ຊີເມນສ໌ ກຽມປົດພະນັກງານ ເພິ່ມອີກ 2.700 ຄົນທົ່ວໂລກ

231

ບໍລິສັດ “ຊີເມນສ໌” ປະກາດກຽມປົດພະນັກງານເພິ່ມອີກ 2.700 ຄົນທົ່ວໂລກ ຕາມແຜນປັບໂຄງສ້າງອົງກອນຄັ້ງຫຼ້າສຸດ ໂດຍເກືອບເຄິ່ງຈະເປັນພະນັກງານໃນຖານໃຫຍ່ທີ່ປະເທດເຢຍລະມັນ.

ສໍານັກຂ່າວຕ່າງປະເທດລາຍງານຈາກນະຄອນຫຼວງເບີລິນ ປະເທດເຢຍລະມັນ ເມື່ອວັນພຸດ ທີ 19 ມິຖຸນາ ວ່າ ກຸ່ມບໍລິສັດຊີເມນສ໌ ເຊິ່ງເປັນໜຶ່ງໃນຜູ້ປະກອບທຸລະກິດດ້ານວິສະວະກໍາ ແລະ ເທັກໂນໂລຢີ ລະດັບແຖວໜ້າຂອງໂລກ ທີ່ມີສໍານັກງານໃຫຍ່ຢູ່ທີ່ນະຄອນຫຼວງເບີລິນ ແລະ ເມືອງມິວນິກ ປະເທດເຢຍລະມັນ ອອກຖະແຫຼງການ ເມື່ອວັນອັງຄານ ເລື່ອງການທະຍອຍປົດພະນັກງານທົ່ວໂລກ 2.700 ຕໍາແໜ່ງ “ພາຍໃນອີກບໍ່ເທົ່າໃດປີຈາກນີ້” ໂດຍຈາກຈໍານວນດັ່ງກ່າວ 1.400 ຕໍາແໜ່ງຈະເປັນພະນັກງານຕາມສໍານັກງານໃນເຢຍລະມັນ ແລະ ສ່ວນໃຫຍ່ເປັນພະນັກງານໃນສາຍດ້ານພະລັງງານ ແລະ ກ໊າຊທໍາມະຊາດ.

ທັງນີ້ ການປົດພະນັກງານຮອບໃໝ່ຂອງຊີເມນສ໌ເປັນສ່ວນໜຶ່ງຂອງແຜນຍຸດທະສາດ “ປັບໂຄງສ້າງອົງກອນ” ເຊິ່ງບໍລິສັດກໍານົດເປົ້າໝາຍປະຢັດຄ່າໃຊ້ຈ່າຍໃຫ້ໄດ້ 2.200 ລ້ານເອີໂຣ (ປະມານ 21.400 ຕື້ກີບ) ພາຍໃນປີ 2023 ປັດຈຸບັນ ຊີເມນສ໌ ມີພະນັກງານປະມານ 64.000 ຄົນ ໃນສໍານັກງານ 80 ປະເທດ ມີລາຍໄດ້ 12.400 ລ້ານເອີໂຣ (ປະມານ 121.000 ຕື້ກີບ) ເມື່ອປີຜ່ານມາ  ແລະ ກໍາໄລ 377 ລ້ານເອີໂຣ (ປະມານ 3.670 ຕື້ກີບ) ເຊິ່ງມາຈາກການເຮັດສັນຍາດ້ານພະລັງງານສະບັບສໍາຄັນໃນອີຍິບ ແລະ ອິຣັກ.