ທຣໍາ – ສີ ພົບຫາລືທີ່ໂອຊາກ້າ ຕ່າງຝ່າຍຍັງ “ຮັກສາທ່າທີ” ຕໍ່ກັນ

226

ທິດທາງຂອງສົງຄາມການຄ້າ “ຍັງຄຸມເຄືອ” ຈາກການທີ່ປະທານາທິບໍດີໂດນັລ ທຣໍາ ຜູ້ນໍາສະຫະລັດ ແລະ ປະທານປະເທດສີ ຈິ້ນຜິງ ຜູ້ນໍາຈີນ ພົບຫາລືນອກຮອບການປະຊຸມສຸດຍອດຜູ້ນໍາ ຈີ20 ທີ່ເມືອງໂອຊາກ້າ ທີ່ຕ່າງຝ່າຍຕ່າງຍັງ “ຮັກສາທ່າທີ” ຕໍ່ກັນ.

ສໍານັກຂ່າວຕ່າງປະເທດລາຍງານຈາກເມືອງໂອຊາກ້າ ປະເທດຍີ່ປຸ່ນ ເມື່ອວັນເສົາ ທີ 29 ມິຖຸນາ ວ່າ ປະທານາທິບໍດີໂດນັລ ທຣໍາ ຜູ້ນໍາສະຫະລັດ ແລະ ປະທານປະເທດສີ ຈິ້ນຜິງ ຜູ້ນໍາຈີນ ເຂົ້າຫາລືກັນນອກຮອບການປະຊຸມສຸດຍອດຜູ້ນໍາກຸ່ມປະເທດເສດຖະກິດຂະໜາດໃຫຍ່ “ຈີ20” ທີ່ເມືອງໂອຊາກ້າ ປະເທດຍີ່ປຸ່ນ ເມື່ອວັນເສົາ ໂດຍການປະຊຸມໃຊ້ເວລາປະມານ 80 ນາທີ ເຊິ່ງ ທຣໍາ ເປັນຝ່າຍເປີດປະເດັນກ່ອນ ດ້ວຍການກ່າວວ່າ ໂດຍສ່ວນຕົວເຫັນວ່າ ເມື່ອໃດກໍ່ຕາມທີ່ອາເມຣິກາ ແລະ ຈີນ ກໍາລັງ “ເຂົ້າໃກ້ເສັ້ນໄຊຫຼາຍຂຶ້ນ” ທີ່ຈະບັນລຸຂໍ້ຕົກລົງການຄ້າຮ່ວມກັນຈະຕ້ອງມີ “ຫຍັງບາງຢ່າງ” ເຮັດໃຫ້ຄວາມຮ່ວມມືລະຫວ່າງທັງສອງປະເທດໃນເລື່ອງດັ່ງກ່າວຕ້ອງສະດຸດສະເໝີ ແຕ່ຕົນເຊື່ອວ່າ ການພົບກັບ ທ່ານສີ ໃນຄັ້ງນີ້ ຄືສັນຍານທີ່ດີທີ່ຈະເຮັດໃຫ້ທັງສອງຝ່າຍໃກ້ການບັນລຸຂໍ້ຕົກລົງຫຼາຍຂຶ້ນໄປອີກ.

ຂະນະດຽວກັນ ທຣໍາ ກ່າວດ້ວຍວ່າ ຂໍ້ຕົກລົງສະບັບນີ້ຈະຍິ່ງເປັນ “ປະຫວັດສາດ” ຖ້າເປັນຂໍ້ຕົກລົງທີ່ “ເປັນທໍາຢ່າງແທ້ຈິງ” ແລະ ຢືນຢັນວ່າ ສະຫະລັດເປີດກວ້າງສະເໝີ ພ້ອມທັງກ່າວວ່າ ລັດຖະບານວໍຊິງຕັນເອງກໍ່ເຊື່ອວ່າຈີນເປີດກວ້າງ “ໃນເລື່ອງດຽວກັນ” ແຕ່ ທຣໍາ ບໍ່ໄດ້ກ່າວລົງເລິກໃນລາຍະລະອຽດ.

ດ້ານຜູ້ນໍາຈີນ ກ່າວວ່າ ລັດຖະບານປັກກິ່ງພ້ອມແລກປ່ຽນທັດສະນະໃນປະເດັນພື້ນຖານທາງການຄ້າກັບອາເມຣິກາ ແລະ ຢືນຢັນວ່າ ສິ່ງທີ່ຈີນຄາດຫວັງຄືການເຈລະຈາກັນດ້ວຍເຫດຜົນ ຫຼາຍກວ່າການຜະເຊີນໜ້າກັນ ທີ່ໝາຍເຖິງການຕັ້ງກໍາແພງພາສີໂຕ້ຕອບກັນ ຜູ້ນໍາຈີນ ກ່າວຕໍ່ອີກວ່າ ຕະຫຼອດໄລຍະ 40 ປີຜ່ານມາ ຄວາມສໍາພັນລະຫວ່າງອາເມຣິກາ ກັບ ຈີນ ປ່ຽນແປງໄປຕາມຍຸກສະໄໝ ແລະ ສະຖານະການໂລກ ແຕ່ສິ່ງໜຶ່ງເຊິ່ງເປັນ “ຮາກຖານ” ທີ່ບໍ່ຄວນປ່ຽນແປງ ຄືການທີ່ທັງສອງປະເທດໄດ້ຮັບຜົນປະໂຫຍດເທົ່າທຽມຈາກຄວາມຮ່ວມມືທີ່ໃຫ້ກຽດກັນ ໂດຍນອກຈາກສະແດງຄວາມຕ້ອງການແລ້ວ ລັດຖະບານວໍຊິງຕັນ ຕ້ອງປະນີປະນອມໃນບາງເລືອງດ້ວຍ.