ຢູເນສໂກ ຮັບຮອງ ໄຊປຸຣະ ‘ນະຄອນສີບົວ’ ເປັນມໍລະດົກໂລກແຫ່ງໃໝ່

229

ໄຊປຸລະ (Jaipur) ຫຼື ເປັນທີ່ຮູ້ຈັກກັນໃນຊື່ “ນະຄອນສີບົວ” ຂອງອິນເດຍໄດ້ຮັບການຂຶ້ນທະບຽນເປັນ ມໍລະດົກໂລກ ໂດຍອົງການການສຶກສາວິທະຍາສາດ ແລະ ວັດທະນະທໍາແຫ່ງສະຫະປະຊາຊາດ (UNESCO) ເມື່ອວັນເສົາ ທີ 6 ກໍລະກົດ ຜ່ານມາ.

ກະຊວງວັດທະນະທໍາຂອງອິນເດຍ ຖະແຫຼງການ ວ່າ ຖືເປັນອີກໜຶ່ງຄວາມສໍາເລັດຄັ້ງສໍາຄັນ ນະຄອນໄຊປຸຣະ ຂອງລັດຣາຊສະຖານ ໄດ້ເປັນສ່ວນໜຶ່ງໃນລາຍການມໍລະດົກໂລກຂອງຢູເນສໂກ ລະຫວ່າງການປະຊຸມຄະນະກໍາມະການມໍລະດົກໂລກ ຄັ້ງທີ 43  ທີ່ນະຄອນຫຼວງບາກູ ປະເທດອາເຊີໄບຈານ.

ທັງນີ້ ນະຄອນໄຊປຸຣະເປັນເມືອງຫຼວງຂອງລັດຣາຊສະຖານ ມີຊື່ສຽງໄປທົ່ວໂລກຈາກສະຖາປັດຕະຍາກໍາ ວັດທະນະທໍາ ແລະ ການທ່ອງທ່ຽວ.

ໃນຖະແຫຼງການໄດ້ກ່າວເສີມວ່າ ຫຼັງຈາກນະຄອນໄຊປຸຣະ ກາຍເປັນມໍລະດົກໂລກແຫ່ງໃໝ່ ເຮັດໃຫ້ອິນເດຍມີແຫຼ່ງມໍລະດົກໂລກ ທັງໝົດ 38 ແຫ່ງ ໃນປັດຈຸບັນ ໂດຍແບ່ງເປັນພື້ນທີ່ທາງວັດທະນະທໍາ 30 ແຫ່ງ ພື້ນທີ່ທາງທໍາມະຊາດ 7 ແຫ່ງ ແລະ ພື້ນທີ່ລວມທັງສອງຢ່າງ 1 ແຫ່ງ.

ດ້ານ ທ່ານນະເຣນທຣາ ໂມດີ ນາຍົກລັດຖະມົນຕີປະເທດອິນເດຍ ຮ່ວມສະແດງຄວາມຍິນດີກັບຄວາມສໍາເລັດດັ່ງກ່າວ ແລະ ກ່າວວ່າ ນະຄອນໄຊປຸຣະ ເປັນເມືອງແຫ່ງວັດທະນະທໍາ ແລະ ຄວາມກ້າຫານ ດຶງດູດນັກທ່ອງທ່ຽວຈາກທົ່ວທຸກມູມໂລກມາສໍາຜັດຄວາມງົດງາມ ແລະ ຄວາມຄຶກຄື້ນ.