ມາເລເຊຍກ່າວ ບໍ່ມີຫຼັກຖານຊີ້ວ່າ ຣັສເຊຍມີສ່ວນກ່ຽວຂ້ອງຍິງ ເອັມເອັດຈ໌ 17 ຕົກ

214

ນາຍົກລັດຖະມົນຕີມາເລເຊຍ ບໍ່ຍອມຮັບຂໍ້ກ່າວຫາວ່າ ຣັສເຊຍມີສ່ວນກ່ຽວຂ້ອງກັບການຍິງຂີປະນາວຸດໃສ່ຍົນໂດຍສານຂອງສາຍການບິນມາເລເຊຍ ແອຣ໌ໄລນ໌ ຖ້ຽວບິນເອັມເອັດຈ໌ 17 ຕົກ ໃນປະເທດຢູເຄຣນ ຫຼັງໄອຍາການສາກົນຕັ້ງຂໍ້ຫາຊາຍ 4 ຄົນ ໃນຄະດີນີ້ ເຊິ່ງມີຄົນຣັສເຊຍລວມຢູ່ນໍາ 3 ຄົນ.

ສໍານັກຂ່າວເອພີລາຍງານຈາກເມືອງປຸຕຣາຈາຢາ ປະເທດມາເລເຊຍ ເມື່ອວັນພະຫັດ ທີ 20 ມິຖຸນາ ວ່າ ດຣ. ມະຫາເທ ໂມຮໍາໝັດ ນາຍົກລັດຖະມົນຕີມາເລເຊຍ ເປີດເຜີຍວ່າ ຂໍ້ກ່າວຫາວ່າຣັສເຊຍມີສ່ວນກ່ຽວຂ້ອງກັບການຍິງຂີປະນາວຸດໃສ່ຍົນໂດຍສານຂອງສາຍການບິນ ມາເລເຊຍ ແອຣ໌ໄລນ໌ ຖ້ຽວບິນເອັມເອັດຈ໌ 17 ຈາກນະຄອນຫຼວງອໍາສະເຕີດໍາ ປະເທດໂຮນລັງ ເດີນທາງສູ່ນະຄອນຫຼວງກົວລາລໍາເປີ ເມື່ອວັນທີ 17 ກໍລະກົດ 2014 ຕົກ ທາງພາກຕາເວັນອອກຂອງປະເທດຢູເຄຣນ ຈົນເປັນເຫດໃຫ້ມີຜູ້ເສຍຊີວິດຍົກລໍາ 298 ຄົນ ຫຼັງຈາກທີ່ ຄະນະໄອຍະການລະຫວ່າງປະເທດຕັ້ງຂໍ້ຫາຄາດຕະກໍາກັບຊາຍ 4 ຄົນດ້ວຍກັນ ເຊິ່ງໃນຈໍານວນນີ້ 3 ຄົນ ເປັນຊາວຣັສເຊຍ ເຊິ່ງມີເບື້ອງຫຼັງໃນດ້ານການທະຫານ ແລະ ໜ່ວຍຂ່າວກອງນັ້ນ ໃນຄວາມເຫັນຂອງຕົນແລ້ວ ບໍ່ຄິດວ່າຫຼັກຖານທີ່ຄະນະເຮັດວຽກສອບສວນຂອງນານາຊາດພົບນັ້ນ ຈະເປັນຂໍ້ເທັດຈິງທັງໝົດ ເພາະຕັ້ງຢູ່ເທິງພື້ນຖານຂອງຄໍາບອກເລົ່າເທົ່ານັ້ນ.

ນາຍົກລັດຖະມົນຕີມາເລເຊຍ ກ່າວອີກວ່າ ມາເລເຊຍບໍ່ມີຄວາມສະບາຍໃຈມາຕັ້ງແຕ່ຕົ້ນຂອງການສອບສວນຄະດີນີ້ ເພາະມັນໄດ້ກາຍເປັນປະເດັນທາງການເມືອງໃນການກ່າວຫາຣັສເຊຍ ເຖິງວ່າຈະໄດ້ກວດສອບຫຼັກຖານຊາກຊິ້ນສ່ວນແລ້ວກໍ່ຕາມ ການສອບສວນກໍ່ຍັງຊີ້ໄປທີ່ຣັສເຊຍ ດັ່ງນັ້ນ ຈຶ່ງເປັນເລື່ອງຍາກສໍາລັບມາເລເຊຍທີ່ຈະຍອມຮັບ.

ໃນການຕັ້ງຂໍ້ກ່າວຫາຊາຍ 4 ຄົນ ເມື່ອວັນພຸດ ທີ່ຜ່ານມາ ໄອຍະການຂອງນານາຊາດຍັງໄດ້ຂໍຮ້ອງໃຫ້ພິຍານທັງຫຼາຍ ວ່າ ຖ້າມີຫຼັກຖານ ຫຼື ເບາະແສເພິ່ມຕື່ມຂໍໃຫ້ແຈ້ງເຈົ້າໜ້າທີ່ເພື່ອນໍາໄປສູ່ການສອບສວນ ວ່າ ໃຜຢູ່ເບື້ອງຫຼັງ ເຊິ່ງອາດຈະພົວພັນໄປເຖິງສາຍການບັງຄັບບັນຊາຂອງປະທານາທິບໍດີວະລາດິເມຍ ປູຕິນ ແຫ່ງຣັສເຊຍ.

ສ່ວນການດໍາເນີນຄະດີຊາຍຜູ້ຖືກກ່າວຫາທັງ 4 ຄົນນັ້ນ ກໍານົດຈະມີຂຶ້ນໃນເດືອນມີນາ ປີໜ້າ ທີ່ປະເທດໂຮນລັງ ເຊິ່ງມີນັກຮົບແບ່ງແຍກດິນແດນຂອງຢູເຄຣນລວມຢູ່ນໍາ ແຕ່ບໍ່ມີທາງທີ່ຜູ້ຖືກກ່າວຫາທັງ 4 ຄົນຈະມາຂຶ້ນສານໄດ້ ເພາະທັງຣັສເຊຍ ແລະ ຢູເຄຣນບໍ່ອະນຸຍາດໃຫ້ມີການສົ່ງຜູ້ຮ້າຍຂ້າມແດນລະຫວ່າງກັນ ຂະນະທີ່ ກະຊວງການຕ່າງປະເທດຂອງຣັສເຊຍ ຕອບໂຕ້ການຕັ້ງຂໍ້ກ່າວຫາຊາວຣັສເຊຍ ວ່າ ບໍ່ມີຫຼັກຖານຊັດເຈນວ່າ ຄົນຂອງຣັສເຊຍມີສ່ວນກ່ຽວຂ້ອງ ຄະນະເຮັດວຽກກວດສອບໃຊ້ຂໍ້ມູນເບາະແສທີ່ກໍາລວມບໍ່ຊັດເຈນ ແລະ ບໍ່ເຊື່ອຟັງຫຼັກຖານທີ່ຣັສເຊຍນໍາສະເໜີ ທັງນີ້ ກໍ່ເພື່ອທີ່ຈະຫາທາງທໍາລາຍຊື່ສຽງ ແລະ ຄວາມເຊື່ອຖືຂອງຣັສເຊຍ.