ທຣໍາ ປະກາດນະໂຍບາຍຫາສຽງເລືອກຕັ້ງ ສະໄໝ 2 ຢ່າງເປັນທາງການ

230

ປະທານາທິບໍດີໂດນັລ ທຣໍາ ປະກາດນະໂຍບາຍລົງສະໝັກຮັບເລືອກຕັ້ງ ແລະ ຫາສຽງເພື່ອຮັກສາຕໍາແໜ່ງຜູ້ນໍາສະຫະລັດໃຫ້ໄດ້ 2 ສະໄໝຕິດຕໍ່ກັນ ເຊິ່ງການເລືອກຕັ້ງຈະມີຂຶ້ນ ໃນຕົ້ນເດືອນພະຈິກ 2020.

ສໍານັກຂ່າວຕ່າງປະເທດລາຍງານຈາກເມືອງອໍແລນໂດ ລັດຟຼໍຣິດາ ປະເທດສະຫະລັດ ອາເມຣິກາ ເມື່ອວັນອັງຄານ ທີ 18 ມິຖຸນາ ວ່າ ປະທານາທິບໍດີໂດນັລ ທຣໍາ ໄດ້ຈັດການປາໄສຄັ້ງໃຫຍ່ ລະຫວ່າງກາງກຸ່ມຜູ້ສະໜັບສະໜຸນທີ່ເມືອງອໍແລນໂດ ໃນລັດຟຼໍຣິດາ ເມື່ອວັນພຸດ ປະກາດນະໂຍບາຍບໍລິຫານປປະເທດເພື່ອລົງສະໝັກຮັບເລືອກຕັ້ງ ແລະ ຫາສຽງເພື່ອຮັກສາຕໍາແໜ່ງຜູ້ນໍາສະຫະລັດໃຫ້ໄດ້ເປັນສະໄໝທີ 2 ໂດຍ ທຣໍາ ກ່າວດ້ວຍວ່າ ຕະຫຼອດໄລຍະເວລາທີ່ຜ່ານມາ ລັດຖະບານພາຍໃຕ້ການນໍາຂອງຕົນສາມາດພັດທະນາເສດຖະກິດຂອງສະຫະລັດໃຫ້ “ເປັນທີ່ໜ້າອິດສາຂອງຊາວໂລກ” ແລະ ໃຫ້ຄໍາໝັ້ນໃຈວ່າ ຖ້າຊະນະການເລືອກຕັ້ງເປັນສະໄໝ ທີ 2 ເຊິ່ງຈະມີຂຶ້ນ ໃນວັນທີ 3 ພະຈິກ ປີຫນ້າ “ອາເມຣິກາທີ່ກັບມາຍິ່ງໃຫຍ່ແລ້ວ ຈະຍິ່ງໃຫຍ່ ແລະ ໂດດເດັ່ນຍິ່ງຂຶ້ນກວ່າເກົ່າ”.

ຈາກຊ້າຍໄປຫາຂວາ: ທ່ານນາງເມລາເນຍ ທຣໍາ, ທ່ານໂດນັລ ທຣໍາ, ທ່ານໄມຄ໌ ເພນຊ໌ ແລະ ທ່ານນາງຄາເຣນ ເພນຊ໌

ຂະນະດຽວກັນ ທຣໍາ ເຊິ່ງຂຶ້ນເວທີພ້ອມ ທ່ານນາງເມລາເນຍ ທຣໍາ ສຸພາບສະຕີໝາຍເລກໜຶ່ງ ແລະ ຮອງປະທານາທິບໍດີໄມຄ໌ ເພນຊ໌ ແລະ ທ່ານນາງຄາເຣນ ເພນຊ໌ ຍັງກ່າວໂຈມຕີສື່ກະແສຫຼັກຫຼາຍແຫ່ງທີ່ບໍ່ຢຸດນໍາສະເໜີ “ຂໍ້ມູນເທັດ, ຂ່າວລວງ ແລະ ຂ່າວປອມ” ເຊິ່ງເປັນເລື່ອງທີ່ຕົນບໍ່ມີທາງຍອມຮັບ ແລະ ຈະຫາທາງຢັບຢັ້ງບໍ່ໃຫ້ເກີດຂຶ້ນອີກ ໂດຍຜົນສໍາຫຼວດຄວາມຄິດເຫັນປະຊາຊົນຂອງສື່ໃຫຍ່ ຫຼາຍແຫ່ງໃນປະເທດ ລະບຸວ່າ ຄະແນນນິຍົມຂອງ ທຣໍາ ຕາມຫຼັງຜູ້ສະເໜີຊື່ເຂົ້າຊີງຕໍາແໜ່ງ ເຊິ່ງເປັນຕົວແທນຂອງພັກເດໂມແຄຣັດເກືອບທຸກຄົນ ທັງທີ່ອີກຝ່າຍຍັງບໍ່ມີການຈັດການເລືອກຕັ້ງໄພຣມາຣີ ພາຍໃນພັກເທື່ອ ໂດຍສະເພາະຄວາມນິຍົມທີ່ຕາມຫຼັງອະດີດຮອງປະທານາທິບໍດີໂຈ ໄບເດນ ແລະ ທ່ານເບີນີ ແຊນເດີສ໌ ສະມາຊິກອາວຸໂສຈາກລັດເວີມອນ ເຊິ່ງ ທ່ານແຊນເດີສ໌ ເຄີຍສະເໜີຕົວຊີງຕໍາແໜ່ງຕົວແທນພັກເດໂມແຄຣັດ ໃນການເລືອກຕັ້ງເມື່ອປີ 2016  ແລະ ແພ້ໃຫ້ກັບ ທ່ານນາງຮິລລາຣີ ຄລິນຕັນ ໃນຮອບຊີງ.

ແນ່ນອນວ່າ ທຣໍາ ປະຕິເສດຜົນສໍາຫຼວດທັງໝົດ ແລະ ປະນາມພັກເດໂມແຄຣັດ ວ່າ ເປັນ “ພວກຊ້າຍສຸດ” ທີ່ພະຍາຍາມທໍາລາຍບ້ານເມືອງດ້ວຍການເຜີຍແຜ່ແນວຄິດທີ່ສ້າງອັກຄະຕິ ແລະ ຄວາມຄຽດແຄ້ນແຕກແຍກ ພາຍໃນສັງຄົມ. ທັງນີ້, ລັດຟຼໍຣິດາ ຖືເປັນໜຶ່ງໃນລັດທີ່ຢູ່ໃນກຸ່ມ “ສະວິງສະເຕດ” ຂອງການເລືອກຕັ້ງທຸກລະດັບຂອງສະຫະລັດເກືອບທຸກຄັ້ງ ໂດຍຢ້ອນກັບໄປໃນການເລືອກຕັ້ງ ເມື່ອປີ 2016 ທຣໍາ ບຽດເອົາຊະນະ ທ່ານນາງຄລິນຕັນ ດ້ວຍຄະແນນສຽງ 4,6 ຕໍ່ 4,5 ລ້ານຄະແນນ ຄິດເປັນ 49% ຕໍ່ 48% ຊີງຄະແນນຄະນະຜູ້ເລືອກຕັ້ງ 29 ສຽງມາໄດ້.