ກອງປະຊຸມ ຈີ 20 ທີ່ໂອຊາກ້າ ເທິງຄວາມຂັດແຍ່ງ ອາເມຣິກາ – ຈີນ

237

ການປະຊຸມສຸດຍອດຜູ້ນໍາກຸ່ມປະເທດເສດຖະກິດຂະໜາດໃຫຍ່ ຈີ20 ປະຈໍາປີນີ້ ເປີດສາກຢ່າງເປັນທາງການທີ່ເມືອງໂອຊາກ້າ ປະເທດຍີ່ປຸ່ນ ໂດຍທຸກການເຄື່ອນໄຫວໃຫ້ຄວາມສົນໃຈໄປທີ່ການຫາລື ລະຫວ່າງ ປະທານາທິບໍດີສະຫະລັດ ກັບ ປະທານປະເທດຈີນ.

ສໍານັກຂ່າວຕ່າງປະເທດລາຍງານຈາກເມືອງໂອຊາກ້າ ປະເທດຍີ່ປຸ່ນ ເມື່ອວັນສຸກ ທີ 28 ມິຖຸນາ ວ່າ ການປະຊຸມສຸດຍອດຜູ້ນໍາກຸ່ມປະເທດເສດຖະກິດຂະໜາດໃຫຍ່ ຈີ 20 ເປີດສາກຢ່າງເປັນທາງການ ທີ່ເມືອງໂອຊາກ້າ ປະເທດຍີ່ປຸ່ນ ເມື່ອວັນສຸກ ລະຫວ່າງຄວາມຄາດໝາຍຂອງທຸກຝ່າຍ ວ່າ ບັນຍາກາດຂອງການປະຊຸມທັງແບບເຕັມຄະນະ ແລະ ການຫາລືນອກຮອບລະດັບທະວີພາຄີຂອງແຕ່ລະປະເທດຈະເປັນໄປດ້ວຍຄວາມຕຶງຄຽດ ເພາະກ່ຽວເນື່ອງກັບສົງຄາມການຄ້າລະຫວ່າງ ອາເມຣິກາ ກັບ ຈີນ ທີ່ກໍາລັງສົ່ງຜົນກະທົບເປັນຕ່ອງໂສ້ໄປທົ່ວພາກພື້ນ.

ຢ່າງໃດກໍ່ຕາມ ປະທານາທິບໍດີໂດນັລ ທຣໍາ ເຂົ້າສູ່ທີ່ປະຊຸມ ເຊິ່ງມີການຖ່າຍຮູບໝູ່ເປັນທີ່ລະນຶກຕາມທໍານຽມດ້ວຍທ່າທີຜ່ອນຄາຍ ແລະ ເປັນມິດຢ່າງເຫັນໄດ້ຊັດເຈນ ໂດຍຈັບມື ແລະ ທັກທາຍກັບຜູ້ນໍາທຸກຄົນທີ່ເຂົ້າຮ່ວມການປະຊຸມຢ່າງເປັນກັນເອງ ເຊິ່ງກໍ່ເປັນປະຕິກິລິຍາເພື່ອຫຼຸດຄວາມຕຶງຄຽດ ກ່ອນເລິ່ມການຫາລື. ທັງນີ້ແລ້ວ ຍັງກ່າວຍ້ອງຍໍປະເທດຍີ່ປຸ່ນ ທີ່ “ສົ່ງອອກບໍລິສັດລົດໃຫຍ່ຫຼາຍຍີ່ຫໍ້ໃຫ້ມາຕັ້ງສໍານັກງານໃນອາເມຣິກາ” ແລະ ຈັບມືທັກທາຍກັບນາຍົກລັດຖະມົນຕີ ທ່ານນາງ ອັງເກລາ ແມຣ໌ເຄິລ ຜູ້ນໍາເຢຍລະມັນ ພ້ອມທັງກ່າວເຖິງອີກຝ່າຍວ່າ ເປັນຜູ້ນໍາຍິງທີ່ແຂງແກ່ນ ແລະ ໂດດເດັ່ນ ທາງດ້ານ ທ່ານນາງແມຣ໌ເຄິລ “ຍັງມີອາການປົກກະຕິ” ໂດຍບໍ່ສະແດງອາການສັ່ນ ຫຼື ຜິດປົກກະຕິ ເໝືອນກັບທີ່ເຄີຍເກີດຂຶ້ນແລ້ວ 2 ຄັ້ງ ທີ່ປະເທດເຢຍລະມັນ ຈົນກໍ່ໃຫ້ເກີດຄວາມວິຕົກກັງວົນໃນກຸ່ມປະຊາຊົນຊາວເຢຍລະມັນ ແລະ ສື່ທ້ອງຖິ່ນວິຈານເລື່ອງນີ້ຢ່າງໜັກ ວ່າ ລັດຖະບານບໍ່ຄວນປິດບັງຖ້າ ທ່ານແມຣ໌ເຄິລ ປ່ວຍ ແຕ່ລັດຖະບານເຢຍລະມັນກໍ່ຢືນຢັນວ່າ ທ່ານສະບາຍດີ. ນອກຈາກນີ້, ທຣໍາ ຍັງທັກທ້າຍກັບປະທານາທິບໍດີວະລາດິເມຍ ປູຕິນ ຜູ້ນໍາຣັສເຊຍ ແລະ ໄດ້ສົນທະນາກັນໜ້ອຍໜຶ່ງ.

ຂະນະທີ່ ປະທານປະເທດສີ ຈິ້ນຜິງ ຜູ້ນໍາຈີນ ເຂົ້າສູ່ສະຖານທີ່ຈັດການປະຊຸມດ້ວຍຮອຍຍິ້ມ ແລະ ທັກທາຍກັບຜູ້ນໍາທຸກຄົນຢ່າງເປັນມິດເຊັ່ນກັນ. ທັງນີ້ ທຸກຝ່າຍໃຫ້ຄວາມສົນໃຈກັບການພົບຫາລືລະຫວ່າງຜູ້ນໍາສະຫະລັດ ກັບ ຜູ້ນໍາຈີນ ເຊິ່ງຈະເປັນການພົບກັນຄັ້ງທໍາອິດຂອງທັງສອງຝ່າຍ ນັບຕັ້ງແຕ່ການປະຊຸມ ຈີ20 ເມື່ອປີຜ່ານມາ ທີ່ນະຄອນຫຼວງບົວໂນສໄອເຣສ ປະເທດອາເຈນຕິນາ ທີ່ເຖິງວ່າທັງສອງປະເທດຕົກລົງ “ສະຫງົບເສິກການຄ້າຊົ່ວຄາວ” ແຕ່ໃນທາງປະຕິບັດຈະຍັງບໍ່ເປັນຜົນຫຼາຍເທົ່າທີ່ຄວນ ແລະ ແຫຼ່ງຂ່າວຂອງທັງຝ່າຍສະຫະລັດ ແລະ ຈີນ ກ່າວໄປໃນທາງດຽວກັນ ວ່າ ຍັງບໍ່ຄວນຄາດຫວັງວ່າທ່ານ ທຣໍາ ແລະ ທ່ານສີ ຈະມີຄວາມເຫັນພ້ອມໃນຫຼັກການ ຫຼື ເຖິງຂັ້ນບັນລຸ “ຂໍ້ຕົກລົງແບບເຕັມຮູບແບບ” ລະຫວ່າງການປະຊຸມ ຈີ20 ຄັ້ງນີ້.