ເກີດແຜ່ນດິນໄຫວຮຸນແຮງ ໃນເສສວນ ປະເທດຈີນ ເສຍຊີວິດແລ້ວ 12 ເຈັບກວ່າຮ້ອຍຄົນ

264

ເກີດເຫດແຜ່ນດິນໄຫວຮຸນແຮງ ວັດແທກໄດ້ 6,0 ແມັກນິຈູດ ເມື່ອວັນຈັນ ຜ່ານມາ ໃນມົນທົນເສສວນ ທາງພາກຕາເວັນຕົກສຽງໃຕ້ຂອງຈີນ ເຮັດໃຫ້ມີຜູ້ເສຍຊີວິດແລ້ວ 12 ຄົນ ບາດເຈັບກວ່າຮ້ອຍຄົນ ແລະ ບໍ່ມີທີ່ຢູ່ອາໄສກວ່າ 4.000 ຄົນ.

ສໍານັກຂ່າວເອເອັຟພີລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນອັງຄານ ທີ 18 ມິຖຸນາ ວ່າ ລັດຖະບານທ້ອງຖິ່ນຂອງເມືອງຍີ່ປິງ ມົນທົນເສສວນ ທາງພາກຕາເວັນຕົກສຽງໃຕ້ ຂອງປະເທດຈີນ ອອກຖະແຫຼງການວ່າ ມີປະຊາຊົນໄຮ້ທີ່ຢູ່ອາໄສກວ່າ 4.000 ຄົນ ເພາະອາຄານບ້ານເຮືອນໄດ້ຮັບຄວາມເສຍຫາຍຈາກເຫດແຜ່ນດິນໄຫວຮຸນແຮງ ວັດແທກໄດ້ 6,0 ແມັກນິຈູດ ເມື່ອວັນຈັນ ທີ່ຜ່ານມາ ທີ່ນອກເມືອງຍີ່ປິງຂອງມົນທົນເສສວນ ເຊິ່ງສະຖານີໂທລະທັດຊີຊີທີວີ ໄດ້ເຜີຍແຜ່ພາບເຫດການຂະນະເຈົ້າໜ້າທີ່ກູ້ໄພໃຫ້ຄວາມຊ່ວຍເຫຼືອນໍາຕົວຜູ້ລອດຊີວິດຂຶ້ນມາຈາກຊາກອາຄານທີ່ຫັກເພຖະຫຼົ່ມລົງມາ ຈາກເຫດແຜ່ນດິນໄຫວຮຸນແຮງ. ນອກຈາກນັ້ນ, ພາບຈາກເຂດສາງໜິງຍັງສະແດງໃຫ້ເຫັນເສົາໄຟຟ້າຫັກລົ້ມລົງມາ, ມີຮອຍແຜ່ນດິນແຍກຢູ່ເທິງຖະໜົນຫຼາຍສາຍ ແລະ ເສັ້ນທາງຫຼວງເຊື່ອມຕໍ່ລະຫວ່າງ ເມືອງຍີ່ປິງ ກັບ ຊືຫຍົງ ຕ້ອງປິດໃຫ້ບໍລິການຊົ່ວຄາວ.

ທາງສໍານັກຂ່າວຊິນຫົວລາຍງານດ້ວຍວ່າ ລະບົບເຕືອນໄພລ່ວງໜ້າສົ່ງສັນຍານເຕືອນທີ່ເມືອງເສິງຕູ ເມືອງຫຼວງຂອງມົນທົນເສສວນ 1 ນາທີ ກ່ອນເກີດແຜ່ນດິນໄຫວ ແລະ ຍັງເຕືອນ 10 ວິນາທີ ກ່ອນເກີດແຜ່ນດິນໄຫວ ທີ່ເມືອງຍີ່ປິງ. ຢ່າງໃດກໍ່ຕາມ, ລະບົບເຕືອນໄພ 3 ວິນາທີ ກ່ອນເກີດແຜ່ນດິນໄຫວ ສາມາດຊ່ວຍປ້ອງກັນອັນຕະລາຍຈົນເຮັດໃຫ້ມີຜູ້ເສຍຊີວິດ ແລະ ບາດເຈັບໄດ້ 14% ແຕ່ທາງເຈົ້າໜ້າທີ່ກູ້ໄພພົບຜູ້ເສຍຊີວິດ 12 ຄົນ ແຍກເປັນ 9 ສົບ ທີ່ເຂດສາງໜິງ ແລະ 3 ສົບ ໃນເຂດສີຊຽນ ບາດເຈັບ 134 ຄົນ.

In this photo released by Xinhua News Agency, rescue workers carry out a person from a collapsed building following a strong earthquake at Putao village of Shuanghe town in Changning County of Yibin City, southwest China’s Sichuan Province, Tuesday, June 18, 2019. (Zhuang Ge’er/Xinhua via AP)

ຊິນຫົວລາຍງານຕໍ່ອີກວ່າ ກໍາລັງເຈົ້າໜ້າທີ່ຂອງໜ່ວຍດັບເພີງ 500 ຄົນ ຖືກສົ່ງໄປເຖິງທີ່ເກີດເຫດ ພ້ອມກັບສິ່ງຂອງບັນເທົາທຸກທັງເຕັ້ນທີ່ພັກ 5.000 ຫຼັງ, ຕຽງພັບ 10.000 ໜ່ວຍ ແລະ ອື່ນໆ. ໃນພື້ນທີ່ເກີດເຫດຍັງມີອັບເຕີຊັອກຕາມມາອີກ 4 ຄັ້ງ ໂດຍຄັ້ງທີ່ຮຸນແຮງທີ່ສຸດວັດແທກໄດ້ 5,1 ແມັກນິຈູດ ສ່ວນສໍານັກງານສໍາຫຼວດທໍລະນີວິທະສາສະຫະລັດ ວັດແທກແຮງສັ່ນສະເທືອນຈາກແຜ່ນດິນໄຫວຄັ້ງນີ້ໄດ້ 5,8 ແມັກນິຈູດ.

ແຜ່ນດິນໄຫວຮຸນແຮງເກີດຂຶ້ນເລື້ອຍໆ ໃນມົນທົນເສສວນ ເຊິ່ງຄັ້ງທີ່ຮຸນແຮງທີ່ສຸດວັດແທກໄດ້ 7,9  ແມັກນິຈູດ ເຮັດໃຫ້ມີຜູ້ເສຍຊີວິດ ແລະ ສູນຫາຍ 87.000 ຄົນ ເມື່ອປີ 2008 ສ່ວນຫຼ້າສຸດ ເມື່ອເດືອນກຸມພາ ທີ່ຜ່ານມາ ເກີດເຫດແຜ່ນດິນໄຫວ 3 ຄັ້ງ ໃນເຂດຫຼົງຊຽງ ມີຜູ້ເສຍຊີວິດ 2 ຄົນ ແລະ ບາດເຈັບ 12 ຄົນ.