ວັງນ້ຳເຢັນ ແຫຼ່ງທ່ຽວທີ່ສວຍງາມຂອງແຂວງບໍລິຄຳໄຊ

489

ແຫຼ່ງທ່ອງທ່ຽວວັງນ້ຳເຢັນ ເຊິ່ງຕັ້ງຢູ່ບ້ານ ນາປ່າຫວ້ານ, ເມືອງຄຳເກີດ, ແຂວງບໍລິຄຳໄຊ ຖືວ່າເປັນອີກໜຶ່ງແຫຼ່ງທ່ອງທ່ຽວທີ່ສຳຄັນຂອງແຂວງທີ່ກຳລັງໄດ້ຮັບຄວາມສົນໃຈຈາກນັກທ່ອງທ່ຽວທັງພາຍໃນ ແລະ ຕ່າງປະເທດ ເພາະສະຖານທີ່ດັ່ງກ່າວມີຄວາມງາມທີ່ເປັນທຳມະຊາດສາມາດດຶງດູດຈິດໃຈຂອງນັກທ່ອງທ່ຽວໄດ້ເປັນຢ່າງດີ.

ຈຸດເດັ່ນອີກອັນໜຶ່ງແມ່ນນ້ຳຢູ່ທີ່ວັງນ້ຳເຢັນແຫ່ງນີ້ຈະບໍ່ມີວັນບົກແຫ້ງຈັກເທື່ອບໍ່ວ່າຢູ່ໃນລະດູແລ້ງ ຫຼື ລະດູຝົນກໍມີນ້ຳຢູ່ຕະຫຼອດ ທີ່ສາມາດລໍ່ລ້ຽງຊີວິດຂອງປະຊາຊົນຊາວບ້ານນາປ່າຫວ້ານ ແລະ ບ້ານໃກ້ຄຽງມາຕະຫຼອດ. ອີກຟາກຂອງວັງນ້ຳເຢັນຈະມີຂົວຂ້າມໄປຫາອີກຟາກໜຶ່ງເຊິ່ງມີຄວາມງາມທີ່ເປັນທຳມະຊາດເຊື່ອງຊ້ອນຢູ່ ເຊິ່ງຈະມີຝູງແມງກະເບື້ອສີຂາວອາໄສຢູ່ເປັນຈຳນວນຫຼວງຫຼາຍນັບຮ້ອຍນັບພັນໂຕເຫັນແລ້ວເປັນຕາສະອອນຄວາມງົດງາມດັ່ງກ່າວ.

ສຳລັບຂໍ້ຫ້າມໃນການມາທ່ອງທ່ຽວທີ່ວັງນ້ຳເຢັນແມ່ນເພິ່ນຈະບໍ່ໃຫ້ຖິ້ມເສດອາຫານລົງໃສ່ໃນນ້ຳເດັດຂາດ, ຜູ້ທີ່ລົງຫຼິ້ນນ້ຳແມ່ນເພິ່ນຈະບໍ່ໃຫ້ໃຊ້ສະບູ ຫຼື ຢາສະຫົວຢູ່ໃນນ້ຳ, ຫ້າມຍ່ຽວລົງໃສ່ໃນນ້ຳ ແລະ ອື່ນທີ່ສົ່ງຜົນໃຫ້ນ້ຳໃນວັງນ້ຳເຢັນມີຄວາມເປິະເປື້ອນ ທັງນີ້, ກໍເພື່ອເຮັດໃຫ້ສະຖານທີ່ດັ່ງກ່າວມີຄວາມສວຍງາມເປັນໃບໜ້າໃບຕາໃຫ້ກັບບ້ານ, ເມືອງ, ແຂວງ ແລະ ປະເທດລາວຕໍ່ໄປ ເຮັດໃຫ້ນັກທ່ອງທ່ຽວມີຄວາມສົນໃຈຢາກຈະມາທ່ອງທ່ຽວຫຼາຍຂຶ້ນໃນອະນາຄົດ.

ວັງນ້ຳເຢັນ ແມ່ນເປີດນຳໃຊ້ແບບປະຖົມປະຖານມາແຕ່ປີ 1997 ໂດຍການຄຸ້ມຄອງຂອງບ້ານນາປ່າຫວ້ານ ຫຼັງຈາກນັ້ນ, ທາງພາກສ່ວນທີ່ກ່ຽວຂ້ອງໄດ້ເລັງເຫັນເຖິງຄວາມສຳຄັນຈຶ່ງໄດ້ມີການເປີດໃຫ້ບໍລິ ການແກ່ນັກທ່ອງທ່ຽວຢ່າງເປັນທາງການມາໄດ້ 2 ປີແລ້ວ ແລະ ປັດຈຸບັນສະຖານທີ່ດັ່ງກ່າວໄດ້ກາຍເປັນອີກໜຶ່ງຈຸດທີ່ເປັນວົງຈອນເຊື່ອມຕໍ່ເສັ້ນທາງການທ່ອງທ່ຽວທີ່ສຳຄັນລະຫວ່າງແຂວງບໍລິຄຳໄຊໄປຫາແຂວງຄຳມ່ວນ.

ເມື່ອເວົ້າເຖິງແລ້ວແຂວງບໍລິຄຳໄຊ ກໍເປັນແຂວງໜຶ່ງທີ່ຕັ້ງຢູ່ທາງພາກກາງຂອງ ສປປ ລາວ ມີເນື້ອທີ່ທັງໝົດ 14.863 ກິໂລຕາແມັດ ປະກອບມີ 7 ເມືອງຄື: ເມືອງປາກຊັນ, ເມືອງທ່າພະບາດ, ເມືອງປາກກະດິງ, ເມືອງ ບໍລິຄັນ, ເມືອງຄຳເກີດ, ເມືອງວຽງທອງ ແລະ ເມືອງໄຊຈຳພອນ. ໄດ້ຮັບກນສ້າງຕັ້ງຂຶ້ນເປັນແຂວງໃໝ່ໃນປີ 1983 ເຊິ່ງແຍກອອກມາຈາກແຂວງວຽງຈັນ ແລະ ຄຳມ່ວນ ແລ້ວມາໂຮມເປັນແຂວງດັ່ງກ່າວຂຶ້ນມາ, ແຂວງບໍລິຄຳໄຊປະກອບດ້ວຍຫຼາຍຊົນເຜົ່າອາໄສຢູ່ຮ່ວມກັນເຊິ່ງມີຫຼາຍກວ່າ 30 ຊົນເຜົ່າ. ອີງຕາມທີ່ຕັ້ງພູມສັນຖານ, ບໍລິຄຳໄຊ ເປັນແຂວງທີ່ມີຄວາມສຳຄັນທາງດ້ານການຄ້າ ແລະ ການ ທ່ອງທ່ຽວ ເພາະເປັນປະຕູທຳອິດຈາກທາງພາກເໜືອລົງສູ່ພາກໃຕ້ ແລະ ຍັງເປັນແຂວງທ່າດ່ານທີ່ມີຊາຍແດນຕິດກັບ 2 ປະເທດຄື: ທິດຕະເວັນອອກຕິດກັບປະເທດຫວຽດນາມ ແລະ ທິດຕາເວັນຕົກຕິດກັບປະເທດໄທ ກາຍເປັນທາງຜ່ານແລະ ກໍເປັນສູນກາງແຫ່ງການເຊື່ອມຕໍ່ທັງ 4 ທິດທາງ.

ສຳລັບທ່ານໃດທີ່ຕ້ອງການມາທ່ອງທ່ຽວເພື່ອສຳພັດກັບຄວາມງາມຂອງວັງນ້ຳເຢັນກໍສາທາດມາໄດ້ເຊິ່ງຢູ່ຫ່າງຈາກນະຄອນຫຼວງວຽງຈັນປະມານ 200 ກວ່າກິໂລແມັດ ໄປຕາມເສັ້ນທາງຫຼັກ 20 ກາຍອ່າງນ້ຳເທີນໄປ ຫຼັງຈາກນັ້ນຂີ່ລົດໄປເລື້ອຍໆກໍຈະເຫັນປ້າຍສະຖານທີ່ທ່ອງທ່ຽວວັງນ້ຳເຢັນຢູ່ທາງຊ້າຍມື ຂີ່ລົດເຂົ້າຮ່ອມໄປອີກປະມານ 4,5 ກິໂລແມັດກໍຈະຮອດສະຖານທີ່ທ່ອງທ່ຽວວັງນ້ຳເຢັນ.