ຈີນຝົນຕົກໜັກ ນໍ້າຖ້ວມພາກກາງ-ໃຕ້ ເສຍຊີວິດ 5 ຄົນ ແລະ ຕິດເກາະຫຼາຍໝື່ນ

246

ປະຊາຊົນຫຼາຍໝື່ນຄົນຕິດເກາະ ແລະ ເສຍຊີວິດຢ່າງໜ້ອຍ 5 ຄົນ ຈາກນ້ໍາຖ້ວມ ຫຼັງມີຝົນຕົກໜັກທົ່ວພາກກາງ ແລະ ພາກໃຕ້ຂອງຈີນ ສໍານັກອຸຕຸນິຍົມວິທະຍາຄາດການ ວ່າ ຝົນຈະຕົກໜັກຕິດຕໍ່ກັນອີກຢ່າງໜ້ອຍ 4 ວັນ ນັບຕັ້ງແຕ່ວັນອັງຄານ.

ສໍານັກຂ່າວຣອຍເຕີລາຍງານຈາກນະຄອນຫຼວງປັກກິ່ງ ສາທາລະນະລັດ ປະຊາຊົນຈີນ ເມື່ອວັນອັງຄານ ທີ 11 ມິຖຸນາ ວ່າ ເກີດນ້ໍາຖ້ວມກະທັນຫັນສ້າງຜົນກະທົບຕໍ່ພືດຜົນກະສິກໍາຄວບຄຸມພື້ນທີ່ 10.800 ເຮັກຕ້າ ແລະ ບ້ານເຮືອນຫັກເພເສຍຫາຍຫຼາຍຮ້ອຍຫຼັງ ໃນມົນທົນຈຽງຊີ ເມື່ອວັນຈັນ ໂດຍມີປະຊາຊົນໄດ້ຮັບຜົນກະທົບກວ່າ 14 ລ້ານຄົນ ຄິດເປັນມູນຄ່າຄວາມເສຍຫາຍທາງເສດຖະກິດໂດຍກົງປະມານ 2.650 ລ້ານຢວນ (ປະມານ 3.310 ຕື້ກີບ) ຈາກລາຍງານຂອງໜັງສືພິມໄຊນາ ເດລີ່ ຂອງລັດຖະບານຈີນ.

ພນື້ທີ່ເຂດປົກຄອງຕົນເອງກວ່າງຊີຈ້ວງ ຫຼື ກວາງສີ ທາງພາກໃຕ້ ຂອງປະເທດຈີນ ບ້ານເຮືອນປະມານ 20.000 ຫຼັງ, ໄຟຟ້າຖືກຕັດ, ຖະໜົນຫົນື່ງ, ຂົວ ແລະ ລະບົບສາທາລະນູປະໂພກອື່ນໆໄດ້ຮັບຄວາມເສຍຫາຍໜັກ. ສ່ວນມົນທົນຈຽງຊີ ວັດແທກປະລິມານນ້ໍາຝົນໄດ້ 688 ມິນລິແມັດ ປະລິມານຝົນໃນຫຼາຍພື້ນທີ່ຂອງມົນທົນຈຽງຊີ ແລະ ມົນທົນຫູໜານຕົກໜັກເປັນສະຖິຕິ ໃນເດືອນມິຖຸນາ.

ສໍານັກອຸຕຸນິຍົມວິທະຍາແຫ່ງຊາດຈີນຄາດການ ວ່າ ພາຍຸຝົນຈະກະຈາຍປົກຄຸມໄປມົນທົນກວາງຕຸ້ງ, ຝູຈ້ຽນ, ຈຽງຊີ, ຢູນໜານ, ເສສວນ ແລະ ໄຕ້ຫວັນ ພາຍໃນວັນພະຫັດ ແລະ ເຕືອນເຈົ້າໜ້າທີ່ໃຫ້ລະວັງກະແສນ້ໍາໃນແມ່ນ້ໍາສາຍນ້ອຍຫຼາຍສາຍຍຶ່ງລົ້ນຖ້ວມຝັ່ງ ໃນໄລຍະເທົ່າໃດວັນຈາກນີ້.