ເໝືອງທອງແດງໃນຄອງໂກເຈື່ອນ ເສຍຊີວິດຢ່າງໜ້ອຍ 43 ຄົນ

226

ປະຊາຊົນລັກລອບເຂົ້າໄປຂຸດຫາແຮ່ທອງແດງ ພາຍໃນເຂດເໝືອງສໍາປະທານ ທາງພາກຕາເວັນອອກສຽງໃຕ້ຂອງປະເທດດິອາ ຄອງໂກ ແລະ ອຸໂມງດິນ 2 ປ່ອງຖະຫຼົ່ມ ເມື່ອວັນພະຫັດ ຜ່ານມາ ເຮັດໃຫ້ມີຜູ້ເສຍຊີວິດ ຢ່າງໜ້ອຍ 43 ຄົນ ແຕ່ສໍານັກງານກາແດງ ລະບຸວ່າ ຈໍານວນຈິງສູງເຖິງ 60-80 ຄົນ.

ສໍານັກຂ່າວເອເອັຟພີລາຍງານຈາກນະຄອນຫຼວງກິນຊາຊາ ສາທາລະນະລັດ ປະຊາທິປະໄຕ ຄອງໂກ (ດີອາ ຄອງໂກ) ເມື່ອວັນເສົາ ທີ 29 ມິຖຸນາ ວ່າ ຈໍານວນຜູ້ເສຍຊີວິດຍັງບໍ່ເປັນທີ່ຊັດເຈນ ຫຼັງຈາກປ່ອງເໝືອງທີ່ຊາວບ້ານລັກລອບເຂົ້າໄປຂຸດ ໃນເຂດສໍາປະທານຂອງບໍລິສັດເໝືອງແຮ່ທອງແດງ ຄາໂມໂຕ ຄັອບເປີ ຄອມພານີ ຫຼື (KCC: Kamoto Copper Company) ເຄືອຂ່າຍຂອງບໍລິສັດເໝືອງແຮ່ລາຍໃຫຍ່ຂອງໂລກ “ເກລນຄໍ” ຈາກສະວິດເຊີແລນ ໃນເຂດໂຄເວຊີ ແຂວງລູອາບາບາ ເຈື່ອນຖະຫຼົ່ມລົງ 2 ປ່ອງ ຝັງຊາວບ້ານທີ່ລັກລອບເຂົ້າໄປຂຸດຫາແຮ່.

ເບື້ອງຕົ້ນຖະແຫຼງການຂອງບໍລິສັດເກລນຄໍ ລະບຸວ່າ ມີຜູ້ເສຍຊີວິດ 19 ຄົນ ແຕ່ອາດຈະມີຜູ້ເສຍຊີວິດຫຼາຍກວ່ານີ້ ສ່ວນທ່ານຣິຊາດ ມູເຢຊ ເຈົ້າແຂວງລູອາບາບາ ເຜີຍເມື່ອວັນສຸກ ວ່າມີຜູ້ເສຍຊີວິດ ໃນເຫດການຢ່າງໜ້ອຍ 43 ຄົນ ແຕ່ສໍານັກງານກາແດງດີອາ ຄອງໂກ ແລະ ກຸ່ມປ້ອງກັນໄພພົນລະເຮືອນໃນທ້ອງທີ່ ເຜີຍວ່າ ຈໍານວນຜູ້ເສຍຊີວິດ ປະມານ 60-80 ຄົນ.

ຜູ້ບໍລິຫານລາຍໜຶ່ງຂອງບໍລິສັດເກລນຄໍ ກ່າວວ່າ ໄດ້ຮັບແຈ້ງຈາກຜູ້ບໍລິຫານເຄຊີຊີ ວ່າ ມີຊາວບ້ານບຸກລຸກເຂົ້າໄປລັກລອບຂຸດຫາແຮ່ໃນເຂດບໍລິສັດຫຼາຍຂຶ້ນເລື່ອຍໆ ຫຼ້າສຸດ ສະເລ່ຍເຖິງວັນລະ 2.000 ຄົນ.