ຄິມ ຈອງ-ອຶນ ຕອບຮັບຄໍາເຊີນ ທຣໍາ ພົບກັນທີ່ເຂດປອດທະຫານ

232

ປະທານາທິບໍດີໂດນັລ ທຣໍາ ແລະ ທ່ານຄິມ ຈອງ-ອຶນ ຜູ້ນໍາສູງສຸດຂອງເກົາຫຼີເໜືອຈະພົບຫາລືກັນທີ່ເຂດປອດທະຫານເທິງເຂດມະຫາສະໝຸດເກົາຫຼີ ວັນອາທິດ ທີ 30 ມິຖຸນາ ຫຼັງຜູ້ນໍາສະຫະລັດເຊີນອີກຝ່າຍຜ່ານທາງທະວິດເຕີ.

ສໍານັກຂ່າວຕ່າງປະເທດລາຍງານຈາກນະຄອນຫຼວງໂຊ ປະເທດເກົາຫຼີໃຕ້ ເມື່ອວັນອາທິດ ທີ 30 ມິຖຸນາ ວ່າ ປະທານາທິບໍດີໂດນັລ ທຣໍາ ຖະແຫຼງ ເມື່ອວັນອາທິດ ທີ່ທໍານຽບປະທານາທິບໍດີເຂດຊານເມືອງນະຄອນຫຼວງໂຊ ຫຼັງພົບຫາລືກັບປະທານາທິບໍດີມຸນ ແຈ-ອິນ ຜູ້ນໍາເກົາຫຼີໃຕ້ ວ່າ ຕົນ ແລະ ທ່ານຄິມ ຈອງ-ອຶນ ຜູ້ນໍາສູງສຸດຂອງເກົາຫຼີເໜືອຈະພົບຫາລືກັນທີ່ໝູ່ບ້ານປັນມຸນຈອມ ເຂດປອດທະຫານ ດີເອັມຊີ (DMZ: Korean Demilitarized Zone) ເທິງເຂດມະຫາສະໝຸດເກົາຫຼີ ໃນໄລຍະຕອນແລງຂອງວັນດຽວກັນນີ້ ຕາມເວລາທ້ອງຖິ່ນ ແຕ່ກ່າວວ່າ ການພົບລາລືຄັ້ງນີ້ ຈະໃຊ້ເວລາບໍ່ດົນ.

ຄວາມເຄື່ອນໄຫວດັ່ງກ່າວເກີດຂຶ້ນພຽງວັນດຽວ ຫຼັງ ທຣໍາ ທະວີດຂໍ້ຄວາມເມື່ອວັນເສົາ ໂດຍມີເນື້ອໃນຊັດເຈນ ວ່າ ຕ້ອງການສົ່ງສານເຖິງຜູ້ນໍາໜຸ່ມເກົາຫຼີເໜືອ ໂດຍ ທຣໍາ ບອກວ່າ ຫຼັງສໍາເລັດການປະຊຸມສຸດຍອດຜູ້ນໍາກຸ່ມປະເທດເສດຖະກິດຂະໜາດໃຫຍ່ “ຈີ20” ທີ່ເມືອງໂອຊາກ້າ ປະເທດຍີ່ປຸ່ນ ຕົນຈະເດີນທາງຢ້ຽມຢາມເກົາຫຼີໃຕ້ເປັນຈຸດໝາຍຕໍ່ໄປ “ແລະ ຈະເປັນໄປໄດ້ ຫຼື ບໍ່” ຖ້າຕົນຈະໄດ້ມີໂອກາດພົບກັບຜູ້ນໍາໜຸ່ມຂອງເກົາຫຼີເໜືອ ທີ່ ດີເອັມຊີ ເຖິງຈະເປັນພຽງການຈັບມືທັກທາຍກັນກໍ່ຕາມ.

ຂະນະທີ່ ຕໍ່ມາກະຊວງການຕ່າງປະເທດຂອງເກົາຫຼີເໜືອມີຖະແຫຼງການສັ້ນໆ ຜ່ານສໍານັກຂ່າວກາງເກົາຫຼີ (KCNA: Korean Central News Agency) ວ່າ ຂໍ້ສະເໜີຂອງຜູ້ນໍາອາເມຣິກາ “ໜ້າສົນໃຈ” ດ້ານຜູ້ນໍາເກົາຫຼີໃຕ້ ກ່າວວ່າ ການພົບຫາລືທີ່ໝູ່ບ້ານປັນມຸນຈອມ ຄັ້ງນີ້ ຈະເປັນຫາລືລະຫວ່າງ ຜູ້ນໍາອາເມຣິກາ ກັບ ຜູ້ນໍາເກົາຫຼີເໜືອເທົ່ານັ້ນ ທ່ານມຸນ ແຈ-ອິນ ເຜີຍວ່າ ຕົນຈະເດີນທາງໄປເຂດປອດທະຫານພ້ອມກັບ ທຣໍາ ດ້ວຍ ແລະ ເຖິງວ່າໄດ້ຮັບເຊີນໃຫ້ເຂົ້າຮ່ວມການພົບຫາລືຄັ້ງນີ້ເຊັ່ນກັນ ແຕ່ເມື່ອພິຈາລະນາແລ້ວເຫັນວ່າ ການພົບກັນລະຫວ່າງ ຕົນ ກັບ ຄິມ “ຄວນເກີດຂຶ້ນເວລາອື່ນດີກວ່າ” ນອກຈາກນີ້, ທ່ານມຸນ ກ່າວຊື່ນຊົມ “ຄວາມກ້າຫານ” ຂອງປະທານາທິບໍດີອາເມຣິກາ ແລະ ຜູ້ນໍາສູງສຸດຂອງເກົາຫຼີເໜືອ ໃນການມາພົບກັນທີ່ເຂດປອດທະຫານເຂດສະໝຸດເກົາຫຼີ ແລະ ໝັ້ນໃຈວ່າ ຈະເປັນສັນຍານທີ່ດີ ສູ່ຂະບວນການປົດນິວເຄຣຍ ແລະ ສ້າງສັນຕິພາບເທິງເຂດສະໝຸດເກົາຫຼີທີ່ຢຸດຊະງັກໄປ ຕັ້ງແຕ່ ຮາໂນ່ຍ ຊໍາມິດ ເມື່ອເດືອນກຸມພາ ຜ່ານມາ.

ໃນເວລາດຽວກັນ ມີລາຍງານດ້ວຍວ່າ ເຈົ້າໜ້າທີ່ຝ່າຍຄວາມໝັ້ນຄົງປະຈໍາເຂດປອດທະຫານຂອງທັງສອງປະເທດໄດ້ປິດພື້ນທີ່ທັງໝົດຂອງເຂດປອດທະຫານອອກຈາກນັກທ່ອງທ່ຽວແລ້ວ ຄາດວ່າ ເພື່ອຈັດກຽມສະຖານທີ່ຍິ່ງເປັນການຢືນຢັນ ວ່າ ການພົບກັນຄັ້ງສໍາຄັນອີກຄັ້ງໜຶ່ງ ລະຫວ່າງ ທຣໍາ ກັບ ຄິມ ຈະເກີດຂຶ້ນ. ອີກປະການໜຶ່ງ ປະທານາທິບໍດີອາເມຣິກາທຸກຄົນ ນັບຕັ້ງແຕ່ ທ່ານໂຣນັລ ແຣແກນ ເດີນທາງມາທີ່ເຂດປອດທະຫານທຸກຄັ້ງ ໃນການຢ້ຽມຢາມເກົາຫຼີໃຕ້ ຍົກເວັ້ນ ທ່ານຈັອດ ເອັດຈ໌ ດັບເບິລຢູ ບຸຊ (George Herbert Walker Bush) ທີ່ຢ້ຽມຢາມພື້ນທີ່ແຫ່ງນີ້ ໃນສະໄໝດໍາລົງຕໍາແໜ່ງຮອງປະທານາທິບໍດີ.