິດທະວົງ ເຈົ້າແຂວງໆໄຊຍະບູລີ, ມີບັນດາທ່ານຮອງລັດຖະມົນຕີ, ອໍານາດການປົກຄອງແຂວງໄຊຍະບູລີ, ບັນດາພະແນກການ ພ້ອມດ້ວຍປະຊາຊົນແຂວງໄຊຍະບູລີ ເຂົ້າຮ່ວມຢ່າງພ້ອມພຽງ.

ໃນພິທີ ທ່ານ ສົມຫວັງ ແກ້ວວິໄລສັກ ກຳມະການພັກແຂວງ, ຫົວໜ້າພະແນກກະສິກໍາ ແລະ ປ່າໄມ້ແຂວງໄຊຍະບູລີ ໄດ້ກ່າວວ່າ: ເພື່ອຈັດຕັ້ງປະຕິບັດກົດໝາຍ ວ່າດ້ວຍສັດນໍ້າ-ສັດປ່າ ແລະ ບັນດານິຕິກໍາທີ່ກ່ຽວຂ້ອງ ໃນໄລຍະທີ່ຜ່ານມາອໍານາດການປົກຄອງແຂວງໄຊຍະບູລີ ໄດ້ເອົາໃຈໃສ່ໃນນໍາພາຊີ້ນໍາ ແລະ ໃຫ້ຄວາມສໍາຄັນຕໍ່ວຽກງານປົກປັກຮັກສາຊັບພະຍາກອນທໍາມະຊາດ ເປັນຕົ້ນ ສັດນໍ້າ-ສັດປ່າ ແລະ ຊີວະນາໆພັນ ເພື່ອເຮັດໃຫ້ຊັບພະຍາກອນທໍາມະຊາດ ມີຄວາມອຸດົມສົມບູນຍິ່ງຂຶ້ນ ໄປຄຽງຄູ່ກັບການນໍາໃຊ້ຊັບພະຍາກອນທໍາມະຊາດ ບໍ່ໃຫ້ບົກແຫ້ງ ຕາມແນວທາງນະໂຍບາຍທີ່ພັກ-ລັດວາງອອກ.

ດັ່ງນັ້ນ, ໃນວັນທີ 12 ກໍລະກົດ 2019 ເປັນວັນປ່ອຍປາ ແລະ ອະນຸລັກສັດນໍ້າ-ສັດປ່າ ຄົບຮອບ 14 ປີ ກົງກັບວັນຄ້າຍວັນເກີດຂອງທ່ານ ປະທານສຸພານຸວົງ ຄົບຮອບ 110 ປີ ແລະ ວັນກິລາລາວ ຄົບຮອບ 53 ປີ, ເວົ້າລວມ, ເວົ້າສະເພາະ ເພື່ອເປັນການສົ່ງເສີມການລ້ຽງປາແບບຄອບຄົວ ແລະ ປ່ອຍຄືນຊູ່ທໍາມະຊາດ ບັນດາຂະແໜງການທີ່ກ່ຽວຂ້ອງ ໄດ້ຊຸກຍູ້ສົ່ງເສີມໃຫ້ທຸກພາກສ່ວນໃນສັງຄົມເຂົ້າຮ່ວມໃນຂະບວນການດັ່ງກ່າວ ພ້ອມທັງ ມີມາດຕະການໃນຄຸ້ມຄອງ ແລະ ປົກປັກຮັກສາວຽກງານດັ່ງກ່າວ ເປັນຢ່າງດີ, ໃນປີນີ້ແຂວງໄດ້ມີການບວດວັງນໍ້າ ຫ້າມບໍ່ໃຫ້ຫາປາ ແລະ ສັດນໍ້າອື່ນໆ ໃນບໍລິເວນແຕ່ບ້ານວັງຊອຍ-ບ້ານນາຕໍໃຫຍ່ ເຮັດໃຫ້ສັດນໍ້າໃນບໍລິເວນດັ່ງກ່າວ ມີການແຜ່ພັນ ແລະ ມີຈໍານວນເພີ່ມຂຶ້ນໃນແຕ່ລະປີ. ສໍາລັບວັນປ່ອຍປາ ແລະ ສັດນໍ້າ-ສັດປ່າ ໃນປີນີ້ ແຂວງໄດ້ມີແຜນປ່ອຍປາ ໃຫ້ໄດ້ທັງໝົດ 42 ລ້ານໂຕ, ໃນນີ້ປ່ອຍປາລວມໝູ່ ມີ 55 ຈຸດ, ສະເພາະປ່ອຍຢູ່ເມືອງໄຊຍະບູລີ ມື້ນີ້ ຈະປ່ອຍປາລົງຈໍານວນ 8 ແສນກວ່າໂຕ ປະກອບມີ ປານິນ, ປາໄນ, ປາປາກ, ປາອິນເດຍ, ປາກິນຫຍ້າ, ປາດຸກ, ປາເກັດແລບ ແລະ ກົບ.

ຮູບ ແລະ ຂ່າວ: ກົມປະຊາສຳພັນ, ຫ້ອງວ່າການສໍານັກງານນາຍົກລັດຖະມົນຕີ