ຊາວສວນທີ່ປູກອັລມອນໃນອາເມຣິກາ ກັງວົນກໍາແພງພາສີອິນເດຍ

216

ຊາວກະສິກໍາຜູ້ປູກອັລມອນ ໃນລັດແຄລິຟໍເນຍ ເຊິ່ງເປັນແຫຼ່ງຜະລິດລາຍໃຫຍ່ທີ່ສຸດຂອງອາເມຣິກາ ຍອມຮັບວ່າ ມີຄວາມກັງວົນຕໍ່ກໍາແພງພາສີອັລມອນຂອງອິນເດຍ ເຊິ່ງເປັນມາດຕະການຕອບໂຕ້ການຖືກອາເມຣິກາຕັດສິດຈີເອັສພີ.

ສໍານັກຂ່າວຕ່າງປະເທດລາຍງານຈາກນະຄອນລອສແອນເຈລິສ ລັດແຄລິຟໍເນຍ ປະເທດສະຫະລັດ ອາເມຣິກາ ເມື່ອວັນອາທິດ ທີ 30 ມິຖຸນາ ວ່າ ກໍາແພງພາສີຂອງອິນເດຍຕໍ່ອາເມຣິກາ ມີຜົນບັງຄັບໃຊ້ຕັ້ງແຕ່ວັນທີ 16 ມິຖຸນາ ທີ່ຜ່ານມາ ຄວບຄຸມສິນຄ້າ 28 ລາຍະການ ເຊິ່ງສິນຄ້າບາງລາຍການອາດຜະເຊີນກັບອັດຕາພາສີສູງເຖິງ 70% ສ່ວນໃຫຍ່ເປັນສິນຄ້າກະສິກໍາຈໍາພວກໝາກໄມ້ ແລະ ຖົ່ວເປືອກແຂງທີ່ລວມເຖິງອັລມອນ ແລະ ຖົ່ວວອລນັດ ເຊິ່ງອິນເດຍເປັນຕະຫຼາດໃຫຍ່ທີ່ສຸດຂອງອາເມຣິກາ ໂດຍນາຍົກລັດຖະມົນຕີນະເຣນທຣາ ໂມດີ ຂອງອິນເດຍ ໄດ້ປະກາດມາດຕະການດັ່ງກ່າວ ເພື່ອຕອບໂຕ້ການທີ່ລັດຖະບານວໍຊິງຕັນຖອນປະເທດອິນເດຍອອກຈາກບັນຊີປະເທດກໍາລັງພັດທະນາທີ່ໄດ້ຮັບສິດເສດໃນດ້ານພາສີຈາກປະເທດທີ່ພັດທະນາແລ້ວ (ຈີເອັສພີ: GSP: generalized system preference).

ປັດຈຸບັນ ແຫຼ່ງຜະລິດອັລມອນໃຫຍ່ທີ່ສຸດຂອງອາເມຣິກາ ແລະ ຂອງໂລກ ຢູ່ລັດແຄລິຟໍເນຍ ໂດຍມີຜູ້ຜະລິດປະມານ 7 ຄົນ ຄອງສ່ວນແບ່ງໃນຕະຫຼາດໂລກລວມກັນປະມານ 82% ຕາມຂໍ້ມູນຂອງຄະນະກໍາມະການອັລມອນ ລັດແຄລິຟໍເນຍ ເຊິ່ງລະບຸດ້ວຍວ່າ ອຸດສາຫະກໍາການຜະລິດອັລມອນສ້າງວຽກ ແລະ ລາຍໄດ້ໃຫ້ກັບປະຊາຊົນປະມານ 104.000 ຄົນ ໃນພື້ນທີ່.

ເຖິງວ່າ ຖ້າວິເຄາະໂດຍລະອຽດແລ້ວ ພົບວ່າ ກໍາແພງພາສີຂອງອິນເດຍຕໍ່ອັລມອນຈາກອາເມຣິກາເພີ່ມຂຶ້ນ 12 ເຊັນ (ປະມານ 1.100 ກີບ) ຫຼື 20% ຕໍ່ອັລມອນຍັງບໍ່ປອກເປືອກນໍ້າໜັກ 1 ປອນ ເຊິ່ງໃນທາງທິດສະດີບໍ່ຖືວ່າຂຶ້ນຫຼາຍ. ແຕ່ ທ່ານນາງຈູລີ ອໍາສ໌ ປະທານຄະນະກໍາມະການອັລມອນ ແຫ່ງລັດແຄລິຟໍເນຍ ກ່າວວ່າ ອິນເດຍເປັນຕະຫຼາດອັລມອນສໍາຄັນຂອງອາເມຣິກາມາຕະຫຼອດ ຍິ່ງໄປກວ່ານັ້ນໃນໄລຍະທີ່ສະຖານະການສົງຄາມການຄ້າຍັງຕຶງຄຽດ ກໍ່ເປັນການຍາກຫຼາຍທີ່ຈີນຈະນໍາເຂົ້າອັບມອນຈາກອາເມຣິກາ ໃນປະລິມານເທົ່າກັບທີ່ຜ່ານມາ ເພາະຫຼຸດລົງປະມານ 1 ໃນ 3 ນັບ ຕັ້ງແຕ່ລັດຖະບານປັກກິ່ງ ຕັ້ງກໍາແພງພາສີຕໍ່ອັລມອນຂອງອາເມຣິກາ ສູງເຖິງ 50% ເມື່ອປີຜ່ານມາ. ນອກຈາກນີ້, ຍັງບໍ່ເປັນທີ່ຊັດເຈນດ້ວຍວ່າ ກໍາແພງພາສີຂອງອິນເດຍ ແລະ ຈີນ ຕໍ່ສິນຄ້າປະເພດຖົ່ວເປືອກແຂງຂອງອາເມຣິກາຈະມີຜົນບັງຄັບໃຊ້ດົນປານໃດ ແລະ ມາດຕະການຂອງອິນເດຍມີຜົນບັງຄັບໃຊ້ໃນໄລຍະໃກ້ຈະເຖິງລະດູເກັບກ່ຽວອັລມອນຂອງລັດແຄລິຟໍເນຍດ້ວຍ.

ໃນເວລາດຽວກັນ ຜູ້ປະກອບການອັລມອນຂອງອາເມຣິກາຄິດຫາທາງເລືອກອື່ນ ເຊັ່ນການສົ່ງອອກຜະລິດຕະພັນແບບຖົ່ວລວມມິດໄປອິນເດຍແທນ ຍ່າງໃດກໍ່ຕາມ ອົສຕຣາລີເປັນອີກໜຶ່ງປະເທດແຫຼ່ງປູກອັລມອນຂະໜາດໃຫຍ່ ແລະ ມີຄວາມເປັນໄປໄດ້ຫຼາຍທີ່ອິນເດຍ ແລະ ຈີນຈະເລືອກຊື້ອັລມອນຈາກອົສຕຣາລີແທນ ໂດຍສະເພາະຈີນທີ່ມີຂໍ້ຕົກລົງການຄ້າເສລີກັບອົສຕຣາລີດ້ວຍ.