ເກີດເຫດລົດເມນັກທ່ອງທ່ຽວທົວຈີນ ຫຼຸດໂຄ້ງຮ້ອຍສົບ ບາດເຈັບ 14 ສາຫັດ 3 ຄົນ ແຂວງຊຽງໃໝ່

340

ເກີດອຸບັດຕິເຫດລົດເມໂດຍສານນັກທ່ອງທ່ຽວຊາວຈີນຫຼຸດໂຄ້ງ ພິກຂວໍ້າບໍລິເວນຖະໜົນສາຍຊຽງໃຫມ່ – ຊຽງລາຍ ອໍາເພີດອຍສະເກັດ ບາດເຈັບ 14 ຄົນ ໃນຈໍານວນນີ້ ສາຫັດ 3 ຄົນ ກູ້ໄພຊ່ວຍລໍາລຽງສົ່ງໂຮງໝໍແລ້ວ.

ເມື່ອວັນເສົາ ທີ 29 ມິຖຸນາ ເຈົ້າໜ້າທີ່ແຂວງຊຽງໃໝ່ໄດ້ຮັບແຈ້ງອຸບັດຕິເຫດລົດເມນັກທ່ອງທ່ຽວພິກຂວໍ້າມີຜູ້ໄດ້ຮັບບາດເຈັບຫຼາຍຄົນ ບໍລິເວນຖະໜົນສາຍຊຽງໃໝ່ – ຊຽງລາຍ ຫຼັກກິໂລແມັດ ທີ 30- 31 ໝູ່ 3 ບ້ານແມ່ຫວານ ອໍາເພີດອຍສະເກັດ ຈຶ່ງນໍາກໍາລັງໄປກວດສອບພ້ອມເຈົ້າໜ້າທີ່ກູ້ໄພ ແລະ ແພດຈາກໂຮງໝໍດອຍສະເກັດ ໃນທີ່ເກີດເຫດເປັນຈຸດທີ່ຊາວບ້ານເອີ້ນວ່າ “ໂຄ້ງຮ້ອຍສົບ” ເນື່ອງຈາກເກີດອຸບັດຕິເຫດມາແລ້ວຫຼາຍຄັ້ງ ພົບລົດເມໂດຍສານຂອງບໍລິສັດ HanaTour ທະບຽນ 30-2506 ຊຽງໃໝ່ ພິກຂ້າງຢູ່ບໍລິເວນຂ້າງທາງ ໂດຍມີຜູ້ໂດຍສານໄດ້ຮັບບາດເຈັບຫຼາຍຄົນ ແລະ ພະຍາຍາມໜີອອກມາຈາກລົດ ທາງເຈົ້າໜ້າທີ່ກູ້ໄພໄດ້ເລັ່ງຊ່ວຍເຫຼືອເບື້ອງຕົ້ນພົບຜູ້ບາດເຈັບບໍ່ໜັກ 11 ຄົນ ແລະ ສາຫັດ 3 ຄົນ ຈຶ່ງລໍາລຽງສົ່ງໄປປິ່ນປົວທີ່ໂຮງໝໍດອຍສະເກັດ.

ຈາກການສອບສວນ ທ້າວທະນົງ ຕິ໊ບປໍ້ ອາຍຸ 45 ປີ ໂຊເຟີ ຊາວອໍາເພີແມ່ຣິມ ແຂວງຊຽງໃໝ່ ໃຫ້ການ ວ່າ ກໍາລັງຂັບລົດພານັກທ່ອງທ່ຽວ ເຊິ່ງສ່ວນໃຫຍ່ເປັນນັກທ່ອງທ່ຽວຈີນອອກຈາກຊຽງໃໝ່ ເພື່ອໄປທ່ຽວທີ່ແຂວງຊຽງລາຍ ລະຫວ່າງທາງກໍ່ຂັບມາປົກກະຕິ ແຕ່ຮອດໂຄ້ງດັ່ງກ່າວດ້ວຍຄວາມໄວຂອງລົດ ແລະ ໂຄ້ງທີ່ຂ້ອນຂ້າງອັນຕະລາຍ ເຮັດໃຫ້ຂະນະລ້ຽວລົດກໍ່ເກີດເສຍຫຼັກຫຼຸດໂຄ້ງຕໍາກັບເສົາຫຼັກກິໂລແມັດຂ້າງທາງ ກ່ອນພິກຂວໍ້າ ເຊິ່ງທາງເຈົ້າໜ້າທີ່ຈະຕ້ອງລໍຖ້າສອບປາກຄໍາຜູ້ບາດເຈັບທັງໝົດອີກຄັ້ງ ເພື່ອດໍາເນີນການທາງກົດໝາຍຕໍ່ໄປ.