ຈີນຄົ້ນພົບຂຸມສົບເກົ່າແກ່ 2 ພັນປີ ຄາດຝັງຮ່າງຊາວຮັ່ນ ຕາເວັນອອກ

283

ທາງການທ້ອງຖິ່ນມົນທົນຫູເປີ່ຍ ທາງພາກກາງຂອງຈີນ ເປີດເຜີຍ ເມື່ອວັນພຸດ ທີ19 ມິຖຸນາ ວ່າ ມີການຄົ້ນພົບຂຸມຝັງສົບບູຮານ ອາຍຸກວ່າ 2 ພັນປີ ລະຫວ່າງການກໍ່ສ້າງຖະໜົນສາຍໜຶ່ງຂອງໝູ່ບ້ານເຢົ່າຖານເຫີ ເມື່ອວັນສຸກ ທີ 14 ມິຖຸນາ ຜ່ານມາ.

ຄະນະນັກບູຮານຄະດີ ລະບຸວ່າ ມີຂຸມຝັງສົບທັງໝົດ 4 ຂຸມ ແລະ ຍັງຂຸດພົບວັດຖຸບູຮານຫຼາຍກວ່າ 10  ຢ່າງ ເຊັ່ນ: ດາບເຫຼັກ, ເຄື່ອງໂລຫະ ແລະ ເຄື່ອງປັ້ນດິນເຜົາ ລວມເຖິງກະດູກ ແລະ ແຂ້ວຂອງມະນຸດ ເຊິ່ງເຊື່ອວ່າ ເປັນຂອງຄົນຍຸກຣາຊະວົງຮັ່ນຕາເວັນອອກ ຄສ 25-220.

ທາງການທ້ອງຖິ່ນຂອງມົນທົນຫູເປີ່ຍ ຊີ້ວ່າ ການຄົ້ນພົບຄັ້ງນີ້ ຈະຊ່ວຍສະໜັບສະໜຸນການສຶກສາທໍາມະຊາດ, ປະເພນີການຝັງສົບຂອງປະຊາຊົນໃນຍຸກດັ່ງກ່າວ ໂດຍຄະນະນັກບູຮານຄະດີຈະເດີນໜ້າການຂຸດສໍາຫຼວດເພິ່ມຕື່ມຕໍ່ໄປ.