ລັດຖະບານຈີນ ໃຫ້ງົບດ່ວນ 126 ຕື້ກີບ ຊ່ວຍພື້ນທີ່ປະສົບໄພເສສວນ

259

ສໍານັກຂ່າວຊິນຫົວ ລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນພຸດ ທີ 19 ມິຖຸນາ ວ່າ ກະຊວງການເງິນ ແລະ ກະຊວງບໍລິຫານຈັດການເຫດສຸກເສີນຂອງຈີນ ລະບຸ ເມື່ອວັນພຸດ ທີ 19 ມິຖຸນາ ວ່າ ລັດຖະບານໄດ້ມີການຈັດສັນງົບປະມານ 100 ລ້ານຢວນ (ປະມານ 126 ຕື້ກີບ) ໃຫ້ກັບປະຕິບັດການກູ້ໄພທີ່ມົນທົນເສສວນທີ່ໄດ້ເກີດເຫດແຜ່ນດິນໄຫວ ຂະໜາດ 6,0 ແມັກນິຈູດ ເມື່ອວັນທີ 18 ມິຖຸນາ ຜ່ານມາ.

ພ້ອມກັນນີ້, ລັດຖະບານຈີນຍັງໄດ້ຈັດສົ່ງເຕັ້ນ 5.000 ຫຼັງ, ຕຽງສະໜາມ 10.000 ໜ່ວຍ ແລະ ຜ້າຫົ່ມ 20.000 ຜືນ ໄປເຖິງພື້ນທີ່ປະສົບໄພຮຽບຮ້ອຍແລ້ວ.

ຈາກລາຍງານຫຼ້າສຸດ ເມື່ອເວລາ 16:00 ໂມງ ຂອງວັນພຸດ ທີ 19 ມິຖຸນາ ວ່າ ມີຜູ້ໄດ້ຮັບຜົນກະທົບຈາກເຫດໄພທໍາມະຊາດດັ່ງກ່າວ 243.880 ຄົນ ເສຍຊີວິດແລ້ວ 13 ຄົນ ແລະ ໄດ້ຮັບບາດເຈັບ 220 ຄົນ ປະຊາຊົນຫຼາຍກວ່າ 52.000 ຄົນ ໄດ້ຮັບການອົບພະຍົບອອກຈາກພື້ນທີ່ເກີດເຫດແລ້ວ. ນອກຈາກນີ້, ຍັງມີບ້ານເຮືອນທີ່ຫັກເພເສຍຫາຍຢ່າງໜັກ ລວມ 20.000 ຫຼັງ.