ທາງການຫວຽດນາມ ຢໍ້າຫ້າມໂຄສະນາ ຜ່ານ ‘ຊາແນລຕໍ່ຕ້ານລັດ’ ທາງຢູທູບ

234

ລັດຖະບານຫວຽດນາມ ຢໍ້າເຕືອນບັນດາຜູ້ປະກອບການທັງພາຍໃນ ແລະ ຕ່າງປະເທດ ບໍ່ຄວນຊື້ໂຄສະນາເທິງຊ້ອງຂອງຢູທູບ ທີ່ເຜີຍແຜ່ເນື້ອໃນ “ເປັນໄພຕໍ່ຄວາມໝັ້ນຄົງຂອງຊາດ”.

ສໍານັກຂ່າວຕ່າງປະເທດລາຍງານຈາກນະຄອນຫຼວງຮາໂນ່ຍ ປະເທດຫວຽດນາມ ເມື່ອວັນພຸດ ທີ 26 ມິຖຸນາ ວ່າ ກະຊວງຂໍ້ມູນ ແລະ ການສື່ສານຂອງຫວຽດນາມເຊີນຜູ້ແທນຈາກບໍລິສັດຂະໜາດໃຫຍ່ 10 ແຫ່ງ ທັງທີ່ເປັນບໍລິສັດຂອງຫວຽດນາມເອງ ແລະ ບໍລິສັດຕ່າງປະເທດ ທີ່ເຂົ້າມາຕັ້ງສາຂາໃນປະເທດລວມເຖິງຢາມາຮາ ແລະ ແກລັບ ເຂົ້າພົບຫາລືເມື່ອວັນອັງຄານ ທີ່ເປັນການ “ຂໍຄວາມຮ່ວມມື” ຢຸດການຊື້ໂຄສະນາເທິງຊາແນລຢູທູບທີ່ມີເນື້ອໃນ “ຮ້າຍຮາງ ແລະ ເປັນພິດ” ຕໍ່ລັດຖະບານ ທັງນີ້ທາງການຫວຽດນາມມັກໃຊ້ຄໍາວ່າ “ຂໍ້ມູນເປັນພິດ” ແທນພຶດຕິການເຜີຍແຜ່ຂໍ້ມູນຂ່າວສານຕໍ່ຕ້ານລັດ.

ຂະນະດຽວກັນ ລັດຖະບານຮາໂນ່ຍ ສົ່ງ “ເອກະສານແຈ້ງເຕືອນ” ໄປເຖິງບໍລິສັດ ອີກປະມານ 100 ແຫ່ງໃນປະເທດ ວ່າ ບໍ່ຄວນຊື້ໂຄສະນາ ຫຼື ຮ່ວມເຜີຍແຜ່ຜະລິດຕະພັນຂອງຕົນເອງ ເທິງຊາແນລ ໃນຢູທູບທີ່ໜ່ວຍງານດ້ານຄວາມໝັ້ນຄົງທາງໄຊເບີຂອງຫວຽດນາມຂຶ້ນບັນຊີດໍາ ວ່າ ຜິດກົດໝາຍ ໂດຍມີລາຍງານດ້ວຍວ່າ ທັງຊໍາຊຸງ ແລະ ຫົວເຫວີ່ຍໄດ້ຮັບຈົດໝາຍເຕືອນສະບັບນີ້ເຊັ່ນກັນ.

ຄວາມເຄື່ອນໄຫວດັ່ງກ່າວຂອງລັດຖະບານຫວຽດນາມ ເຊິ່ງເປັນຄັ້ງທີ 2 ແລ້ວ ພາຍໃນເດືອນດຽວເປັນໄປຕາມກົດໝາຍຄວາມປອດໄພໄຊເບີ ສະບັບໃໝ່ ເຊິ່ງມີຜົນບັງຄັບໃຊ້ ຕັ້ງແຕ່ວັນທີ 1 ມັງກອນ ທີ່ຜ່ານມາ ໂດຍສາລະສໍາຄັນລວມເຖິງການທີ່ບໍລິສັດດ້ານເທັກໂນໂລຢີຕ້ອງລຶບ ຫຼື ປິດກັ້ນເນື້ອໃນທີ່ລັດຖະບານສັງຄົມນິຍົມຫຂອງວຽດນາມພິຈາລະນາແລ້ວພົບວ່າ “ສົ່ງຜົນຕໍ່ຄວາມໝັ້ນຄົງຂອງຊາດ”  ແລ້ວມອບ “ຂໍ້ມູນອັນຕະລາຍ” ເຫຼົ່ານັ້ນ ໃຫ້ແກ່ລັດຖະບານ. ນອກຈາກນີ້, ກົດໝາຍຍັງຫ້າມຜູ້ໃຊ້ອິນເຕີເນັດໃນຫວຽດນາມເຜີຍແຜ່ຂໍ້ມູນຂ່າວສານທີ່ມີເນື້ອໃນຕໍ່ຕ້ານລັດ ຫຼື ການໃຊ້ເຄືອຂ່າຍສັງຄົມອອນໄລນ໌ ເພື່ອ “ບິດເບືອນປະຫວັດສາດ” ດ້ວຍການນໍາສະເໜີເນື້ອໃນ “ທີ່ເປັນເທັດ”.