ຕຶກຫັກເພຖະຫຼົ່ມ ເມືອງສີຫະນຸວິລ ແຮງງານເສຍຊີວິດ 7 ຄົນ

226

ອາຄານສູງ 7 ຊັ້ນ ທີ່ກໍາລັງຢູ່ລະຫວ່າງການກໍ່ສ້າງຫັກເພຖະຫຼົ່ມລົງມາ ເມື່ອເຊົ້າວັນເສົາ ທີ່ຜ່ານມາ ໃນເມືອງສີຫະນຸວິລ ເມືອງທ່າແຄມທະເລ ຂອງປະເທດກໍາປູເຈຍ ສົ່ງຜົນໃຫ້ແຮງງານເສຍຊີວິດ 7 ຄົນ ແລະ ບາດເຈັບ 18 ຄົນ.

ສໍານັກຂ່າວເອພີລາຍງານຈາກນະຄອນຫຼວງພະນົມເປນ ປະເທດກໍາປູເຈຍ ເມື່ອວັນເສົາ ທີ 22 ມິຖຸນາ ວ່າ ຫົວໜ້າຕໍາຫຼວດເມືອງສີຫະນຸວິລ ເປີດເຜີຍວ່າ ອາຄານສູງ 7 ຊັ້ນທີ່ກໍາລັງຢູ່ລະຫວ່າງການກໍ່ສ້າງ ໃນເມືອງສີຫະນຸວິລ ເມືອງທ່າແຄມທະເລຂອງກໍາປູເຈຍ ເກີດຫັກເພຖະຫຼົ່ມລົງມາ ເມື່ອໄລຍະເຊົ້າວັນເສົາ ທີ່ຜ່ານມາ ສົ່ງຜົນໃຫ້ມີແຮງງານເສຍຊີວິດ 7 ຄົນ ແລະ ບາດເຈັບ 18 ຄົນ ຊາວຈີນ 4 ຄົນ ທີ່ກ່ຽວຂ້ອງກັບການກໍ່ສ້າງຖືກຄວບຕົວໄວ້ແລ້ວ ຂະນະທີ່ ການສອບສວນຫາສາເຫດກໍາລັງດໍາເນີນຕໍ່ໄປ ເຊັ່ນດຽວກັບປະຕິບັດການຄົ້ນຫາ ເພາະອາດຈະຍັງມີແຮງງານຕິດຢູ່ພາຍໃນຊາກອາຄານ.

ກະຊວງແຮງງານ ແລະ ເຝິກອາຊີບຂອງກໍາປູເຈຍ ຖະແຫຼງວ່າ ຂະນະເກີດເຫດມີແຮງງານ 30 ຄົນ ໃນໄລຍະທີ່ອາຄານຫັກເພລົງມາ ເມື່ອເວລາປະມານ 04:00 ໂມງເຊົ້າ ວັນເສົາ ຕາມເວລາທ້ອງຖິ່ນ ສ່ວນສາເຫດຍັງບໍ່ຮູ້ຊັດເຈນ.

ທ່ານຍຸນ ມິນ ຜູ້ວ່າການແຂວງພຣະສີໜຸ ກ່າວວ່າ ອາຄານທີ່ຫັກເພຖະຫຼົ່ມນັ້ນ ເປັນຂອງນັກລົງທຶນຊາວຈີນ ເຊິ່ງເຊົ່າພື້ນທີ່ໄປສ້າງເປັນຄອນໂດມິນຽມ ໜຶ່ງໃນຫຼາຍໂຄງການຂອງຊາວຈີນ ທີ່ເຂົ້າມາເຮັດທຸລະກິດໃນເມືອງທ່າແຄມທະເລຂອງກໍາປູເຈຍ ສ່ວນ ທ່ານຂຽວ ກັນຫະຣິດ ລັດຖະມົນຕີກະຊວງປະຊາສໍາພັນຂອງກໍາປູເຈຍ ກ່າວວ່າ ແຮງງານກໍາປູເຈຍໃຊ້ອາຄານທີ່ຍັງສ້າງບໍ່ແລ້ວດັ່ງກ່າວ ເປັນທີ່ພັກຊົ່ວຄາວ ທັງທີ່ຫາກໍ່ສ້າງໄປແລ້ວ ປະມານ 70-80% ເທົ່ານັ້ນ.