ເສັ້ນທາງສະຖານີລົດໄຟ ບ້ານຄຳສະຫວດ ຄາດສໍາເລັດ ປີ 2021

215

ສໍານັກຂ່າວເສດຖະກິດ-ການຄ້າ ລາຍງານເມື່ອວັນອັງຄານ ທີ 2 ກໍລະກົດ ວ່າ ໂຄງການກໍ່ສ້າງເສັ້ນທາງລົດໄຟຊ່ວງຕໍ່ຈາກທ່ານາແລ້ງ ເຂົ້າສູ່ຕົວເມືອງນະຄອນຫຼວງວຽງຈັນ ທີ່ສະຖານີບ້ານຄຳສະຫວາດ ເມືອງໄຊເສດຖາ, ຫຼັງຈາກນັ້ນ ສໍາລັບຜູ້ໂດຍສານທີ່ມີຈຸດປະສົງໄປໃຊ້ບໍລິການລົດໄຟລາວໄປໜອງຄາຍ ແລະ ກຸງເທບມະຫານະຄອນ ປະເທດໄທ ຈະໃຊ້ເວລາພຽງບໍ່ເທົ່າໃດນາທີກໍ່ຮອດ ເພາະຫ່າງຈາກຕົວເມືອງພຽງ 4 ກິໂລແມັດ ເທົ່ານັ້ນ.

 ການກໍ່ສ້າງເສັ້ນທາງລົດໄຟຕໍ່ຊ່ວງຈາກສະຖານີທ່ານາແລ້ງ ຫາ ບ້ານຄຳສະຫວາດ ເມືອງໄຊເສດຖາ ເປັນໂຄງການທີ່ທາງອົງການທາງລົດໄຟມີເປົ້າໝາຍສ້າງມາດົນແລ້ວ ແຕ່ເນື່ອງຈາກເງື່ອນໄຂ ຫຼາຍຢ່າງທີ່ຍັງບໍ່ພ້ອມ ໂດຍສະເພາະເລື່ອງງົບປະມານ ຈຶ່ງເຮັດໃຫ້ໂຄງການດັ່ງກ່າວແກ່ຍາວມາຫຼາຍປີ ແຕ່ແນວໃດກໍ່ຕາມ ປັດຈຸບັນແມ່ນໄດ້ແຫຼ່ງທຶນພ້ອມແລ້ວທີ່ຈະດຳເນີນການກໍ່ສ້າງເສັ້ນທາງລົດໄຟ ຈາກຂົວມິດຕະພາບລາວໄທ ແຫ່ງທີ I ທ່ານາແລ້ງເຂົ້າມາຫາສູນກາງນະຄອນຫຼວງວຽງຈັນ ລວມຄວາມຍາວເປັນໄລຍະ 11 ກິໂລແມັດ ກໍາລັງຈະເປັນຄວາມຈິງຂຶ້ນມາ ພາຍຫລັງການເຊັນບົດບັນທຶກ ຄວາມເຂົ້າໃຈ ລະຫວ່າງ ກົມທາງລົດໄຟ ກະຊວງໂຍທາ ແລະ ຂົນສົ່ງ ຮ່ວມກັບ ບໍລິສັດ Sermsanguan Construction ຈໍາກັດ ຈາກປະເທດໄທ.

ໂຄງການເຟສ II ດັ່ງກ່າວ ແມ່ນໄດ້ຮັບງົບປະມານ ການຊ່ວຍເຫຼືອລ້າຈາກປະເທດໄທ 30% ແລະ ອີກ 70% ໃນຮູບແບບ ການກູ້ຍືມ ດອກເບ້ຍຕໍ່າ ໂດຍສະຖານີແຫ່ງໃໝ່ນີ້ ຕັ້ງຢູ່ໃກ້ສູນກາງຂອງນະຄອນຫຼວງວຽງຈັນ ແມ່ນສະຖານີ ທີ່ຕັ້ງຢູ່ບ້ານ ຄໍາສະຫວາດ (ປະມານ 4 ກມ ຈາກ ທາດຫຼວງວຽງຈັນ). ການກໍ່ສ້າງເສັ້ນທາງລົດໄຟ ພາກຂະຫຍາຍນີ້ ຄາດວ່າຈະໃຫ້ສໍາເລັດ ໃນທ້າຍປີ 2021.

Credit: Laoedaily