ປູຕິນ ກ່າວຄວາມສໍາພັນ ກັບ ສະຫະລັດ ໄລຍະນີ້ ສັ່ນຄອນລົງເລື້ອຍໆ

249

ປະທານາທິບໍດີຣັສເຊຍ ກ່າວເຖິງ ຄວາມສໍາພັນກັບອາເມຣິກາໃນຍຸກຂອງປະທານາທິບໍດີໂດນັລ ທຣໍາ ວ່າ “ຮ້າຍແຮງລົງເລື້ອຍໆ” ເຖິງວ່າອີກຝ່າຍຍັງຢໍ້າເຖິງການພົບກັນນອກຮອບການປະຊຸມ “ຈີ 20” ທີ່ປະເທດຍີ່ປຸ່ນ ເຊິ່ງລັດຖະບານມອສໂກ ຍັງບໍ່ຢືນຢັນເຊັ່ນດຽວກັບລັດຖະບານຈີນ.

ສໍານັກຂ່າວຕ່າງປະເທດລາຍງານຈາກນະຄອນຫຼວງມອສໂກ ປະເທດຣັສເຊຍ ເມື່ອວັນສຸກ ທີ 14 ມິຖຸນາ ວ່າ ສະຖານີໂທລະທັດເມຍ ຂອງຣັສເຊຍອອກອາກາດລາຍການສໍາພາດປະທານາທິບໍດີວະລາດິເມຍ ປູຕິນ ເມື່ອວັນພະຫັດ ທີ່ຜູ້ນໍາລັດຖະບານໄດ້ກ່າວໃນໄລຍະໜຶ່ງເຖິງຄວາມສໍາພັນກັບສະຫະລັດ ວ່າ “ມີແຕ່ຄວາມສັ່ນຄອນ ແລະ ຮ້າຍແຮງລົງເລື້ອຍໆ” ຈາກກໍລະນີພິພາດລະດັບທະວິພາຄີ ແລະ ຄວາມຂັດແຍ່ງຕໍ່ສະຖານະການໂລກອີກຫຼາຍປະເດັນ.

ທັງນີ້ ຄໍາກ່າວຂອງປູຕິນ ເຜີຍແຜ່ທາງສື່ຂອງຣັສເຊຍພຽງວັນດຽວ ຫຼັງປະທານາທິບໍດີໂດນັລ ທຣໍາ ກ່າວສະແດງຄວາມເຊື່ອໝັ້ນວ່າ ຈະມີການພົບຫາລືລະຫວ່າງ ທຣໍາ ກັບ ປູຕິນ ລະຫວ່າງການປະຊຸມສຸດຍອດຜູ້ນໍາກຸ່ມປະເທດເສດຖະກິດຂະໜາດໃຫຍ່ “ຈີ 20” ທີ່ເມືອງໂອຊາກ້າຂອງຍີ່ປຸ່ນ ໃນໄລຍະທ້າຍເດືອນນີ້ ແລະ ເມື່ອເດືອນພຶດສະພາ ຜ່ານມາ ທຣໍາ ຍັງກ່າວອີກວ່າ ຕົນຈະພົບຫາລືກັບປູຕິນນອກຮອບການປະຊຸມສຸດຍອດ ຈີ20 ເຖິງວ່າທາງຝ່າຍທໍານຽບເຄຣມລິນໄດ້ຢືນຢັນໃນເວລານັ້ນວ່າ “ຍັງບໍ່ມີການຕົກລົງກັນໃນເລື່ອງນີ້ຢ່າງເປັນທາງການ” ໂດຍຜູ້ນໍາທັງສອງຝ່າຍພົບຫາລືຢ່າງເປັນທາງການຄັ້ງທໍາອິດ ທີ່ນະຄອນຫຼວງເຮລຊິງກິ ປະເທດຟິນແລນ ເມື່ອງກາງປີ 2018.

ຂະນະທີ່ ເມື່ອຕົ້ນອາທິດນີ້ ທຣໍາ ກ່າວເຖິງ “ກໍານົດການ” ພົບຫາລືລະຫວ່າງຕົນກັບປະທານປະເທດສີ ຈິ້ນຜິງ ຜູ້ນໍາຈີນ ລະຫວ່າງການປະຊຸມຈີ 20 ເຊັ່ນກັນ ດ້ວຍວັດຖຸປະສົງເພື່ອຫາທາງຜ່ອນຄາຍຄວາມຂັດແຍ່ງທາງການຄ້າເຊິ່ງຍືດເຍື້ອມາດົນ ໂດຍຜູ້ນໍາສະຫະລັດກ່າວດ້ວຍວ່າ ຕົນຫວັງເປັນຢ່າງຍິ່ງວ່າຈະໄດ້ພົບກັບທ່ານສີ ໃນການປະຊຸມຄັ້ງນີ້ ຖ້າບໍ່ເປັນເຊັ່ນນັ້ນ ກໍ່ມີຄວາມເປັນໄປໄດ້ສູງຫຼາຍທີ່ລັດຖະບານວໍຊິງຕັນຈະຂຶ້ນພາສີຕໍ່ສິນຄ້າຂອງອີກຝ່າຍ ຖ້າການເຈລະຈາລະຫວ່າງການປະຊຸມ ຈີ 20 ຄັ້ງນີ້ “ບໍ່ມີຄວາມຄືບໜ້າຢ່າງສ້າງສັນ” ຫຼື ທ່ານສີ ປະຕິເສດພົບກັບຕົນລະຫວ່າງການປະຊຸມ ເຊິ່ງກໍາແພງພາສີນັ້ນອາດສູງເຖິງ 25% ແລະ ຈະເປັນການຮຽກເກັບຈາກມູນຄ່າສິນຄ້ານໍາເຂົ້າເພິ່ມອີກ 300.000 ລ້ານໂດລາ (ປະມານ 2,6 ລ້ານຕື້ກີບ).