ເສຍຊີວິດເກືອບ 100,000 ຄົນ ໃນສົງຄາມກາງເມືອງປະເທດເຢເມນ

237

ຈໍານວນຜູ້ເສຍຊີວິດຈາກສົງຄາມກາງເມືອງໃນປະເທດເຢເມນ ນັບຕັ້ງແຕ່ປີ 2015 ເກືອບຮອດ 100.000 ຄົນ ຂະນະທີ່ ໜ່ວຍງານດ້ານອາຫານຂອງສະຫະປະຊາຊາດຈໍາເປັນຕ້ອງລະງັບການເຮັດວຽກໃນພື້ນທີ່ບາງສ່ວນຂອງເຢເມນດ້ວຍເຫດຜົນດ້ານຄວາມປອດໄພ.

ສໍານັກຂ່າວຕ່າງປະເທດລາຍງານຈາກນະຄອນຫຼວງຊານາ ປະເທດເຢເມນ ເມື່ອວັນເສົາ ທີ 22 ມິຖຸນາ ວ່າ ໂຄງການອາຫານໂລກ (WFP: World Food Programme) ອອກຖະແຫຼງການ ເມື່ອວັນພະຫັດ ຜ່ານມາ ວ່າ ໄດ້ “ລະງັບຄວາມຊ່ວຍເຫຼືອບາງສ່ວນ” ໃນພື້ນທີ່ນະຄອນຫຼວງຊານາ ປະເທດເຢເມນ ເຊິ່ງຈະສົ່ງຜົນກະທົບຕໍ່ປະຊາຊົນປະມານ 850.000 ຄົນ ໂດຍ ດັບເບິລຢູເອັຟພີ ໃຫ້ເຫດຜົນກ່ຽວກັບ “ຄວາມຂັດສົນເຖິງຂີດສຸດ ໃນການແຈກຈ່າຍອາຫານ” ອັນເນື່ອງມາຈາກສະຖານະການສູ້ຮົບທີ່ຍັງຮຸນແຮງ ເຊິ່ງສ້າງຄວາມເສຍຫາຍຢ່າງໜັກໃຫ້ກັບລະບົບໂຄງສ້າງພື້ນຖານ ແລະ ຄວາມປອດໄພໃນການລົງພື້ນທີ່ຂອງເຈົ້າໜ້າທີ່ບັນເທົາທຸກ.

ໃນຂະນະທີ່ ສະຫະປະຊາຊາດ (UN: United Nations) ຢຸດການເຜີຍແຜ່ສະຖິຕິ “ຢ່າງເປັນທາງການ” ຂອງຜູ້ເສຍຊີວິດຈາກສົງຄາມກາງເມືອງໃນເຢເມນທີ່ແຕກຕ່າງກັນ ຕັ້ງແຕ່ ປີ 2014 ຈົນເຖິງປັດຈຸບັນ ກ່ອນທີ່ສະຖານະການຈະຍິ່ງຮຸນແຮງຂຶ້ນອີກ ເມື່ອຊາອຸດິ ອາຣະເບຍ ແລະ ພັນທະມິດເປີດສາກປະຕິບັດການໂຈມຕີທາງທະຫານໃນເຢເມນ ຕັ້ງແຕ່ທ້າຍເດືອນມີນາ 2015 ຈົນເຖິງປັດຈຸບັນນັ້ນ ຖານຂໍ້ມູນຈາກອົງກອນ “The Armed Conflict Location & Event Data Project” ຫຼື AC&ED ລາຍງານຈໍານວນຜູ້ເສຍຊີວິດຈາກສົງຄາມໃນປະເທດເຢເມນ ເຊິ່ງກ້າວເຂົ້າສູ່ປີທີ 5 ແລ້ວ ຢ່າງໜ້ອຍ 91.600 ຄົນ ໂດຍຍັງບໍ່ຈໍາແນກວ່າເປັນຝ່າຍໃດແດ່.

ທັງນີ້ ຈໍານວນຜູ້ເສຍຊີວິດຈາກການສູ້ຮົບສະເພາະເມື່ອປີ ຜ່ານມາ ມີ 30.800 ຄົນ ແຕ່ຈໍານວນຜູ້ເສຍຊີວິດ ນັບຕັ້ງແຕ່ຕົ້ນປີນີ້ ສູງເຖິງ 11.900 ຄົນແລ້ວ ໂດຍສະໝໍລະພູມຮົບທີ່ສະຖານະການຮຸນແຮງທີ່ສຸດຍັງເປັນເມືອງຕິດທ່ານໍ້າ ໂຮໄດດາ ຕັ້ງຢູ່ທາງພາກຕາເວັນຕົກຂອງປະເທດຕິດກັບທະເລແດງ.