ເໜືອ-ໃຕ້ ພຽງ 8 ຊົ່ວໂມງ! ຫວຽດນາມ ຈະສ້າງລົດໄຟຄວາມໄວສູງ ເຊື່ອມຕໍ່ ຮາໂນ່ຍ – ໂຮຈິມິນ

432

ສື່ທ້ອງຖິ່ນຂອງຫວຽດນາມລາຍງານ ເມື່ອວັນພຸດ ທີ 10 ກໍລະກົດ ຜ່ານມາ ວ່າ ໂຄງການກໍ່ສ້າງເສັ້ນທາງລົດໄຟຄວາມໄວສູງເຊື່ອມລະຫວ່າງ ພາກເຫນືອ ກັບ ພາກໃຕ້ ຂອງປະເທດຫວຽດນາມຈະໃຊ້ງົບປະມານ 26.000 ລ້ານໂດລາ (ປະມານ 225.000 ຕື້ກີບ) ເຊິ່ງຈະອໍານວຍຄວາມສະດວກໃຫ້ປະຊາຊົນເດີນທາງຈາກນະຄອນຫຼວງຮາໂນ່ຍ ໄປ ໂຮຈິມິນ ໄດ້ພາຍໃນ 8 ຊົ່ວໂມງ.

ສໍານັກຂ່າວຫວຽດນາມ ນິວສ໌ ລາຍງານວ່າ ກະຊວງແຜນການ ແລະ ການລົງທຶນ (Ministry of Planning and Investment – MPI) ຂອງຫວຽດນາມ ກ່າວອ້າງອີງວິເຄາະຕົ້ນທຶນ ແລະ ປະສິດທິພາບ ໂດຍຜູ້ຊ່ຽວຊານຈາກປະເທດເຢຍລະມັນ ແລະ ໂຮນລັງ ເຊິ່ງລະບຸວ່າ ໄລຍະທາງທີ່ຍາວໄກຫຼາຍພັນກິໂລແມັດ ເສັ້ນທາງລົດໄຟດັ່ງກ່າວຈະຕ້ອງແລ່ນດ້ວຍຄວາມໄວສູງສຸດ 200 ກິໂລແມັດຕໍ່ຊົ່ວໂມງ ຈຶ່ງຈະກຸ້ມທຶນ ແລະ ມີປະສິດທິຜົນ.

ກ່ອນໜ້ານີ້ ກະຊວງຄົມມະນາຄົມຂອງຫວຽດນາມສະເໜີແຜນກໍ່ສ້າງເສັ້ນທາງລົດໄຟຄວາມໄວສູງສາຍໃໝ່ ເຊິ່ງຈະກໍານົດໃຫ້ລົດໄຟໃຊ້ຄວາມໄວສູງສຸດ 320 ກິໂລແມັດຕໍ່ຊົ່ວໂມງ ແລະ ຄາດວ່າຈະຕ້ອງໃຊ້ງົບປະມານສູງເຖິງ 58.700 ລ້ານໂດລາ (ປະມານ 510.000 ຕື້ກີບ) ໃນໄລຍະເວລາ 30 ປີ ລະຫວ່າງປີ 2020-2050.

ກະຊວງຄົມມະນາຄົມ ລະບຸວ່າ ໂຄງການເສັ້ນທາງລົດໄຟດັ່ງກ່າວຈະດໍາເນີນການພາຍໃຕ້ຮູບແບບຫຸ້ນສ່ວນ ລະຫວ່າງ ລັດ ແລະ ເອກະຊົນ ໂດຍ 80% ຂອງງົບການລົງທຶນຈະໄດ້ຮັບການຈັດສັນມາຈາກງົບປະມານຂອງລັດ ແລະ ສ່ວນທີ່ເຫຼືອຈະມາຈາກພາກເອກະຊົນ.

ຢ່າງໃດກໍ່ຕາມ ອະດີດລັດຖະມົນຕີກະຊວງຄົມມະນາຄົມຂອງຫວຽດນາມ ລະບຸວ່າ ງົບປະມານເບື້ອງຕົ້ນ 58.700 ລ້ານໂດລາ ນັ້ນ ຈະເປັນພະລະໜັກຕໍ່ເສດຖະກິດຫວຽດນາມ ເນື່ອງຈາກເປັນມູນຄ່າສູງກວ່າງົບປະມາລາຍປີ ທີ່ລັດຈັດສັນໃຫ້ກັບການພັດທະນະລະບົບໂຄງສ້າງພື້ນຖານດ້ານຄົມມະນາຄົມເຖິງ 5 ເທົ່າ.

ທັງນີ້ ຖ້ານາຍົກລັດຖະມົນຕີຫວຽດນາມ ອະນຸມັດໂຄງການລົດໄຟຄວາມໄວສູງ ແລ່ນແຕ່ເໜືອ – ໃຕ້ ຈະນໍາໄປສູ່ຂັ້ນຕອນຕໍ່ໄປ ໂດຍໃຫ້ສະພານິຕິບັນຍັດຂອງຫວຽດນາມລົງມະຕິ ວ່າ ຈະໃຫ້ເດີນໜ້າຕໍ່ ຫຼື ບໍ່.

ອີກປະການໜຶ່ງ ຂໍ້ມູນຈາກສໍານັກງານສະຖິຕິທົ່ວໄປ (General Statistics Office) ຂອງຫວຽດນາມ ລະບຸວ່າ ໃນໄລຍະເຄິ່ງທໍາອິດຂອງປີ 2019 ພາກການລົດໄຟຂອງຫວຽດນາມຮອງຮັບຜູ້ໂດຍສານ 4,2 ລ້ານຄົນ ແລະ ສິນຄ້າ 2,6 ລ້ານໂຕ້ນ ຫຼຸດລົງ 6,8% ແລະ 10,4% ຕາມລໍາດັບເມື່ອທຽບປີຕໍ່ປີ.

ຂໍ້ມູນທີ່ກ່ຽວຂ້ອງ vietnamnews