Benz ແຫ່ງອະນາຄົດ “ບໍ່ຕ້ອງຈັບພວງມາໄລກໍ່ໄປເຖິງຈຸດໝາຍໄດ້” ພ້ອມຄວາມປອດໄພຈັດເຕັມ

245

ເມີເຊເດຊ-ເບນຊ໌ Mercedes-Benz ຄ້າຍຜະລິດລົດລາຍໃຫຍ່ຈາກປະເທດເຢຍລະມັນ ທີ່ໃຫ້ຄວາມສໍາຄັນເອົາໃຈໃສ່ການພັດທະນາເທັກໂນໂລຢີທີ່ທັນສະໄໝລວມໄປເຖິງຄວາມປອດໄພໃຫ້ແກ່ຜູ້ຂັບຂີ່ ແລະ ເມື່ອບໍ່ດົນມານີ້ ພວກເຂົາກໍ່ໄດ້ນໍາສະເໜີລົດໃຫຍ່ທີ່ມາພ້ອມກັບຄວາມກ້າວຫນ້າຂອງລະບົບຄວາມປອດໄພ ຫຼັງຈາກທີ່ໄດ້ມີການເປີດຕົວ Mercedes-Benz ESF 2019.

ລົດ SUV ຄັນນີ້ ໃຊ້ຊື່ເຕັມວ່າ Mercedes-Benz ESF 2019 Experimental Safety Vehicle ເຊິ່ງພັດທະນາເທິງພື້ນຖານຂອງ Mercedes-Benz GLE.

ຈຸດເດັ່ນຂອງລົດລຸ້ນນີ້ ຢູ່ທີ່ການຕິດຕັ້ງລະບົບໄຮ້ຄົນຂັບ ເຊິ່ງທາງຄ້າຍກ່າວວ່າ ນີ້ຄືລົດໃຫຍ່ໄຮ້ຄົນຂັບລະດັບ 4 ທີ່ທ່ານຜູ້ຂັບບໍ່ຈໍາເປັນຕ້ອງຈັບພວງມາໄລກໍ່ສາມາດໄປເຖິງທີ່ໝາຍໂດຍປອດໄພໄດ້ ພ້ອມກັບໃສ່ລະບົບຄວາມປອດໄພອື່ນໆ ເຂົ້າມາແບບຈັດເຕັມ.

ລະບົບຄວາມປອດໄພທີ່ໃສ່ເຂົ້າມາໃນລົດ SUV ລຸ້ນນີ້ ປະກອບໄປດ້ວຍ:

– ລະບົບ All-round driver safety ທີ່ຈະເປັນການປັບຕໍາແໜ່ງຂອງພວງມາໄລ ແປ້ນເບຣກ, ຄັນເລັ່ງ ໃຫ້ຫົດເຂົ້າໄປໃນຕົວລົດເພື່ອຫຼຸດຄວາມສ່ຽງໃນການໄດ້ຮັບບາດເຈັບຂອງຜູ້ຂັບຂີ່ ເມື່ອເກີດອຸບັດເຫດ.

ການຕິດຕັ້ງຖົງລົມນິລະໄພໃໝ່ທັງໃນຄອນໂຊນລົດ ແລະ ດ້ານຂ້າງເບາະຄົນຂັບ ອີກທັງຍັງປັບແສງສະຫວ່າງໃນຕອນກາງເວັນໃຫ້ຫຼາຍກວ່າປົກກະຕິ ເພື່ອເພິ່ມຄວາມຕື່ນຕົວໃຫ້ຜູ້ຂັບຂີ່ດ້ວຍ.

– ລະບົບຕິດຕໍ່ສື່ສານລະຫວ່າງລົດ ແລະ ສິ່ງແວດລ້ອມພາຍນອກ ໂດຍຈະມີການປ່ອຍສັນຍານແຈ້ງເຕືອນຈາກຕົວລົດໃຫ້ຄົນເດີນຖະໜົນຮັບຊາບວ່າ ສາມາດເດີນທາງຜ່ານໄປ ຫຼື ຈະມີອັນຕະລາຍເກີດຂຶ້ນ ຫຼື ບໍ່.

ແຕ່ສິ່ງທີ່ຫນ້າສົນໃຈຂອງລະບົບຄວາມປອດໄພທີ່ທາງ Mercedes-Benz ໃສ່ມາກັບລົດ SUV ລຸ້ນນີ້ ກໍ່ຄືຄວາມປອດໄພສໍາລັບຜູ້ໂດຍສານຕອນຫລັບ ແລະ Child safety ຂອງເບາະນັ່ງທີ່ມາພ້ອມກັບລະບົບອັດສະລິຍະ.

ສໍາລັບລະບົບຄວາມປອດໄພຂອງຜູ້ໂດຍສານຕອນຫລັບນັ້ນ ທາງຄ້າຍໄດ້ມີການເພິ່ມຖົງລົມນິລະໄພດ້ານຫຼັງທີ່ຈະຕິດຕັ້ງໄວ້ກັບເບາະຄູ່ໜ້າ.

ໂດຍທາງຄ້າຍເບິ່ງເຫັນວ່າ ອຸປະກອນກັນກະແທກອ້ອມຮອບພາຍໃນທີ່ໃຊ້ກັບລົດໃນປັດຈຸບັນນັ້ນ ບໍ່ພຽງພໍ ແລະ ຖົງລົມດ້ານຫຼັງນີ້ຈະສາມາດຊ່ວຍຫຼຸດອາການບາດເຈັບຂອງຜູ້ໂດຍສານໄດ້ຫຼາຍເຖິງ 30%.

ສຸດທ້າຍຄືລະບົບຄວາມປອດໄພສໍາລັບເດັກ ທາງຄ້າຍໄດ້ນໍາສະເໜີ ຄາຣ໌ ຊີດ ຫຼື ເບາະນັ່ງ ທີ່ມາພ້ອມກັບລະບົບອັດສະລິຍະ ໂດຍຈະມີການສະແດງຕໍາແໜ່ງການຕິດຂອງເບາະທີ່ໜ້າຈໍດ້ານໜ້າ ເພື່ອໃຫ້ພໍ່ ແລະ ແມ່ ຮູ້ວ່າ ເບາະຂອງລູກນ້ອຍ ໄດ້ຕັ້ງຢູ່ໃນຕໍາແໜ່ງທີ່ຖືກຕ້ອງ ຫຼື ບໍ່ ແລະ ສາມາດເຮັດວຽກໄດ້ຢ່າງເຕັມປະສິດທິພາບໃນລະດັບໃດ.

ນອກຈາກນີ້, ຍັງມີກ້ອງ ແລະ ເຊັນເຊີ ສໍາລັບກວດຈັບອຸນຫະພູມ, ຊີບພະຈອນ ແລະ ຈັງຫວະການຫາຍໃຈຂອງເດັກ ແລະ ຈະແຈ້ງເຕືອນໃຫ້ຮູ້ກ່ຽວກັບຄວາມເຄື່ອນໄຫວຂອງເດັກ ເຊັ່ນ: ຕອນນີ້ລູກຂອງທ່ານຕື່ນແລ້ວ, ລູກຫົວໃຈເຕັ້ນໄວຜິດປົກກະຕິ, ມີອາການປ່ວຍ ຫຼື ວ່າມີໍຫຍັງຜິດປົກກະຕິເກີດຂຶ້ນ ລື້ ບໍ່.

Mercedes-Benz ESF 2019 Experimental Safety Vehicle ຄືລົດຕົ້ນແບບທີ່ສະແດງໃຫ້ເຫັນເຖິງເທັກໂນໂລຢີດ້ານຄວາມປອດໄພຕ່າງໆທີ່ທາງຄ້າຍກໍາລັງພັດທະນາ.

ເຖິງວ່າ ພວກເຮົາຈະບໍ່ໄດ້ເຫັນລົດຄັນດັ່ງກ່າວ ອອກມາແລ່ນເທິງທ້ອງຖະໜົນພາຍໃນປີນີ້ກໍ່ຕາມ ແຕ່ຢ່າງໃດກໍ່ຕາມ ລະບົບຄວາມປອດໄພຕ່າງໆທີ່ຢູ່ໃນລົດຄັນນີ້ ທາງຄ້າຍລະບຸວ່າ ຈະເພິ່ມເຂົ້າໄປໃນລົດລຸ້ນໃໝ່ຂອງຄ້າຍທີ່ຈະຜະລິດອອກມາໃນອະນາຄົດຢ່າງແນ່ນອນ.