ພໍ່ແມ່ຊາວອິນເດຍ ໃນລັດພິຫານ ບໍ່ພໍໃຈ ການປະຕິບັດຂອງລັດຕໍ່ໂຣກສະໝອງອັກເສບ

216

ຜູ້ປົກຄອງຂອງເດັກຊາວອິນເດຍທີ່ລົ້ມປ່ວຍດ້ວຍໂຣກສະໝອງອັກເສບກະທັນຫັນຮວມຕົວປະທ້ວງ ທັງລັດຖະບານກາງ ແລະ ລັດຖະບານທ້ອງຖິ່ນ ກ່ຽວກັບລະບົບສາທາລະນະສຸກທີ່ບໍ່ມີຄຸນນະພາບ ຂະນະທີ່ ຈໍານວນຜູ້ເສຍຊີວິດຈາກໂຣກດັ່ງກ່າວເພິ່ມເປັນຢ່າງໜ້ອຍ 113 ຄົນແລ້ວ.

ສໍານັກຂ່າວຕ່າງປະເທດລາຍງານຈາກເມືອງປັດນາ ລັດພິຫານ ປະເທດອິນເດຍ ເມື່ອວັນພະຫັດ ທີ 20 ມິຖຸນາ ວ່າ ໂຮງໝໍວິທະຍາໄລແພດສຣີກິດນະ (ເອເຄເອັມຊີເອັດຈ໌: AKMCH: AL-Khalidi Medical Center and Hospital) ຕັ້ງຢູ່ໃນເມືອງມຸຊຊັຟຟາບຸຣະ ແລະ ເປັນໂຮງໝໍລັດຂະໜາດໃຫຍ່ທີ່ສຸດຂອງລັດພິຫານ ທີ່ຢູ່ທາງພາກຕາເວັນອອກສຽງເໜືອຂອງອິນເດຍ  ໄດ້ລາຍງານຈໍານວນເດັກທີ່ເສຍຊີວິດຈາກໂຣກສະໝອງອັກເສບກະທັນຫັນ ຫຼື ເອອີເອັສ (AES: Acute Encephalitis Syndrome) ເພິ່ມເປັນຢ່າງໜ້ອຍ 113 ຄົນແລ້ວ ສ່ວນໃຫຍ່ເປັນເດັກອາຍຸຕ່ໍາກວ່າ 10 ປີ ຢ່າງໃດກໍ່ຕາມ ມີເດັກໄດ້ຮັບການປິ່ນປົວຈົນມີອາການດີຂຶ້ນຢ່າງໜ້ອຍ 6 ຄົນ.

ທັງນີ້ ຜູ້ສັນທັດກໍລະນີ ຍັງເຊື່ອວ່າ ສາເຫດການເສຍຊີວິດຂອງເດັກສ່ວນໃຫຍ່ມາຈາກການຮັບປະທານໝາກລິ້ນຈີ່ ເຊິ່ງອາດຈະເປັນຜົນມາຈາກຄວາມປ່ຽນແປງຂອງສິ່ງແວດລ້ອມທີ່ສົ່ງຜົນໃຫ້ສານບາງຢ່າງໃນລິ້ນຈີ່ປ່ຽນສະພາບເປັນ “ສານພິດ” ຫຼື ເຊື້ອໄວຣັສທີ່ເກີດຂຶ້ນເອງ ໂດຍອາການກ່ອນເສຍຊີວິດຂອງເດັກສ່ວນໃຫຍ່ມີພາວະການສູນເສຍກຼູໂຄສ (ສູນເສຍນໍ້າຕານ Glucose) ໃນເລືອດຢ່າງກະທັນຫັນ ເຖິງວ່າການເສຍຊີວິດຈາກໂຣກ ເອອີເອັສ ເກີດຂຶ້ນທຸກໆປີ ໃນລັດພິຫານ ເຊິ່ງເປັນແຫຼ່ງປູກໝາກລິ້ນຈີ່ທີ່ສໍາຄັນຂອງອິນເດຍ ແລະ ໄລຍະນີ້ເປັນລະດູຂອງໝາກລິ້ນຈີ່ພໍດີ ແຕ່ສະຖານະການໃນປີນີ້ຖືເປັນວິກິດຍິ່ງກວ່າເມື່ອປີ 1995 ເຊິ່ງມີຜູ້ເສຍຊີວິດເປັນທາງການຢ່າງໜ້ອຍ 78 ຄົນ.

ຂະນະທີ່ ຜູ້ປົກຄອງຂອງຜູ້ເສຍຊີວິດຈໍານວນໜຶ່ງປັກຫຼັກຮວມຕົວກັນປະທ້ວງທັງລັດຖະບານທ້ອງຖິ່ນ ແລະ ລັດຖະບານກາງ ທີ່ໜ້າໂຮງໝໍ ເອເຄເອັມຊີເອັດຈ໌ ໂດຍກ່າວຫາວ່າ ເຈົ້າໜ້າທີ່ສາທາລະນະສຸກບໍ່ໃຫ້ຄວາມສໍາຄັນກັບວິກິດດ້ານສາທາລະນະສຸກທີ່ເກີດຂຶ້ນຫຼາຍເທົ່າທີ່ຄວນ ແລະ ດໍາເນີນການຢ່າງ “ຫຼ້າຊ້າ” ດ້ານພັກຄອງເກຣສ ເຊິ່ງເປັນແກນນໍາຝ່າຍຄ້ານວິຈານຄະນະຮັບຜິດຊອບຂອງລັດພິຫານໃຫ້ຄວາມສໍາຄັນກັບຜົນການແຂ່ງຂັນກີລາຄຼິກເກັດຫຼາຍກວ່າສຸຂະພາບຂອງເດັກໃນພື້ນທີ່ ເຊິ່ງເສຍຊີວິດເພິ່ມຂຶ້ນທຸກວັນ ເພາະບໍ່ໄດ້ຮັບຢາປິ່ນປົວ ແລະ ການດູແລທີ່ຖືກວິທີ ພ້ອມທັງຮຽກຮ້ອງໃຫ້ນາຍົກລັດຖະມົນຕີນະເຣນທຣາ ໂມດີ ຈັດການເລື່ອງນີ້ດ້ວຍຕົວເອງ.

ອີກປະການໜຶ່ງ ລັດພິຫານເປັນໜຶ່ງໃນລັດທີ່ມີຖານະທາງເສດຖະກິດທຸກຍາກທີ່ສຸດໃນປະເທດ ໂດຍນອກຈາກໂຣກ ເອອີເອັສ ແລ້ວ ພື້ນທີ່ສ່ວນໃຫຍ່ຂອງລັດຍັງຜະເຊີນກັບອິດທິພົນຂອງຄື້ນຄວາມຮ້ອນບໍ່ຕ່ໍາກວ່າ 45 ອົງສາ ພາກຊີວິດປະຊາຊົນເກືອບ 100 ຄົນແລ້ວ ຕັ້ງແຕ່ຕົ້ນເດືອນນີ້.