ທຣໍາ ສ້າງປະຫວັດສາດຜູ້ນໍາອາເມຣິກາຢຽບແຜ່ນດິນເກົາຫຼີເໜືອ

209

ປະທານາທິບໍດີໂດນັລ ທຣໍາ ສ້າງປະຫວັດສາດເປັນຜູ້ນໍາອາເມຣິກາໃນຕໍາແໜ່ງຄົນທໍາອິດ ທີ່ຍ່າງຂ້າມເຂດປອດທະຫານເທິງເຂດມະຫາສະໝຸດເກົາຫຼີໄປຫາຝັ່ງເກົາຫຼີເໜືອ.

ສໍານັກຂ່າວຕ່າງປະເທດລາຍງານຈາກນະຄອນຫຼວງໂຊ ປະເທດເກົາຫຼີໃຕ້ ເມື່ອວັນອາທິດ ທີ 30 ມິຖຸນາ ວ່າ ປະທານາທິບໍດີໂດນັລ ທຣໍາ ຍ່າງຂ້າມເສັ້ນແບ່ງເຂດແດນທາງທະຫານ (MDL: Military Demarcation Line ) ທີ່ແບ່ງເຄິ່ງກາງໝູ່ບ້ານປັນມຸນຈອມ ເທິງເຂດປອດທະຫານຂອງເຂດມະຫາສະໝຸດເກົາຫຼີໄປຝັ່ງເກົາຫຼີເໜືອ ເມື່ອໄລຍະບ່າຍຂອງວັນອາທິດ ຕາມເວລາທ້ອງຖິ່ນ ເພື່ອຈັບມືທັກທາຍ ແລະ ຖ່າຍຮູບຮ່ວມກັບ ທ່ານຄິມ ຈອງ-ອຶນ ຜູ້ນໍາສູງສຸດຂອງເກົາຫຼີເໜືອ ສ້າງປະຫວັດສາດເປັນຜູ້ນໍາອາເມຣິກາໃນຕໍາແໜ່ງຄົນທໍາອິດ ທີ່ຂ້າມເຂດແດນໄປເກົາຫຼີເໜືອ ເຖິງໃຊ້ເວລາບໍ່ເທົ່າໃດນາທີກໍ່ຕາມ.

ຫຼັງຈາກນັ້ນ ຜູ້ນໍາໜຸ່ມຂອງເກົາຫຼີເໜືອກໍ່ຍ່າງຂ້າມເສັ້ນເອັມດີແອລມາທາງຝັ່ງເກົາຫຼີໃຕ້ ເພື່ອຈັບມືທັກທາຍກັບປະທານາທິບໍດີມຸນ ແຈ-ອິນ ໂດຍມີການສົນທະນາກັນໜ້ອຍໜຶ່ງ ກ່ອນທີ່ຜູ້ນໍາເກົາຫຼີໃຕ້ຈະເຊີນທັງສອງໄປພົບຫາລືກັນທີ່ຫ້ອງຮັບຮອງ ພາຍໃນອາຄານສັນຕິພາບເທິງເຂດປອດທະຫານ ຝັ່ງເກົາຫຼີໃຕ້ ເຊິ່ງ ທຣໍາ ກ່າວວ່າ ຕົນຮູ້ສຶກເປັນກຽດຢ່າງຍິ່ງ ທີ່ໄດ້ມີໂອກາດພົບກັບ ຄິມ ອີກຄັ້ງ ນັບຕັ້ງແຕ່ການພົບຫາລືກັນທີ່ນະຄອນຫຼວງຮາໂນ່ຍ ປະເທດຫວຽດນາມ ເມື່ອທ້າຍເດືອນກຸມພາ ທີ່ຜ່ານມາ ແລະ ເຊື່ອໝັ້ນວ່າ ການພົບກັນຄັ້ງນີ້ ຈະເປັນຈຸດເລິ່ມຕົ້ນ ແລະ ການປູທາງໃຫ້ເຂດມະຫາສະໝຸດເກົາຫຼີ ເຂົ້າໃກ້ສັນຕິພາບຫຼາຍຍິ່ງຂຶ້ນ ພ້ອມທັງກ່າວດ້ວຍວ່າຈະເຊີນຜູ້ນໍາໜຸ່ມຂອງເກົາຫຼີເໜືອຢ້ຽມຢາມນະຄອນຫຼວງວໍຊິງຕັນຢ່າງເປັນທາງການດ້ວຍ ດ້ານ ທ່ານຄິມ ກໍ່ບໍ່ໄດ້ກ່າວຫຍັງຫຼາຍ ແຕ່ສະແດງຄວາມຫວັງວ່າ ການພົບກັບຜູ້ນໍາອາເມຣິກາໃນຄັ້ງນີ້ ຈະຍິ່ງເປັນການສ້າງຄວາມສໍາພັນ ແລະ ຊ່ວຍໃຫ້ທັງສອງປະເທດກ້າວຂ້າມຜ່ານອຸປະສັກ ແລະ ສິ່ງທ້າທາຍຕ່າງໆໄດ້.