ຝຣັ່ງ ອອກກົດໝາຍເກັບພາສີບໍລິສັດເທັກໂນໂລຢີຂ້າມຊາດ

197

ຝຣັ່ງ ເປັນປະເທດເສດຖະກິດຂະໜາດໃຫຍ່ແຫ່ງທໍາອິດ ໃນເອີຣົບທີ່ອອກກົດໝາຍເກັບພາສີຈາກບໍລິສັດເທັກໂນໂລຢີຂ້າມຊາດຂະໜາດໃຫຍ່ ສ້າງຄວາມບໍ່ພໍໃຈຢ່າງໜັກໃຫ້ແກ່ລັດຖະບານອາເມຣິກາ.

ສໍານັກຂ່າວຕ່າງປະເທດລາຍງານຈາກນະຄອນຫຼວງປາຣີສ ປະເທດຝຣັ່ງ ເມື່ອວັນສຸກ ທີ 12 ກໍລະກົດ ວ່າ ສະມາຊິກສະພາຝຣັ່ງ ມີມະຕິສຽງຂ້າງຫຼາຍໃນການປະຊຸມ ເມື່ອວັນພະຫັດ ຜ່ານມາ ຮັບຮອງເອົາຮ່າງກົດໝາຍທີ່ສົ່ງຕໍ່ຂຶ້ນມາຈາກສະພາຜູ້ແທນປະຊາຊົນ ວ່າດ້ວຍການຮຽກເກັບພາສີເງິນໄດ້ນິຕິບຸກຄົນ ຈາກບໍລິສັດເທັກໂນໂລຢີລາຍໃຫຍ່ຂ້າມຊາດທີ່ເຂົ້າມາຕັ້ງສໍານັກງານໃຫຍ່ໃນປະເທດ ຖືເປັນປະເທດເສດຖະກິດຂະໜາດໃຫຍ່ແຫ່ງທໍາອິດຂອງໂລກ ທີ່ອອກກົດໝາຍດັ່ງກ່າວ ເຊິ່ງເອີ້ນກັນແບບຄໍາຫຍໍ້ວ່າ  “ກາຟາ (GAFA)” ແທນ ກູເກິລ (Google) ແອັບເປິລ (Apple) ເຟສບຸ໊ກ (Facebook) ແລະ ອາມາຊອນ (Amazon).

ທັງນີ້ ອັດຕາພາສີຂັ້ນຕໍ່າແມ່ນ 3% ສໍາລັບລາຍໄດ້ຂອງບໍລິສັດເທັກໂນໂລຢີທີ່ມີລາຍໄດ້ໝຸນວຽນໃນຕະຫຼາດຝຣັ່ງ ຢ່າງໜ້ອຍ 25 ລ້ານເອີໂຣ (ປະມານ 246 ຕື້ກີບ) ແລະ ຫຼາຍກວ່າ 750 ລ້ານເອີໂຣ ໃນຕະຫຼາດໂລກ (ປະມານ 7.380 ຕື້ກີບ) ເຊິ່ງການຮຽກເກັບພາສີຈະຢ້ອນຫຼັງ ຕັ້ງແຕ່ຕົ້ນປີນີ້ ແລະ ເບື້ອງຕົ້ນລັດຖະບານປາຣີສຄາດວ່າ ຈະສາມາດສ້າງລາຍໄດ້ເຂົ້າປະເທດປະມານ 400 ລ້ານເອີໂຣ ໃນປີນີ້ (ປະມານ 3.930 ຕື້ກີບ).

ປັດຈຸບັນ ກຸເກິລ, ເຟສບຸ໊ກ ແລະ ແອັບເປິລ ຕັ້ງສໍານັກງານໃຫຍ່ໃນເອີຣົບ ຢູ່ປະເທດໄອແລນ ສ່ວນອາມາຊອນ ຕັ້ງຢູ່ປະເທດລັກເຊມເບີກ ເຊິ່ງເປັນພຽງບໍ່ເທົ່າໃດປະເທດໃນທະວີບແຫ່ງນີ້ ທີ່ຮຽກເກັບພາສີເງິນໄດ້ນິຕິບຸກຄົນໃນອັດຕາຕໍ່າ ຢ່າງໃດກໍ່ຕາມ ລາຍໄດ້ສ່ວນໃຫຍ່ຂອງບໍລິສັດເຫຼົ່ານີ້ລ້ວນມາຈາກກຸ່ມປະເທດເສດຖະກິດຂະໜາດໃຫຍ່ ທັງເຢຍລະມັນ, ຝຣັ່ງ ແລະ ສະຫະຣາຊະອານາຈັກ.

ແນ່ນອນ ກົດໝາຍດັ່ງກ່າວຂອງຝຣັ່ງ ສ້າງຄວາມບໍ່ພໍໃຈຢ່າງໜັກໃຫ້ກັບລັດຖະບານຂອງປະທານາທິບໍດີໂດນັລ ທຣໍາ ໂດຍ ທ່ານໂຣເບີດ ໄລທິເຊີ ຜູ້ແທນເຈລະຈາການຄ້າຂອງລັດຖະບານອາເມຣິກາ ກ່າວວ່າ ສະຫະລັດຈະກວດສອບກົດໝາຍນີ້ “ຢ່າງລະອຽດ” ໂດຍອາໄສອໍານາດຕາມຄວາມໃນມາຕາ 301 ຂອງກົດໝາຍການຄ້າ ວ່າ ເຂົ້າຂ່າຍເປັນການກີດກັນການຄ້າ ຫຼື ບໍ່ ແລະ ຖ້າມີມູນ ລັດຖະບານອາເມຣິກາອາດຈະຕອບໂຕ້ດ້ວຍມາດຕະການກໍາແພງພາສີ ດ້ານ ທ່ານບຣູໂນ ເລີແມ ລັດຖະມົນຕີວ່າການກະຊວງເສດຖະກິດຂອງຝຣັ່ງ ກ່າວວ່າ “ຄໍາຂົ່ມຂູ່” ຂອງສະຫະລັດບໍ່ອາດປັບປ່ຽນທ່າທີຂອງລັດຖະບານປາຣີສ ໃນເລື່ອງນີ້ໄດ້.